Samosone o chesa lijalo tsa Bafilesita
1Kamora' matsatsi a se makae, nakong eo ho heloang koro ka eona, Samosone a boela a etela mosali oa hae, a mo nketse potsanyane, 'me a re: “Ke sa kena ka ho mosali oa ka ka kamoreng ea hae.”
Empa ntat'a mosali a mo hanela ho kena. 2Eo ntat'a mosali a re ho eena: “Ke ile ka hopola hore ruri u mo hloile; ka baka leo, ke ile ka mo nea molekane oa hao. Na moena eo oa mosali oa hao ha a mo fete ka botle? Mpe u nke eena bakeng sa enoa, kea u kōpa.”
3Samosone a re ho bona: “Joale tjena ha ke na ho ba molato ho Bafilesita ha ke ba etsa hampe.”
4Samosone a tsamaea, a tšoara liphokojoe tse makholo a mararo, a nka lirumōla. a tlamahanya mehatla ea liphokojoe ka peli, a nt'o tlamella serumōla mehatleng e meng le e meng e 'meli, e tlamahantsoeng. 5Ha a se a hotelitse lirumōla tsena, a lelekela liphokojoe tsena har'a masimo a koro ea Bafiletsita e e-s'o heloe. Eaba o chesa koro e seng e tlamiloe mangata, le koro e e-so'ng ho heloe, esita le lirapa tsa mohloaare.
6Eaba Bafilesita ba re: “Ke mang ea entseng hoo?”
Batho ba re: “Ke Samosone, mokhoenyana oa monna ea ahileng Timina, hobane monna eo o nkile mosali oa Samosone a mo nea molekane oa Samosone.”
Bafilesita ba nyoloha, ba chesa mosali eo le ntat'ae. 7Samosone a re ho bona: “Le etsa tjee! Ruri nke ke ka le tlohela ho fihlela ke iphetelitse!” 8A ba tsōbōka, a ba etsa mofela. A theoha moo, a ea phela lehaheng le lefikeng la Etame.
Samosone o hlōla Bafilesita
9Joale Bafilesita ba nyoloha, ba hloma naheng ea Juda, ba futuhela motse oa Lehi. 10Banna ba Juda ba re ho bona: “Ke hobane'ng ha le tlile koano ho re futuhela?”
Bafilesita ba re: “Re tlile koano ho tla tšoara Samosone, re mo etse seo a re entseng sona.”
11Eaba banna ba Juda ba likete tse tharo ba theohela lehaheng le lefikeng la Etame, ba fihla ba re ho Samosone: “Na ha u tsebe hore re busoa ke Bafilesita? Joale ntho ee, eo u re etselitseng eona, ke eng?”
Samosone a re ho bona: “Ke ba entse seo ba nkentseng sona.”
12Ba re ho eena: “Re theohetse koano ho tla u tlama, re neelana ka uena matsohong a Bafilesita.”
Samosone a re ho bona: “Ntlhapanyetseng hore lōna le ke ke la mpolaea.”
13Ba bua ho eena, ba re: “Che! Feela re tla u tlama ka thata, re neelane ka uena matsohong a bona, empa ruri re ke ke ra u bolaea.” Ba mo tlama ka mehala e 'meli, e mecha, 'me ba nyoloha le eena ho tloha lehaheng.
14Ha Samosone a fihla Lehi, Bafilesita ba tla ba hōoeletsa, ha ba kopana le eena. Moea oa Morena oa theohela ka matla holim'a Samosone. Mehala e mo tlamileng matsohong ea ka likhoele tsa lene tse chesitsoeng ka mollo, 'me tsa tlamoloha matsohong a hae. 15A bona mohlaare oa tonki e sa tsoa shoa, a nanabetsa letsoho, a o nka, 'me ka oona a bolaea banna ba sekete.
16Eaba Samosone o re:
“Ka mohlaare oa tonki
ke ba entse liqubu-qubu,
ka mohlaare oa tonki
ke bolaile banna ba le sekete.”
17Ha a qetile ho bua a lahla mohlaare oo, sebaka seo a se rea lebitso la Leralla la Mohlaare.
18Samosone o ne a nyoriloe haholo, 'me a ipiletsa ho Morena, a re: “Ka letsoho la mohlanka oa hao u fane ka tlhōlo ena e kholohali! Ebe joale ke tla shoa ke lenyora? Kapa ke tla oela matsohong a maqai?” 19Eaba Molimo o phunya mokoti hona moo Lehi, 'me metsi a kolla ho oona. Samosone a noa, moea oa khutlela ho eena, 'me a khatholoha. Ka baka leo, a rea sebaka seo lebitso la Seliba sa Moipiletsi, se ntseng se le hona moo Lehi ho fihlela kajeno-ea-bokajeno.
20Mehleng eo ea Bafilesita, Samosone ea e-ba moahlōli oa Baiseraele ka lilemo tse mashome a mabeli.
