Boprista bo joaloka ba Meleki-Sedeke
1Meleki-Sedeke eo e ne e le khosi ea Salema le moprista oa Molimo ea holimo-limo. Ha Aborahama a khutla ntoeng eo a neng a hlotse likhosi ho eona, Meleki-Sedeke o ile a mo khahlanyetsa, 'me a mo hlohonolofatsa. 2A ba a aroleloa karolo e le 'ngoe ho tse leshome ea khapo eohle ke Aborahama. Lebitso la Meleki-Sedeke ke ho re: “Khosi ea toka”. Hape e ne e le khosi ea Salema, e leng ho re: “Khosi ea khotso”. 3Eena, ea se nang ntat'ae, ea se nang 'm'ae, ea se nang lelōko, ea se nang leha e le qalo ea litšiu tsa bophelo ba hae leha e le qetello ea tsona, ea tšoanang le Mora oa Molimo, o sala e le moprista ka ho sa feleng.
4Lemohang boholo ba motho eo moholo-holo oa rōna Aborahama a ileng a mo nea karolo e le 'ngoe ho tse leshome, e leng tsa bohlokoa tse hapiloeng. 5Joale, har'a litlōhōlō tsa Levi, ba amohelang boprista ba laeloa ke Molao ho nka karolo e le 'ngoe ho tse leshome ho sechaba, ke hore ho bana babo bona, leha e le ba tsoileng lethekeng la Aborahama. 6Athe Meleki-Sedeke ea sa baloeng melōkong ea bona, o ile a nka karolo e le 'ngoe ho tse leshome ho Aborahama, 'me a hlohonolofatsa ea neng a etselitsoe litšepiso. 7Ha ho ea ka hanyetsang hore e monyenyane o ee a hlohonolofatsoe ke e moholo. 8Hape ha e le baprista bao ba nkang karolo e le 'ngoe ho tse leshome, ke batho ba shoang; athe, ha e le Meleki-Sedeke, ke ea pakiloeng hore oa phela. 9Ho ka thoe esita le Levi ea nkang karolo e le 'ngoe ho tse leshome o ne a e ntšisitsoe ka Aborahama, 10hobane o ne a sa le lethekeng la moholo-holo oa hae, mohla Meleki-Sedeke a mo khahlanyetsang.
11Sechaba sa Iseraele se ile sa amohela Molao tlas'a boprista ba Levi. Joale, hoja boprista boo e ne e le bo phethehileng, na ho ne ho sa ntse ho hlokahala hore ho hlahe moprista e mong, eo e leng eena joaloka Meleki-Sedeke, e seng joaloka Arone? 12Ha boprista bo fetoha, molao le oona eka khona o fetohe. 13Joale eo ho buuoang ka eena tabeng tsena ke oa lelōko lesele, leo ho seng setho le se seng sa lona se kileng sa sebeletsa aletareng. 14Efela ho tsejoa hantle hore Morena oa rōna o tsoile lelōkong la Juda, leo Moshe a sa kang a bolela letho ka lona, ha a bua ka tsa boprista. 15Hona ho tōtōbetse le ho feta, ha moprista e mong ea hlahang a tšoana le Meleki-Sedeke, 16ea sa kang a beoa ka mokhoa o lumellanang le melao le meetlo ea botho, empa ea beiloeng ka matla a bophelo bo ke keng ba felisoa, 17hobane ho pakiloe ka eena, ha thoe:
“U moprista ka ho sa feleng
joaloka Meleki-Sedeke.”
18Ka nq'e 'ngoe Molao oa pele o ile oa felisoa ka baka la ho fokola le ho hloka thuso ha oona, 19hobane ha ho letho leo Molao oo o neng o ka etsa hore le phethehe. Empa ka nq'e 'ngoe ho ile ha tlisoa tšepo e fetisang ka molemo, eo re ka atamelang pel'a Molimo ka eona.
20Ha e le hoo, ho entsoe ka kano; athe ba bang e bile baprista kantle ho kano. 21Jesu eena o etselitsoe kano ke ea itseng ka eena:
“Morena o ikanne,
'me ha a ka ke a koeneha:
‘U moprista ka ho sa feleng.’ ”
22Ka baka leo, Jesu e bile motiisi oa selekane se molemo ka ho fetisa.
23Hape ba bang ba bangata e 'nile ea e-ba baprista, hobane ba ne ba e-shoa, 'me ba sitoa ho tsoela pele bopristeng. 24Empa boprista ba Jesu ke bo se nang bofelo, hobane eena o teng kamehla le mehla. 25Ka hona o na le matla a ho pholosa ka ho tlala bohle ba tlang ho Molimo ka eena, kaha a phela kamehla ho ba buella.
26Re lokeloa ke Moprista e Moholo ea joalo, ea halalelang, ea se nang bobe leha e le sekoli, ea sa amaneng le baetsalibe, ea phahamiselitsoeng kaholimo ho maholimo. 27O ne a se joaloka Baprista ba bang ba Baholo, ba neng ba hloka ho nyehela ka mahlabelo ka matsatsi 'ohle, pele e le ka baka la libe tsa bona, e ntan'o ba tsa sechaba. Jesu o ile a nyehela ka sehlabelo se le seng, hanngoe feela, ha a inyehela ka boeena. 28Molao oa Moshe o beile batho ba nang le mefokolo hore e be Baprista ba Baholo; athe mantsoe a kano, a builoeng kamorao ho Molao oa Moshe, a beile Mora ea phethehileng ka ho sa feleng.
