Molimo o tla ahlōla lira tsa hae
1Lōna lichaba tsohle
atamelang, le mamele,
lōna merabe sekehang tsebe!
Lefatše le tsohle tse ho lona
le tsohle tse tsoang ho lona,
le ke le mamele!
2Morena o halefetse lichaba tsohle,
khalefo ea hae
e holim'a mabōtho 'ohle a tsona;
o li timelitse kaofela ha tsona,
o neelane ka tsona hore li bolaoe.
3Ba bolailoeng
ba tla lahleloa kantle,
tōpōng tsa bona
ho tsoe bolu se nkhang phu!
Thaba li be li thèllè,
li thèllè ke mali a bona.
4Naleli tsohle tsa leholimo
li tla nyamela,
maholimo a phuthoe
sa ha ho phuthoa lengolo;
naleli tsohle li tla oela fatše,
li oe sa mahaba a morara.
sa mahaba a omeletse,
sa feiee ha e hlōhlōreha sefateng.
5Sabole ea Morena
e tsoa leholimong,
bonang ke eo e theoha
ho ahlōla Edomo,
chaba seo a rerileng
ho se timetsa.
6Sabole ea Morena
e khanathetse mali,
mafura e a jele
sa mpana-phatloha;
e khanathetse mali
a likonyana le a lipoli,
e khanathetse mafura
a liphieo tsa lipheleu.
Morena o tla etsa sehlabelo,
a se etse a le Bosera,
Baedomo a ba bolaee,
a ba etse mofela.
7Linare li tla bolaoa,
li bolaoe 'moho le bona,
ho bolaoe le lipohoana
le poho tsa liqhashōla.
Naha ea bona
e tla ba qhafutso ea mali,
mobu oa bona
o tšoetšoethe mafura.
8Morena o khethile letsatsi
la ho phetetsa,
le selemo sa ho lefeletsa Sione.
9Metsi a nōka tsa Edomo
a tla fetoha bōka,
mobu oa eona o fetohe sebabole,
naha e fetohe bōka
bo tukang malakabe!
10E ke ke ea tingoa
motšeare le bosiu,
mosi oa eona
o tla fōqōha kamehla eohle.
Naha e tla ba nanaola
ka mengoaha eohle,
ha ho ea sa tla feta har'a eona.
11Morubisi le sephōōkoana
li tla hahela ho eona,
makhohlo le lekhoaba
li etse lihlaha ho eona.
Molimo o tla e fetola letsoatlare,
e be feela,
e hloke sebopeho joaloka pele,
pele ho tlholeho ea lintho.
12Ha ho khosi e tla busa naha eo,
mahosana 'ohle a eona
a tla fetoha lefeela.
13Matlo a bokhosi
a tla mela meutloa,
qhobosheane le melelle bobatsi
le hlabahlabane.
Naha eo e tla fetoha
hae la liphokojoe,
e be moo limpshe li phelang teng.
14Batana tsa naha
li tla kopana le makanyane,
matsa a bitsane
ka ho etsa lemèèmèè;
phoofolo tsa bosiu li tla itlela moo,
li itlele moo
ho batla baka sa ho phomola.
15Makhohlo o tla haha sehlaha teng,
a bèhèlè a be a qhotse,
malinyane a a sireletse
ka mapheo a hae;
matlaka le 'ona
a tla khōbōkanela moo,
le letona ka leng
le be le sethole sa lona.
16Fuputsa bukeng ea Morena,
u bale:
Ha ho le e 'ngoe ea tsona
e tla ba sieo,
ha ho le e 'ngoe ea tsona
e tla hloka molekane.
Ke molomo oa Morena
o entseng taelo,
ke Moea oa hae o tla li bokella.
17Morena o li abetse naha ka lōtho,
ka tsoho la hae o li fa ka ho lekana,
li tla rua naha eo kamehla eohle,
melōko ea tsona e phele ho eona
ka ho hlahlamana.
