JAKOBO 3

₁Bana beso, le se ke la iketsa baruti kaofela, kaha lea tseba hore rōna re tla ahlōloa haboima ho feta. ₂Bohle re oela liphosong hangata. Haeba e mong a sa fose ka lipuo tsa hae, eo ke motho ea phethehileng, ea tsebang ho itšoara bothong bohle ba hae.

₃Ha re kenya litōmo ka melomong ea lipere, rea be re etsa hore li tle li re mamele, 'me re li tsamaise kamoo re ratang kateng. ₄Hape bonang le likepe: Le hoja li le kholo haholo, 'me li sututsoa ke lifefo tse matla, empa li tsamaisoa ka lesokoana le lenyenyane, li ee moo mosoki a ratang hore li ee teng. ₅Le leleme le joalo. Le hoja e le setho se senyenyane, empa le ka ithorisa ka tse kholo.

Bonang kamoo tlhase ea mollo e hotetsang moru o moholo kateng! ₆Leleme le lona ke mollo. Har'a litho tsa rōna, le ka lefatše la bokhopo, hoo le silafatsang botho bohle ba rōna, le hotetse bophelo bohle ba rōna; le hotelitsoe ka mollo oa lihele.

₇Mefuta eohle ea libatana, ea linonyana, ea lihahabi, le ea tse leoatleng, tsohle li ka thapisoa, ebile li thapisitsoe ke bohlale ba motho, ₈empa ha e le leleme, ha ho motho le ea mong ea ka tsebang ho le thapisa. Le khopo hoo le ke keng la laoloa, le tletse mahlōkō a bolaeang.

₉Ka leleme re rorisa Morena, Ntat'a rōna, 'me ka lona re bile re rōhaka batho bao e leng setšoantšo sa Molimo. ₁₀Molomong o le mong ho tsoa thoriso le thōhako. Bana beso, ha hoa lokela ho ba joalo. ₁₁Na mohloling o le mong oa seliba ho ke ho kolle metsi a monate le metsi a babang? ₁₂Bana beso, na feiee e ka beha litholoana tsa mohloaare, kapa morara tsa feiee? Ka mokhoa o joalo, ha ho seliba se ka kollang metsi a letsoai le metsi a monate.

₁₃Ke mang har'a lōna, ea bohlale, ea nang le tsebo? Ka boitšoaro ba hae bo botle, a ke a bontše hore mesebetsi ea hae e etsoa ka boikokobetso bo lumellanang le bohlale. ₁₄Empa haeba ka lipelong tsa lōna le na le lefufa le lebe le moea oa likhang, le se ke la ithorisa, la senya 'nete ka ho bua leshano. ₁₅Bohlale bo joalo hase bo tsoang holimo, ke ba lefatše, ba botho, ba bodemona. ₁₆Moo lefufa le likhang li leng teng, ho na le meferefere le mesebetsi e khopo.

₁₇Empa bohlale bo tsoang holimo, pele ho tsohle, bo hloekile; hape bo na le khotso le mosa, bo bonolo, bo tletse lereko le litholoana tse molemo; ha bo na leeme, ha bo iketsise. ₁₈Litholoana tsa ho loka li jaloa ka khotso ke ba etsang khotso.