ESAEA 47

₁“Theoha teroneng,

u lule lerōleng,

Uena moroetsana,

morali oa Babilona;

itulele fatše,

u theotsoe teroneng,

uena morali oa Bakalatiea.

Ha u sa tla bitsoa ea bonojoana,

ea bokotsoang.

₂Nka leloala, u sile phofo,

lesira la hao lona u le rōle.

Nyolla mese ea hao,

litlhafu li hlahe,

ebe joale u tseba ho tšela linōka.

₃Bofeela ba hao bo tla pepeseha,

lihlong tsa hao li se ke tsa pateha.

Ke tla iphetetsa,

ha ke na ho qenehela motho.”

₄Molopolli oa rōna

bitso la hae ke Moren'a mabōtho,

ke Ea Halalelang oa Iseraele.

₅“Lula u khutsitse,

u kene har'a lefifi,

uena morali oa Bakalatiea,

ha u sa tla bitsoa

mofumahali oa mebuso.

₆“Ke ne ke halefetse sechaba sa ka,

ka hlompholla lefa la ka;

ka neelana ka sona

matsohong a hao,

'me uena ua se hlokela mohau.

Esita le maqheku ao e s'e le mobu,

ua a belesa joko e boimahali.

₇“Eaba uena u re:

‘Ke tla 'ne ke be mofumahali,

ke be eena kamehla eohle!’

Empa tsena ha ua k'a li nahana,

kapa ua hopola pheletso ea tsona.

₈“Joale mamela,

uena ea ratang boithabiso,

uena ea iphelelang a sa natse letho,

uena ea ntseng a ithetsa, ka ho re:

‘Ho re 'na feela,

ha ho poho-peli ntle ho 'na!

Nke ke be ka ba mohlolohali

le khale,

le ho shoeloa ke bana

nke ke ka ho tseba!’

₉Empa tsena tse peli

li tla u khaoletsa,

ka ho panya ha ntši,

ka tsatsi le le leng:

Ho shoeloa ke bana

le ho ba mohlolohali.

Li tla u oela holimo

ka matla a maholo,

li sa re letho ka boloi ba hao,

li sa re letho ka boreba ba hao.

₁₀“U ile ua tšepa bokhopo ba hao,

ua ba ua re: ‘Ha ho ea mponang!’

Ua khelosoa ke bohlale

le tsebo ea hao,

ka pelong ea hao ua ithetsa, ua re:

‘Ho re 'na feela,

ha ho poho-peli ntle ho 'na!’

₁₁Kahoo u tla oeloa

ke koluoa holimo,

ha u na ho tseba le ho e upa;

u tla oeloa ke bomalimabe holimo,

u ke ke ua tseba

ho bo qhelela thōko;

timelo le eona e tla u oela holimo,

u e tsometse u sa ka ua tseba.

₁₂“Itsoelle pele ka boreba ba hao,

le ka boloi ba hao bo se nang palo,

boo esale u bo emella

ho tloha bocheng ba hao!

Mohlomong

bo tla u tlisetsa katleho,

mohlomong

ka bona u tšose lira tsa hao!

₁₃U ikhathalitse feela

ka keletso tse ngata-ngata!

Joale bitsa balepi ba hao,

balepi ba hao ba linaleli,

linohe tse u senolelang liketsahalo,

tsa khoeli le khoeli,

li ke li u pholose

ho tsena tse u tlelang.

₁₄“Ha e le bona,

ba tla tšoana le lirite feela,

mollo o tla ba chesa, ba chelle lore!

Ba ke ke ba ipholosa

khanareng ea malakabe,

ana hase mashala

a ka futhumetsang motho,

ona hase mollo

o ka oroang ke motho.

₁₅Ke sona feela

seo ba ka u etsetsang sona,

bana bao u sebelitseng le bona,

bao esale u hoeba le bona

ho tloha bocheng ba hao.

E mong le e mong

o ikela ka tsela ea hae,

ha ho le ea mong oa bona

ea ka u pholosang.”