BAGALATA 6

₁Bana beso, haeba motho a ka oela sebeng ka tsometso, lōna ba nang le Moea oa Molimo le 'musetse tseleng ka moea o mosa. Le uena u itlhokomele, esere ua lekoa. ₂Jarelanang mefokolo, 'me ka hona le tla phetha molao oa Kreste. ₃Ha motho a ikhōpōla hore ke letho, empa e se letho, oa ithetsa. ₄Motho ka mong a hlahlobe liketso tsa hae, e be hona a ka ithorisang ka seo a leng sona feela, e seng ka ho ipapisa le ba bang, ₅hobane motho ka mong o tla itjarela mefokolo ea hae.

₆Ea rutoang lentsoe la Molimo eka khona a arolelane maruo a hae 'ohle le ea mo rutang.

₇Le se ke la ithetsa. Molimo ha a songoe, hobane seo motho a se jalang, ke sona seo a tla se kotula. ₈Ea jalang tšimong ea tsa botho o tla kotula ho bola ho eona, empa ea jalang tšimong ea tsa Moea, o tla kotula bophelo bo sa feleng ho eona. ₉Re se khathale ho etsa tse molemo, hobane re tla kotula ka nako e lokelang, haeba re sa tepelle. ₁₀Joale he, ha re sa ntse re e-na le sebaka, a re etsetseng bohle molemo, haholo-holo ba lelapa la bolumeli.

₁₁Bonang boholo ba litlhaku tseo ke le ngoletseng ka tsona, ka letsoho la ka!

₁₂Bohle ba ratang ho khahleha ho tsa botho, ke bona ba le qōbellang hore le bōlle, e le hore ba tle ba pheme ho hlorisetsoa sefapano sa Kreste. ₁₃Batho bao ba bōlōtseng ha ba bōlōke Molao, ba mpa ba lakatsa hore le bōlle, ba tle ba ithorise ka ho bolotsoa ha lōna. ₁₄'Na ke mpe ke se ithorise ka letho, haese feela ka sefapano sa Morena oa rōna Jesu Kreste, seo ka sona ho 'na lefatše le thakhisitsoeng, le 'na ke thakhisitsoeng ka nqeng ea lefatše! ₁₅Ho bōlla kapa ho se bōlle hase letho; taba-taba ke ho ba 'mōpuoa e mocha. ₁₆Bohle ba tsamaeang ka molao ona, khotso le mohau li ke li be le bona, le Iseraele oa Molimo.

₁₇Ho tloha joale ho se be ea ntšoenyang, hobane 'meleng oa ka ke na le mehoabali e bontšang hore ke oa Jesu.

₁₈Mohau oa Morena oa rōna Jesu Kreste o ke o be le lōna, bana beso. A ho be joalo!