BAHEBERU 11

₁Tumelo ke ho tšepa lintho tse ntseng li lebeletsoe, ke ho kholiseha ka tse e-s'ong ho bonoe. ₂Ke ka baka la eona baholo-holo ba rōna ba ileng ba pakoa.

₃Ka tumelo re utloisisa hore lefatše lohle le bōpiloe ka lentsoe la Molimo, 'me tse bonoang li tsoa ho tse sa bonoeng.

₄Ka tumelo Abele o ile a nyehella Molimo ka sehlabelo se setle ho feta sa Kaine. Ke ka eona a pakiloeng hore o lokile, kaha Molimo a ananetse limpho tsa hae, 'me ka eona Abele o ntse a bua, leha a shoele.

₅Ka tumelo Henoke o ile a nkeloa leholimong, a sa ka a shoa. Ha aa ka a hlola a fumanoa, hobane Molimo a ne a mo nke. Efela, pele a nkoa, o ne a pakiloe hore o khahlisitse Molimo. ₆Joale kantle ho tumelo ha ho kamoo motho a ka khahlisang Molimo kateng. Ea atamelang pel'a Molimo eka khona a lumele hore Molimo o teng, le hore ke eena ea putsang ba 'matlang.

₇Ka tumelo eitse hoba Molimo a mo tsebise tse e-song ho bonoe, Nōoe a ba hlokolosi, 'me a haha areka, hore a tle a pholosoe le ba lelapa la hae. Ka ho lumela ha hae o ile a ahlōla lefatše, a ba a ja lefa la ho loka ho fumanoang ka tumelo.

₈Ka tumelo Aborahama o ile a mamela ha Molimo a 'mitsa, 'me a fallela naheng e tlang ho ba lefa la hae; a tloha a sa tsebe moo a eang teng. ₉Ka tumelo ea e-ba mojaki naheng eo a e tšepisitsoeng. A phela litenteng le Isaka le Jakobo, bao e bileng majalefa a tšepiso e le 'ngoe hammoho le eena. ₁₀O ne a ntse a lebeletse motse o nang le mothèo o tiileng, e leng motse o reriloeng, 'me oa hahoa ke Molimo ka sebele.

₁₁Ka tumelo le eena Sara, eo e neng e le nyōpa, o ile a fuoa matla a ho ba le ngoana, leha a ne a se a tsofetse haholo, hobane o ile a tšepa botšepehi ba ea mo tšepisitseng. ₁₂Ka baka lena monna a le mong, eo e neng e se e le mobu, o ile a tsoala litlōhōlō tse ngata joaloka linaleli tsa leholimo, le joaloka lehlabathe le lebōpong la leoatle, le ke keng la baloa.

₁₃Batho bao kaofela ba ile ba shoela tumelong, ba e-s'o amohele tseo ba neng ba li tšepisitsoe, empa ba li bonetse hōle feela, ba li thabetse, 'me ba ipoletse hore ke baeti le bajaki lefatšeng lena. ₁₄Ba buang joalo ba bontša ka mokhoa o tōtōbetseng hore ba batla naha eo e leng ea habo bona. ₁₅Hoja ba ne ba sa ntse ba hopola naha eo ba neng ba e-tsoa ho eona, ba ka be ba fumane sebaka sa ho khutlela ho eona. ₁₆Empa joale ba labalabela e 'ngoe, e leholimong, e fetang eo ka molemo. Ka baka leo, Molimo ha a lihlong ho bitsoa Molimo oa bona, hobane o ba lokiselitse motse.

₁₇Ka tumelo mohla Aborahama a lekoang, o ile a nyehela ka Isaka. A nyehela ka mora oa hae ea inotši, leha a ne a etselitsoe litšepiso, ₁₈'me ho itsoe ho eena: “Ke litlōhōlō tsa Isaka tse tla bitsoa bana ba hao.” ₁₉O ne a ikholisitse hore Molimo o na le matla, esita le a ho tsosa motho bafung. Kahoo a boela a amohela mora oa hae, joaloka hoja a tsohile bafung.

₂₀Ka tumelo Isaka o ile a hlohonolofaletsa Jakobo le Esau tse tlang ho ba teng.

₂₁Ka tumelo ha Jakobo a le lekhatheng la ho shoa, o ile a hlohonolofatsa bara ba Josefa ka bonngoe, 'me a khumama, a rapela a itšehelitse ka lere la hae.

₂₂Ka tumelo ha Josefa a le lekhatheng la ho shoa, o ile a bua ka ho tsoa ha bana ba Iseraele Egepeta, a ba a fana ka litaelo tse amanang le masapo a hae.

₂₃Ka tumelo eare hoba Moshe a tsoaloe, a patoa likhoeli tse tharo ke batsoali ba hae. Ba 'mona e le ngoana e motle, 'me ha baa ka ba tšosoa ke taelo ea khosi.

₂₄Ka tumelo ha Moshe a se a hōlile, o ile a hana ho bitsoa mora oa morali oa Faro; ₂₅a mpa a ikhethela ho hlekefetsoa le sechaba sa Molimo, ho e-na le ho ithabisa ka sebe ka nakoana. ₂₆A nka sekhobo sa Kreste e le leruo le fetang menono ea Baegepeta, hobane o ne a shebile moputso. ₂₇Ka tumelo a tsoa Egepeta, a sa tšosoe ke khalefo ea khosi; a tiisetsa joaloka hoja a bona ea sa bonoeng. ₂₈Ka tumelo a etsa mokete oa Paseka, 'me a fōka menyako ka mali, e le hore Motimetsi a tle a se ke a ama matsibolo a Baiseraele.

₂₉Ka tumelo Baiseraele ba ile ba tšela Leoatle le Lefubelu, joaloka hoja ba tsamaea mobung o ommeng; athe Baegepeta ba ileng ba leka ho ba etsisa, le ile la ba metsa.

₃₀Ka tumelo marako a neng a sirelelitse Jeriko a ile a heleha, hoba a pota-potoe ka matsatsi a supileng.

₃₁Ka tumelo Rahaba oa seotsoa ha aa ka a timela hammoho le ba sa lumelang, hobane o ne a ile a amohela lihloèla ka khotso.

₃₂Ke tla re'ng hape? Nka haelloa ke sebaka sa ho lokolisa tsa Gideone, Barake, Samosone, Jafeta, Davida, Samuele le baporofeta. ₃₃Ka tumelo batho bao ba ile ba fenya mebuso, ba etsa tse lokileng, ba fumana tseo ba neng ba li tšepisitsoe. Ba bolaea litau, ₃₄ba tima mollo o bohale, ba phonyoha ho bolaoa ka sabole. Ba ne ba fokola, empa ba boela ba matlafala, ba fetoha linatla ntoeng, ba qhala limphi tsa balichaba. ₃₅Basali ba boela ba khutlisetsoa bafu ba bona ba tsohileng bafung. Empa ba bang, e le hore ba tle ba tsohele bophelo bo botle ka ho fetisa, ba ile ba hana ho lokolloa, ba shoela litlhōkōfatsong. ₃₆Ba bang ba ile ba feta har'a litšomo le lichapo, ba kenngoa litlamong le lichankaneng. ₃₇Ba tlepetsoa ka majoe, ba khaoloa 'mele koto tse peli, ba bolaoa ka sabole. Ba ile ba phailaka ba apere matatana, ba futsanehile, ba hlorisitsoe, ba hlekefelitsoe. ₃₈E ne e le batho bao lefatše le sa ba tšoaneleng. Ba ile ba lelera mafeelleng le lithabeng, mahaheng le matsabeng a lefatše.

₃₉Kaofela ha bona, leha ba ile ba pakoa ka baka la tumelo ea bona, ha baa ka ba amohela seo Molimo a neng a ba tšepisitse sona. ₄₀Kaha Molimo a ne a re reretse tse molemo ka ho fetisa, ba ne ba ke ke ba etsoa ba phethehileng, rōna re le sieo.