Molimo o tla otla Egepeta
1Bona ke boporofeta malebana le Egepeta:
Bonang Morena o tla Egepeta,
o tla a kaletse leru le potlakileng,
melimo ea bohata ea Egepeta
e thōthōmela pel'a hae,
Baegepeta le bona
ba tlaloa ke tšabo.
2“Ke tla qabanya
Moegepeta le Moegepeta,
ngoan'abo motho
a loantšane le ngoan'abo,
motho a loantšane
le ea ahisaneng le eena,
motse o futuhele motse,
'muso a futuhele o mong.
3Baegepeta
ba tla lahleheloa ke tšepo,
merero ea bona ke e nyōpise.
Ba tla ipiletsa
ho melimo ea bohata le ho linōhe.
ba ipiletse
ho mathuela le ho baloi.
Matsohong a 'musi ea lōnya,
4ke tla neelana ka Baegepeta,
ba busoe ke khosi e sehlōhō,”
ho rialo Morena, Moren'a mabōtho.
5Metsi a ka nōkeng ea Nile
a tla fela,
nōka eo e pshe, e omelle,
6melapo ea eona e nkhe, e re phu!
melatsoana ea eona
le eona e pshe, e omelle.
Hlaka la eona le loli li tla pona,
7le lijalo tsohle
tse mabōpong a nōka eo,
le tse metseng
moo e kenang leoatleng.
Masimo 'ohle a mabōpong
a nōka eo a tla omella,
moea o fefole mobu
ho sale ho se na letho.
8Batšoasi ba litlhapi ba tla lla,
le bohle ba akhelang lilope
nōkeng ea Nile, ba lle,
le bona ba akhelang
matlōoa metsing ba tlalloe.
9Ba ohlang motsitla
ba tla felloa ke tšepo,
balōhi ba masela a lene ba tepelle;
10bao e leng tšiea tsa naha
ba tla ripitloa,
ba sebeletsang moputso
ba nyahame lipelo.
11Mahosana a Sōoane ke lithoto,
keletso tsa bahlalefi ba Faro
ke tsa bothoto;
ba ka rialo joang ho Faro, ba re:
“Re bara ba ba bohlale,
tlōhōlō tsa khosi tsa boholo-holo?”
12Joale ba kae bahlalefi ba hao?
A ba u tsebise, ba u phatlalletse
seo Moren'a mabōtho
a se reretseng Egepeta.
13Mahosana a Soōane a thotofetse,
mahosana a Nofe a thetsehile,
bao e leng tšiea tsa sechaba
ba khelositse Egepeta.
14Morena o ba kentse moea,
moea oa pherekano,
Egepeta e thekesela
ho tsohle tseo e li etsang,
joalokaha letahoa
le thellisoa ke mahlatsa a lona.
15Ea ka thusang Egepeta ha a eo,
e ka ba hlooho kapa mohatla,
kala la palema kapa lehlaka.
Egepeta e tla khumamela Morena
16Mohl'a tsatsi leo, Baegepeta e tla ka basali. Ba tla tlakasela ke ho tšaba letsoho leo Morena oa mabōtho a ba phahamiselitseng lona. 17Ba naha ea Juda ba tla tšosa Egepeta. E mong le e mong ha a utloa tsa naha ea Juda o tla tšoha ka baka la seo Morena oa mabōtho a se reretseng Egepeta.
18Mohl'a tsatsi leo, metseng e mehlano ea naha ea Egepeta, batho ba tla bua puo ea Bakanana, ba hlapanye ka lebitso la Morena oa mabōtho. O mong oa metse eo tla bitsoa Motse oa Timelo.
19Mohl'a tsatsi leo, kahar'a naha ea Egepeta ho tla ba le aletare ea Morena, 'me moeling oa eona ho be le sefika sa Morena. 20Tsena e tla ba pontšo le bopaki ho Morena oa mabōtho naheng ea Egepeta. Etlare ha ba ipiletsa ho Morena ka baka la bahatelli ba bona, a rōmele mopholosi ho ba sireletsa le ho ba lopolla. 21Morena o tla etsa hore Baegepeta ba mo tsebe, 'me mohl'a tsatsi leo, ba tla lumela hore ke eena Morena, ba mo khumamele ka ho mo etsetsa mahlabelo, le ka ho mo nyehella ka nyehelo ea lijo. Ba tla mo etsetsa likano, 'me ba li phethe. 22Morena o tla otla Baegepeta; o tla ba otla, a be a ba folise, 'me ba sokolohele ho eena. Eena o tla utloa thapelo tsa bona, a ba folise.
23Mohlang oo, ho tla ba le 'mila o tsoang Egepeta, o eang Asiria. Moasiria o tla ea Egepeta, Moegepeta a ee Asiria, 'me Baegepeta ba rapele hammoho le Baasiria.
24Mohlang oo, Iseraele e tla ba ea boraro kamora' Egepeta le Asiria, 'me lefatše lohle le tla hlohonolofala ka baka la eona. 25Morena oa mabōtho o tla li hlohonolofatsa, a re: “Sechaba sa ka sa Egepeta se ke se hlohonolofale, le Asiria e leng mosebetsi oa matsoho a ka, le Iseraele eo e leng lefa la ka.”
