Molimo o tla otla Damaseka le Iseraele
1Bona ke boporofeta malebana le Damaseka:
“Damaseka ha e sa tla hlola
e e-ba motse,
Damaseka e tla ba qubu
ea masupi feela.
2Metse ea Arōoere e tla hloka baahi,
e tla fetoha metebo,
mehlape e fule teng,
ho se motho ea tla e tšoenya.
3Motse o hahelelitsoeng
o tla ba sieo Efraime,
le oona 'muso oa Damaseka
o tla fela,
masalla a Arame a tla fela
sa tlōtla ea Iseraele,”
ho rialo Morena oa mabōtho.
4“Mohl'a tsatsi leo,
tlōtla ea Jakobo e tla fifala,
monono oa hae le oona o fele.
5Ho tla tšoana le ha moheli
a hela koro,
a kotula koro ka liatla tsa hae;
ho tšoane le ha motho
a khoahlapisa qoapi tsa koro,
a li khoahlapisa
ka khohlong ea Refaime.
6Empa tholoana tse ling tsona
li tla sala,
joalokaha ho hlòhlòroa
sefate sa mohloaare,
ho salang tse peli kapa tse tharo,
makaleng a holimo,
ho sale tse 'ne kapa tse hlano,
makaleng a behang,”
ho rialo Morena, Molimo oa Iseraele.
7Mohl'a tsatsi leo,
motho o tla sheba 'Mōpi oa hae,
mahlo a motho a shebe
Ea Halalelang oa Iseraele.
8A ke ke a sheba lialetare
tse entsoeng ke matsoho a hae.
A ke ke a sheba
tse etselitsoeng
tšoantšo tsa Ashera,
le aletare tsa mokubetso
tse entsoeng ke matsoho a hae.
9Mohl'a tsatsi leo, metse ea hae ea liqhobosheane eo a e furaletseng ka baka la ho baleha bana ba Iseraele, e tla tšoana le lithako tse merung kapa tse tlhorong tsa lithaba. Naha eohle e tla sala e le nanaōla.
10U lebetse Molimo,
Mopholosi oa hao,
ha ua hopola Lefika,
qhoboshane ea hao,
kahoo leha u ka lema
lifate tse ntle-ntle,
ua lema le morara
o tsoang mafatšeng a mang;
11leha o ka mela mohla u o hlomileng,
ka la hosasane oa tsoha o fupulitse,
kotulo eona e ke ke ea e-ba teng
mohl'a tsatsi la mafu
a ke keng a phekoloa.
Mabōtho a lira a a hlōloa
12Utloang molumo
oa matšoele a lichaba!
A luma sa leoatle le tsulubutlana!
Bonang kamoo
chaba li khōrōhang kateng!
Li khōrōha
sa maqhubu a phuthumana!
13Chaba li tla khōrōha
sa metsi a le mangata,
empa ha Molimo a li khalema
lia baleha,
li fefoloa ke moea
sa 'mōkō holim'a lithaba,
joalokaha mahlokoa
a fefoloa ke sefefo.
14Mantsiboea
li bakela bohle matsoalo,
le e-s'o chabe
tsona li se li nyametse!
Ena ke eona kabelo
ea ba hapang tsa rōna,
ke eona kabelo
ea ba senyang tsa rōna.
