ESAEA 9

₂Sechaba se neng se phela lefifing,

se bone leseli le leholo;

se neng se phela lefifing

le letšo-letšo,

joale se chabetsoe ke leseli.

₃U atisitse sechaba,

thabo ea sona ua e eketsa,

sa thaba pontšeng ea hao,

joalokaha batho ba thabela kotulo,

ba thabela ho arolelana khapo.

₄Joko e neng e se imela,

le molamu

o neng o le mahetleng a sona,

le thupa ea mohlorisi oa sona,

tsena u li robile

sa mohla u hlōlang Bamede.

₅Seeta sa mohlabani ka mong,

seaparo ka seng

se sulubantsoeng maling,

tsena li tla akheloa mollong,

li chesoe.

₆Rōna re tsoaletsoe Ngoana,

rōna re filoe Mora,

puso e tla ba mahetleng a hae,

o tla bitsoa

Ralimakatso le Moeletsi,

Molimo ea matla, Rabosafeleng,

Khosana ea Khotso.

₇O tla hōlisa 'muso oa hae,

o be le khotso e sa feleng;

o tla busa

a le teroneng ea Davida,

a okamele 'muso oa hae,

a o tsitsise,

a o tšehetse ka toka

le ka ho loka kamehla le mehla.

Cheseho ea Moren'a mabōtho

e tla phethahatsa hona.

₈Morena o rōmetse molaetsa,

a o rōmela ho Jakobo,

molaetsa oo

o tobile chaba sa Iseraele.

₉Chaba sohle se tla o tseba,

ba morabe oa Efraime

le baahi ba Samaria,

bona ba buang ka boikhantšo,

le ka boikhōhōmōso, ba re:

₁₀“Lerako la litene le helehile,

re tla le tsosa

ka majoe a betliloeng;

fate tsa feiee li se li remiloe,

bakeng sa tsona

re tla lema likedare.”

₁₁Morena o matlafalitse

lira tsa Resine ho mo loantša,

a li hlohleletsa

hore li mo tsohele matla.

₁₂Baarame ba tsoang bochabela,

le Bafilesita

ba tsoang bophirimela,

ba koentse Baiseraele bokoilitane:

Leha ho le joalo

khalefo ea hae ha ea kokobela,

tsoho la hae

o nts'a le phahamisitse.

₁₃Chaba ha sea khutlela

ho ea se otlileng,

leha e le ho batla

Moren'a mabōtho.

₁₄Ka tsatsi le le leng

Morena o tla khaola,

a khaole hlooho ea Iseraele

le mohatla oa eona,

a khaole lekala,

a khaole le lehlaka.

₁₅Baholo le bahlomphehi

ke eona hlooho,

moporofeta oa bohata

ke oona mohatla.

₁₆Baetapele ba chaba sena

baa se khelosa,

ebe ba tsamaisoang

bona baa timela.

₁₇Kahoo Morena ha a sa tla thabela

bacha ba bona,

likhutsana le bahlolohali

ha a sa ba utloela bohlōkō,

hobane bohle ba khopo,

ke baetsalibe.

Molomo oa e mong le e mong

oa nyefola,

leha ho le joalo

khalefo ea hae ha ea kokobela,

tsoho la hae

o nts'a le phahamisitse.

₁₈Ruri bokhopo bo tuka sa mollo,

bo chesa hlabahlabane le meutloa,

bo hotetsa le meru e teteaneng,

mosi o fōqōhe, o lebe holimo.

₁₉Khalefo ea Moren'a mabōtho

e chesa lefatše,

chaba e be libeso

tse fepelang mollo;

ha ho ea tla qenehela ngoan'abo.

₂₀Ba ja tse ka tsohong le letona,

empa ha ba ke be ba khōre,

ba je tse ka ho le letšehali,

le teng ba se ke be ba khotsofale,

motho ka mong

a je nama ea tsoho la hae.

₂₁Ba morabe oa Manase

ba tla ja ba oa Efraime,

ba Efraime

ba je ba morabe oa Manase,

bobeli ba merabe ena

bo je morabe oa Juda;

leha ho le joalo

khalefo ea hae ha ea kokobela,

tsoho la hae

o nts'a le phahamisitse.