1Kaha re sietsoe tšepiso ea ho kena phomolong ea hae, a re tšabeng, esere e mong oa lōna a fumanoa a sitiloe ho kena. 2Re boleletsoe molaetsa o molemo joaloka bona, empa lentsoe leo ba le rutiloeng ha lea ba tsoela molemo, hobane ba le utloileng ha lea ka la ba lomosa tumelong. 3Rōna ba lumetseng re fela re kena phomolong, joalokaha a itse:
“Eaba ke hlapanya ke halefile,
ke re:
‘Ba ke ke ba ba ba kena,
ba kena phomolong ea ka.’ ”
A rialo le hoja mesebetsi ea hae e ne e phethahale ho tloha tlholehong ea lefatše, 4hobane ha ho buuoa ka letsatsi la bosupa ho itsoe: “Ka letsatsi la bosupa Molimo a phomola mesebetsing eohle ea hae.” 5Hape ha thoe: “Ba ke ke ba ba ba kena phomolong ea ka le ka mohla.”
6Kaha ba neng ba bolelloe molaetsa o molemo pele, ba sa ka ba kena phomolong ea hae ka baka la ho se lumele, ho sa na le ba bang ba tla kena. 7Ka hona Molimo o boetse o khethile letsatsi le leng, leo a reng ke: “Kajeno”. Ha ho se ho fetile lilemo tse ngata, 'me a bua ka molomo oa Davida, o sebelisa mantsoe a seng a boletsoe, o re:
“Kajeno ha le utloa lentsoe la hae,
se thatafatseng lipelo tsa lōna.”
8Hoja Joshua o ne a ile a fela a ba phomotsa, hamorao Molimo a ka be a sa ka a bolela letsatsi le leng hape. 9Ha ho le joalo, sechaba sa Molimo se sa saletsoe ke letsatsi la phomolo, 10hobane ea keneng phomolong ea hae le eena o phomotse mesebetsing ea hae, joalokaha Molimo le eena a ne a phomole ho ea hae. 11A re thahaselleng ho kena phomolong eo, esere ka mokhoa o tšoanang le oane, ba bang ba oa, ka ho latela mohlala oa ho se mamele.
12Lentsoe la Molimo lea phela, lea sebetsa. Le bohale ho feta lisabole tsohle tse sehang kamahohle. Le phōhlōtsa ho ea fihla moo bophelo le moea li kopanang teng, manonyeletsong le mokong. Le ahlōla mehopolo le merero ea pelo. 13Ha ho sebōpuoa se ka patehang pel'a hae; tsohle li pepeneneng, li bonahala mahlong a hae, eena eo re tla ikarabella ho eena.
Jesu Moprista e Moholo
14Erekaha re e-na le Moprista e Moholo, ea hlomphehang, ea keneng leholimong, e leng Jesu, Mora oa Molimo, a re boleleng tumelo ea rōna re tiile. 15Moprista oa rōna e Moholo hase ea ka sitoang ho re utloela bohlōkō mefokolong ea rōna, hobane ke ea ileng a lekoa ka litsela tsohle joaloka rōna, empa a se ke a etsa sebe. 16Ka baka leo, a re atameleng ka sebete teroneng ea mohau, re tle re amohele lereko, re fumane le mohau ho re thusa ha re hloka thuso.
