1Mehleng ea puso ea Usiea, le Jotame, le Akase, le Hesekiea, likhosi tsa Juda, le mehleng ea puso ea Jeroboame, mora oa Jehōoashe, khosi ea Iseraele, lentsoe la Morena la fihla ho Hosea, mora oa Beeri.
Mosali oa Hosea le bana ba hae
2Ha Morena a qala ho bua le Hosea a na a re ho eena:
“Tsamaea, u e'o nyala,
u nyale mosali oa seotsoa,
u inkele le bana,
bana ba bootsoa ba hae,
hobane lefatše le furaletse Morena,
la mo furalla
ka ho hloka botšepehi.”
3Eaba Hosea oa ea, o nyala Gomere, morali oa Dibelaime; eena a emola, 'me a mo tsoalla mora.
4Joale Morena a re ho Hosea:
“Mo ree lebitso la Jesereele,
hoba haufinyane
ntlo ea Jehu ke tla e otla,
ke e otle,
ke phetetse mali a Jesereele,
bokhosi ba Baiseraele ke bo felise.
5Mohlang oo seqha sa Iseraele
ke tla se roba,
ke se robele khohlong ea Jesereele.”
6Gomere a boela a emola, 'me a beleha ngoana oa ngoanana. Morena a re ho Hosea:
“Eena u mo ree
lebitso la Mohanuoa,
hoba ke tla hana
ho hauhela Baiseraele,
le ho ba tšoarela
nke ke ka ba tšoarela.
7Empa ke tla hauhela
ba ntlo ea Juda,
'na Morena Molimo oa bona,
ke ba pholose.
Ha nka ke ka ba pholosa
ka seqha kapa sabole,
kapa ka ntoa
kapa lipere kapa bapalami.”
8Ha Gomere a se a khoesitse Mohanuoa, a boela a emola, a tsoala mora e mong. 9Eaba Morena o re:
“Eena u mo ree lebitso la Lebamang,
hoba lōna ha le sechaba sa ka,
le 'na ha ke Molimo oa lōna.”
Baiseraele ba tla khutlisoa
10“Empa Baiseraele
ba tla ngatafala,
ba ngatafale sa lehlabathe la leoatle
le ke keng la methoa
leha e le ho baloa.
Moo ho neng ho thoe ho bona:
‘Lōna ha le sechaba sa ka’,
ho tla thoe:
‘Le bana ba Molimo ea phelang’.
11Bajuda le Baiseraele ba tla kopana,
ba ikhethele mookameli a le mong;
ba hōle, ba atlehe naheng ea bona,
hoba tsatsi la Jesereele
le tla ba leholo!”
