Tsoalo ea Samosone
1Bana ba Iseraele ba boela ba siteloa Morena. Morena a neelana ka bona matsohong a Bafilesita ka lilemo tse mashome a mane.
2Ho ne ho e-na le monna ea bitsoang Manōoa, ea neng a ahile Sora. E ne e le oa morabe oa Dane. Mosali oa hae e ne e le nyōpa. 3Lengeloi la Morena la itlhahisa ho mosali eo, la re ho eena: “Bona, u nyōpa, empa u tla emōla, u belehe ngoana oa moshanyana. 4Ka baka leo, hlokomela hle, u se ke ua ba ua noa veine, kapa seno se tahang; u se ke ua ja ntho efe kapa efe e silafetseng. 5Bona, u tla emōla, 'me u belehe mora. U se ke ua ba ua beola moriri oa hae, hobane ho tloha pōpelong ngoana enoa e tla ba mokhethoa oa Molimo, 'me o tla qala ho namolela Baiseraele matsohong a Bafilesita.”
6Eaba mosali enoa o ea ho monna oa hae, o fihla a re: “Morōmuoa oa Molimo o ile a fihla ho 'na, 'me tšobotsi ea hae e ne e tšoana le ea lengeloi la Molimo, e tšosa. Ha kea ka ka 'motsa hore na o tsoa kae, le eena ha aa ka a mpolella lebitso la hae. 7O ile a re ho 'na: ‘Bona, u tla emōla, 'me u belehe mora. U se ke ua noa veine, kapa seno se tahang, 'me u se ke ua ja ntho efe kapa efe e silafetseng, hobane ho tloha pōpelong, ho fihlela a e-shoa, ngoana eo e tla ba mokhethoa oa Molimom.’ ”
8Joale Manōoa a rapela Morena, a re: “Oho, Morena, morōmuoa oa Molimo, eo u ileng ua mo rōma, a ke a tle ho rōna hape, kea u kōpa, a tl'o re ruta seo re tla se etsa ho ngoana ea tla tsoaloa.”
9Molimo a mamela kōpo ea Manōoa, 'me lengeloi la Morena la boela la fihla ho mosali a ntse a lutse har'a tšimo, empa Manōoa, monna oa hae, a ne a le sieo moo ho mosali. 10Mosali a matha ka potlako, a ea bolella monna oa hae, a re ho eena: “Hela, monna eane ea ileng a fihla ho 'na ka tsatsi lane, o boetse o itlhahisitse ho 'na hape.”
11Manōoa a ema, a latela mosali oa hae; a fihla ho monna eo, 'me a re ho eena: “Na ke uena monna ea ileng a bua le mosali eo?”
Eaba monna eo o re: “Ke 'na.”
12Manōoa a re: “Ha mantsoe a hao a se a phethahetse, moshanyana eo o tla hōlisoa joang? O tla etsa eng?”
13Lengeloi la Morena la re ho Manōoa: “Ho hlokomeloe tsohle tseo ke li boleletseng mosali. 14Mosali a se ke a ja letho la tsohle tse tsoang morareng, a se ke a noa veine, leha e le seno sa tahang, 'me a se ke a ja ntho efe kapa efe e silafetseng. A ke a bōlōke tsohle tseo ke mo laetseng tsona.”
15Manōoa a re ho lengeloi la Morena: “A re ke re u tšoarelle ho se hokae, re ke re u hlabele potsanyane.”
16Lengeloi la Morena la re ho Manōoa: “Le hoja le ntšoarella, nke ke ka ja lijo tsa lōna, empa haeba le etsa nyehelo ea secheso, le e nyehelle Morena.” Manōoa o ne a sa tsebe hore eo ke lengeloi la Morena.
17Manōoa a boela a re ho lengeloi la Morena: “Lebitso la hao u mang, e le hore ha lipolelo tsa hao li phethahala re tle re u tlōtle?”
18Eaba lengeloi la Morena le re ho eena: “Ke hobane'ng ha u mpotsa lebitso la ka, empa lebitso la ka e le sephiri?”
19Eaba Manōoa o nka potsanyane, le nyehelo ea lijo, 'me o nyehella Morena ka tsona holim'a lefika. Ha bo-Manōoa le mosali oa hae ba shebeletse, Morena a etsa ntho e hlollang, 20lelakabe la tlōla holim'a aletare, la nyolohela leholimong, lengeloi la Morena la nyoloha le le kahar'a lelakabe leo le tsoang aletareng. Bo-Manōoa le mosali oa hae ba bona hona, 'me ba itihela fatše ka lifahleho. 21Empa lengeloi la Morena la se ke la hlola le itlhahisa ho Manōoa le mosali oa hae. Joale Manōoa a tseba hore efela e ne e le lengeloi la Morena.
22Manōoa a re ho mosali oa hae: “Ruri re tla shoa, hobane re bone Molimo.”
23Empa mosali oa hae a re ho eena: “Haeba Morena a ne a rata ho re bolaea, a ka be a sa ka a ananela nyehelo ea secheso, le nyehelo ea lijo e tsoang matsohong a rōna. Hape a ka be a sa ka a re bontša lintho tsena tsohle, 'me a ka be a sa ka a re bolella lintho tse kang tsena, ka nako ena.”
24Mosali a beleha ngoana oa moshanyana, a mo rea lebitso la Samosone. Ngoana a 'na a hōla, 'me Morena a mo hlohonolofatsa. 25Moea oa Morena oa qala ho mo susumetsa ha a le Mahaneha-Dane e pakeng tsa Sora le Eshetaole.
