TŠIMOLOHO 14

₁Mehleng ea Amorafele khosi ea Shinare, le Arioke khosi ea Elasara, le Kedore-Laomere khosi ea Elame, le Tidale khosi ea Goime, ₂likhosi tsena tsa futuhela Bera khosi ea Sodoma, le Biresha khosi ea Gomora, le Shinabe khosi ea Adema, le Shemebere khosi ea Seboime, le khosi ea Bela, e leng Sōoare. ₃Likhosi tsena kaofela tsa kopanya mabōtho, phuleng ea Sidime, e leng Leoatleng la Letsoai. ₄Ka lilemo tse leshome le metso e 'meli li ne li busoa ke Kedore-Laomere, empa ka selemo sa leshome le metso e meraro tsa mo fetohela.

₅Ka selemo sa leshome le metso e mene Kedore-Laomere le likhosi tse neng li ikopantse le eena, a tla, 'me a hlōla Barefaime ba le Ashetarote-Karanaime, le Basusime ba le Hame, le Baemime ba le thoteng ea Kiriataime, ₆le Bahore ba le thabeng ea bona ea Seire, ho ea fihla Ele-Parane, haufi le lehoatata.

₇Joale ba khutla, 'me ba fihla Ene-Mishepate, e leng Kadeshe, ba hapa naha eohle ea Baamaleke, le ea Baamore ba neng ba ahile naheng ea bona Hasesone-Tamare.

₈Ke ha ho futuha khosi ea Sodoma, le khosi ea Gomora, le khosi ea Adema, le khosi ea Seboime, le khosi ea Bela, e leng Sōoare, 'me tsa itokisetsa ntoa ka phuleng ea Sidime; ₉tsa loantša Kedore-Laomere khosi ea Elame, le Tidale khosi ea Goime, le Amorafele khosi ea Shinare, le Arioke khosi ea Elasara; likhosi tse 'ne tsa loantša likhosi tse hlano.

₁₀Phula ena ea Sidime e ne e e-na le likoti tse nang le bōka, 'me eitse ha likhosi tsa Sodoma le Gomora li baleha, tsa oela likoting tsena, 'me bahlabani ba setseng ba balehela thabeng. ₁₁Ba hlōtseng ba hapa maruo 'ohle a Sodoma le Gomora, le lijo tsa bona tsohle, 'me ba ikela. ₁₂Ba hapa le Lota, mora oa moen'a Aborame, ea neng a ahile Sodoma, 'moho le thepa eohle ea hae.

₁₃Eaba ho fihla selahla-marungoana, 'me sa tsebisa Aborame oa Moheberu litaba. Aborame o ne a ahile lifateng tsa eike tsa Mamore oa Moamore, ngoan'abo Eshekole le Anere, ba neng ba entse selekane le Aborame. ₁₄Ha Aborame a utloa hore mora oa moen'a hae o hapiloe, a phalla le banna ba hae ba hlometseng ba makholo a mararo le leshome le metso e robeli, ba tsoaletsoeng tlung ea hae, 'me ba ba lelekisa ho ea fihla Dane. ₁₅Aborame a arola mabōtho a hae lihlopha, a e-na le bahlanka ba hae, ba ba hlasela bosiu, ba ba lelekisa ho ea fihla Hoba e ka leboea ho Damaseka. ₁₆A khutla le thepa eohle, esita le eena Lota mora oa moen'a hae, le thepa ea hae, 'moho le basali le batho kaofela.

₁₇Ha Aborame a khutla ho tsoa hlōla Kedore-Laomere, le likhosi tse neng li mo tlatsitse, khosi ea Sodoma ea ea mo khahlanyetsa khohlong ea Shafe, e leng Khohlo ea Khosi.

₁₈Meleki-Sedeke, khosi ea Salema, a mo tlisetsa bohobe le veine. Meleki-Sedeke e ne e le moprista oa Molimo ea holimo-limo. Eaba o hlohonolofatsa Aborame, o re:

₂₁Khosi ea Sodoma ea re ho Aborame: “Nkhutlisetse batho, u ipōlokele thepa.”

₂₂Empa Aborame a arabela khosi ea Sodoma, a re: “Ke phahamisa letsoho, ke hlapanyetsa Morena, Molimo ea holimo-limo, 'Mōpi oa leholimo le oa lefatše; ₂₃hore nke ke ka nka khoele, leha e le leqhoele la seeta; le hore nke ke ka nka letho leo e leng la hao, esere ua re: ‘Ke ruisitse Aborame.’ ₂₄'Na ha ke nke letho, haese feela seo bahlankana ba se jeleng, le seabo sa banna ba neng ba ile le 'na, e leng Bo-Anere, le Eshekole, le Mamore. Bona ba ka nka seabo sa bona.”