Bathōpuoa baa khutla
1Morena o tla hauhela Jakobo,
a boele a ikhethele Baiseraele,
a ba ahise naheng ea bona;
balichaba ba tla aha le bona,
ba khomarele ntlo ea Jakobo.
2Chaba li tla felehetsa Baiseraele,
li ba felehetse
ho ea naheng ea bona;
Baiseraele ba tla okamela lichaba,
ba li etse bahlanka
naheng ea Morena
ba li etse makhabunyane
naheng ea Morena.
Ba tla thōpa bathōpi ba bona,
ba buse bahatelli ba bona.
Khosi ea Babilona e s'e le boea-batho
3Mohla Morena a le phomolitseng litsietsing, le moferefereng le bokhobeng bo sehlōhō, 4le tle le bine pina ena e somang khosi ea Babilona:
“Bonang kamoo mohatelli
a oeleng kateng!
Bonang kamoo khalefo ea hae
e felileng kateng!
5Morena o robile
molamu oa ea khopo,
lere la puso la babusi o le robile
6lona le otlileng lichaba
ka khalefo, le sa khaotse,
la li kokobetsa
ka khalefo le ka mabifi a sa feleng.
7“Fatše lohle le phomotse,
le na le khotso,
bohle ba tsanyaola lipina ka thabo.
8Fate tsa molutu
le kedare tsa Lebanone,
li thabetse ho oa ha hao,
li re: ‘Ha e le mona
u se u kokobelitsoe,
ha ho ea sa tla nyoloha,
a nyolohele thabeng ho re rema.’
9“Qalo ea Bafu e etsa mokutu
ho u khahlanyetsa,
e tsosa bafu ho u lumelisa,
bohle ba bao
e neng e le babusi lefatšeng;
bohle bao
e neng e le likhosi tsa lichaba,
e ba emisa literoneng tsa bona.
10Bohle ba tla bua, ba re ho uena:
‘Athe le uena
u nts'u hloka matla joaloka rōna,
kajeno u s'u tšoana le rōna!’
11Botlotlehi ba hao
bo theohetse lebitleng,
bo theohetse 'moho le meloli
ea katara tsa hao;
tšenyane e fetohile moalo oa hao,
libōkō li fetohile kobo ea hao.
12“U theohile hakaakang leholimong,
uena Mphatlalatsane,
naleli ea meso!
U lihetsoe lefatšeng,
uena ea kileng
a kokobetsa lichaba!”
13U ile ua bua ka pelo, ua re:
“Ke tla nyolohela leholimong,
ke phahamise terone ea ka,
ke e phahamisetse kaholimo
ho linaleli tsa Molimo,
ke bee terone ea ka thabeng
eo ho phutheheloang ho eona,
ke e bee tlhōrōng e phahameng
ea thaba e ka leboea.
14Ke tla hloella kaholimo ho maru,
ke itekanye
le Ea Phahametseng tsohle.”
15Empa uena
u lihetsoe tlase lebitleng,
u lihetsoe tlase
botebong ba mohohlo.
16“Ba u bonang ba tla u makalla,
ba u talimisise hantle, ba re:
‘Na eo ke eena monna
ea ileng a sisinya lefatše,
ea neng a etsa
hore mebuso e thōthōmele;
17eena monna ea ileng
a fetola lefatše nahathothe,
eena ea ileng
a timetsa metse ea lona,
eena ea sa kang
a lumella bathōpuoa,
ho khutlela ha habo bona?’
18Khosi tsa lichaba tsohle
li phomotse,
li phomotse ka hlompho
ka mabitleng a tsona;
19empa uena u lahletsoe kantle
ho lebitla la hao,
ua lahleloa kantle
sa lekala le nyatseha,
tōpō tsa babolauoa
li entse setha holim'a hao,
bona ba ileng
ba bolaoa ka sabole,
bona ba ileng
ba theoleloa mohohlong o majoe,
ba theoleloa joaloka setōpō
se hataketsoe ka maoto.
20U ke ke be ua epeloa
joaloka khosi tsa chaba tse ling,
hobane u sentse naha ea hao,
ua bolaea chaba sa heno.
Tlōhōlō tsa ba khopo
ha li sa tla hopoloa.
21Lokisang sebaka
sa ho bolaela bara ba hae,
ka baka la libe tsa bo-ntat'a bona
esere ba tsoha,
naha ena ba e ja lefa,
ba haha metse ea tlala lefatše.”
Molimo o tla timetsa Babilona
22“Ke tla ema ke ba futuhele,”
ho rialo Morena oa mabōtho;
“ke tla timetsa bitso la Babilona
le masalla a eona,
ke timetse bana ba eona
le litlōhōlō tsa eona,”
ho rialo Morena.
23“Babilona e tla ba hae,
habo linōkō,
e fetohe naha ea mekhoabo;
ke tla e felisa
ka lefielo la timetso,”
ho rialo Morena oa mabōtho.
Molimo o tla timetsa Baasiria
24Morena oa mabōtho o hlapantse,
a re: “Joalokaha ke hopotse,
ho tla ba joalo;
joalokaha ke rerile,
ho tla phethahala.
25Ke tla phetšela Baasiria
naheng ea ka,
lithabeng tsa ka ke ba hatakele;
joko ea bona ke tla e tlosa
holim'a chaba sa ka,
mojaro oa bona ke o tlose
mahetleng a sona.
26Morero ona
ke o etselitsoeng lefatše lohle,
lena ke letsoho
le phahamiselitsoeng
lichaba tsohle.”
27Morena oa mabōtho o s'a rerile;
ebe ke mang ea ka thibelang?
Letsoho la hae le se le phahame;
ke mang ea ka le khutlisang?
Molimo o tla timetsa Bafilesita
28Bona ke boporofeta bo ileng ba boleloa ka selemo seo khosi Akase a ileng a shoa ka sona:
29Se nyakalleng
lōna Bafilesita bohle,
la re molamu o neng o le otla
o robehile,
hoba lelōkong la nōha eo
ho tla tsoaloa qōoane,
eona e tsoale khanyapa
e fofang ka setsokotsane.
30Ba futsanehileng haholo
ba tla khōra,
bahloki ba tla lula ba pholohile,
litlōhōlō tsa hao tsona
li shoe ke tlala,
masalla a hao le 'ona e a bolaee.
31Bokolla uena monyako!
Meketsa uena motse!
Lōna bohle ba Filesitiea
thōthōmelang!
Mosi o kang leru
o fōqōha o e-tsoa lebōea,
har'a mabōtho a hae
ha ho ea tla salla.
32Ho tla thoe'ng
ha ho arajoa maqosa a naha eo?
“Morena o tsitsisitse Sione,
bahlophehi ba chaba sa hae
ba tla tšabela teng.”
