Jakobo o hlohonolofatsa Efraime le Manase
1Kamora' tsena, e mong e behela Josefa, a re: “Hela! ntat'ao oa kula.” Josefa a tsamaea le bara ba hae ba babeli, Manase le Efraime. 2Eaba ho tsebisoa Jakobo, ho thoe: “Bona, mora oa hao, Josefa, o tlil'o u bona.” Iseraele a itiisa, a lula holim'a liphate.
3Eaba Jakobo o re ho Josefa: “Molimo ea matla 'ohle o ne a iponahatse ho 'na, ha ke le Lōse, naheng ea Kanana, 'me a ntlhohonolofatsa, 4a re ho 'na: ‘Bona, ke tla u fa bana ba bangata, ke ba atise, ke u etse ralichaba-chaba, 'me ke tla nea litlōhōlō tsa hao naha ena, e be leruo la tsona la mehla eohle.’
5“Joale bara ba hao ba babeli, bao u ba tsoaletseng naheng ea Egepeta, pele ke e-tla ho uena mona Egepeta, ke ba ka. Efraime le Manase e tla ba bara ba ka joaloka Rubene le Simeone. 6Empa bana bao u tla ba tsoala kamorao ho bona, e tla ba ba hao, 'me ba tla reelloa ka baholoane ba bona, ba je lefa la bona. 7Hoba 'na ke tlohe Padane, Ragele o ile a shoela matsohong a ka naheng ea Kanana, re le tseleng, haufi le Eferata. Ka mo epela teng, pel'a tsela ea Eferata, e leng Betlelehema.”
8Ha Iseraele a bona bara ba Josefa, a re: “Baa ke bo-mang?”
9Josefa a re ho ntat'ae: “Ke bara ba ka, bao Molimo a mphileng bona ha ke le mona Egepeta.”
Iseraele a re: “Ak'u ba tlise ho 'na, ke ba hlohonolofatse.”
10Mahlo a Iseraele a ne a se a le lerootho ke boqheku, a sitoa ho bona. Josefa a ba tlisa pel'a hae, eaba Iseraele oa ba aka, 'me a ba kopa ka matsoho.
11Iseraele a re ho Josefa: “Ke ne ke sa hopole hore nka hlola ke bona sefahleho sa hao, empa bona, ke mona Molimo o mpontšitse le bona bana ba hao.”
12Eaba Josefa o ba tlosa mangoeleng a ntat'ae, o itihela fatše ka sefahleho. 13Josefa a ba nka bobeli ba bona: Efraime ka letsohong la hae le letona, e leng ka ho le letšehali la Iseraele; Manase ka letsohong la hae le letšehali, e leng ka ho le letona la Iseraele, 'me a ba atametsa pel'a hae. 14Iseraele a otlolla letsoho la hae le letona, a le bea holim'a hlooho ea Efraime, leha e ne e le e monyenyane; a bea le letšehali holim'a hlooho ea Manase, a fapantse matsoho, hobane Manase e ne e le eena letsibolo.
15Eaba o hlohonolofatsa Josefa, o re:
“Molimo ea khahlisitsoeng
ke bo-ntate-moholo,
ke bo-ntate-moholo Aborahama
le Isaka,
ba mo khahlisa
ka metsamao ea bona;
eena Molimo ea ileng a nkalosa,
ho tloha bonyenyaneng ba ka,
a nkalosa ho fihlela kajeno.
16Lengeloi le ntopolotseng
bobeng bohle,
a hlohonolofatse bahlankana bana!
Bitso la ka, le la Aborahama,
le la Isaka,
a ke a tume,
a tumisoe ke bona,
ba ke ba ate,
ebe letšoele naheng ena.”
17Ha Josefa a bona hore ntat'ae o beile letsoho la hae le letona holim'a hlooho ea Efraime, a se ke a thaba. Eaba o tšoara letsoho la ntat'ae, o le tlosa hloohong ea Efraime, o le bea holim'a hlooho ea Manase, 18'me Josefa a re ho ntat'ae: “E seng joalo, ntate, hobane eo e leng letsibolo ke enoa! Bea letsoho la hao le letona holim'a hlooho ea hae.”
19Empa ntat'ae a hana, a re: “Kea tseba, ngoan'a ka, kea tseba; le eena e tla ba sechaba, 'me le eena o tla ba moholo. Le ha ho le joalo, moen'a hae o tla ba moholo ho mo feta, 'me bana ba hae e tla ba lichaba-chaba.” 20Ka lona letsatsi leo a ba hlohonolofatsa, a re:
“Baiseraele ba tla hlohonolofatsana,
ba hlohonolofatsane ka lōna, ba re:
‘Molimo a ke a ba atlehise,
a ba atlehise
joaloka Efraime le Manase.’ ”
Ka mokhoa o joalo a eteletsa Efraime kapele ho Manase.
21Joale Iseraele a re ho Josefa: “Bona, 'na ke se ka tla shoa, empa Molimo o tla ba le lōna, a le khutlisetse naheng ea bo-ntat'a lōna. 22Hape uena, ho fetisa bana beno, ke u nea letsatsa la thaba, leo ke neng ke le hape ho Baamore ka sabole ea ka, le ka seqha sa ka.”
