ESERA 8

₁Bana ke tsona lihlooho tsa malapa a bo-ntat'a bona, e leng lenane la melōko ea ba ileng ba khutla Babilona, ba e-na le 'na, Esera, mehleng ea puso ea khosi Aretaseresese. ₂Ho ba lelapa la Finease ke Gereshome, ho ba lelapa la Itamare ke Daniele, ho ba lelapa la Davida ke Hatushe. ₃Ho ba lelapa la Shekaniea, e leng litlōhōlō tsa Paroshe, ke Sekariea eo ba batona, ba lelōko la hae, e neng e le lekholo le mashome a mahlano. ₄Ho ba lelapa la Pahate-Moabe ke Eleunai, mora oa Seraea, ea neng a e-na le ba batona ba makholo a mabeli. ₅Ho ba lelapa la Satu ke Shekaniea, mora oa Jahasiele, ea neng a e-na le ba batona ba makholo a mararo. ₆Ho ba lelapa la Adine ke Ebede, mora oa Jonathane, ea neng a e-na le ba batona ba mashome a mahlano. ₇Ho ba lelapa la Elame ke Jeshaea oa Ataleea, ea neng a e-na le ba batona ba mashome a supileng. ₈Ho ba lelapa la Shefatiea ke Sebadiea, mora oa Mikaele, ea neng a e-na le ba batona ba mashome a robeli. ₉Ho ba lelapa la Joabe ke Obadiea, mora oa Jehiele, ea neng a e-na le ba batona ba makholo a mabeli le leshome le metso e robeli. ₁₀Ho ba lelapa la Bani ke Shelomite, mora oa Josefiea, ea neng a e-na le ba batona ba lekholo le mashome a tšeletseng. ₁₁Ho ba lelapa la Bebai ke Sekariea, mora oa Bebai, ea neng a e-na le ba batona ba mashome a mabeli a metso e robeli. ₁₂Ho ba lelapa la Asegade ke Johanane, mora oa Hakatane, ea neng a e-na le ba batona ba lekholo le leshome. ₁₃Ho ba lelapa la ho qetela la Adonikame, ba ho qetela ke Elefelede, le Jeuele, le Shemaea, ba neng ba e-na le ba batona ba mashome a tšeletseng. ₁₄Ho ba lelapa la Bigifai ke Utai, le Sabude, ba neng ba e-na le ba batona ba mashome a supileng.

₁₅Ka ba khōbōkanyetsa bohle pel'a nōka e fetang Ahafa. Ra hlola moo ka matsatsi a mararo, re le ka litenteng. Ka hlahloba sechaba, le baprista, 'me har'a bona ka fumana ho se le ea mong oa bara ba Levi. ₁₆Eaba ke rōmela hore ho bitsoe bo-Eleesere, le Ariele, le Shemaea, le Elenathane, le Jaribe, le Elenathane, le Nathane, le Sekariea, le Meshulame, e leng banna ba ka sehloohong, le Joearibe, le Elenathane, bao e neng e le banna ba bohlale. ₁₇Ka ba rōmela ho Ido, 'musisi oa sebaka se bitsoang Kasipia, ka ba laela seo ba tšoanetseng ho se bolella Ido, le bana babo, e leng basebeletsi ba Tempele, ba sebakeng sona seo sa Kasipia, hore ba re tlisetse basebeletsi ba Tempele ea Molimo oa rōna. ₁₈Ka lehlohonolo le tsoang ho Molimo oa rōna, ba re rōmela Sherebiea, monna ea nang le kutloisiso, e leng e mong oa bara ba Mahali, mora oa Levi, setlōhōlō sa Iseraele. O ne a e-na le bara ba hae, le bana babo, kaofela ba le leshome le metso e robeli, ₁₉le Hashabiea, a e-na le Jeshaea, e leng e mong oa bara ba Merari, le bana babo, le bara ba hae, kaofela ba le mashome a mabeli. ₂₀Ba ba rōmela le basebeletsi ba Tempele, bao bo-Davida le mahosana ba neng ba ba khethetse ho thusa Balevi. Basebeletsi bohle ba Tempele ba ne ba le makholo a mabeli le mashome a mabeli. Mabitso a bona bohle a ne a ngotsoe bukeng.

₂₁Hona moo nōkeng ea Ahafa, ka phatlalatsa hore ho itingoe lijo, e le hore re tle re inyatse kapele ho Molimo oa rōna, 'me rōna, le bana ba rōna, le lintho tsa rōna, a re baballe leetong la rōna. ₂₂Ke ne ke hlajoa ke lihlong ho kōpa bahlabani le bapalami ba lipere ho khosi, hore bao ba tle ba re sireletse ho lira tsa rōna tseleng, hobane re ne re bua le khosi, re re: “Letsoho la Molimo oa rōna le sireletsa bohle ba mo sebeletsang, empa matla a hae le khalefo ea hae li holim'a bohle ba mo furallang.” ₂₃Eaba re itima lijo, re rapela Molimo oa rōna, 'me a re utloa.

₂₄Eaba ke khethela kathōko baprista ba baholo, ba leshome le metso e 'meli, le Sherebiea, le Hashabiea, le bana babo bona ba leshome. ₂₅Ka ba lekanyetsa silefera, le khauta, le thepa, e leng tseo khosi, le baeletsi ba eona, le mahosana a eona, le Baiseraele bohle ba neng ba le teng moo, ba faneng ka tsona, e le nyehelo ea Tempele ea Molimo oa rōna. ₂₆Ka ba nea silefera e etsang boima ba lithane tse mashome a mabeli a metso e 'meli, le thepa e entsoeng ka silefera e etsang boima ba likilo tse mashome a supileng, le e entsoeng ka khauta e etsang boima ba likilo tse likete tse tharo le makholo a mane, ₂₇le likotlolo tse mashome a mabeli, tse entsoeng ka khauta e etsang boima ba likilo tse robeli, le likotlolo tse peli, tse entsoeng ka lethose leo e leng la bohlokoa joaloka khauta.

₂₈Eaba ke re ho bona: “Lea halalela mahlong a Morena, le thepa ena ea halalela. Silefera le khauta tsona ke nyehelo ea boithaopo, e etsetsoang Morena Molimo oa bo-ntat'a lōna. ₂₉Li hlokomeleng, le li bōlōke, ho fihlela le li lekanya hape kapele ho baprista, le Balevi, le lihlooho tsa malapa a Iseraele, le le Jerusalema, ka likamoreng tsa Tempele ea Morena.” ₃₀Eaba baprista, le Balevi, ba nka moroalo oo oa silefera, le oa khauta, le oa thepa, le oa lijana, ba o isa Jerusalema ka Tempeleng ea Morena.

₃₁Ka letsatsi la leshome le metso e 'meli la khoeli ea pele, ra tloha nōkeng ea Ahafa, ra ea Jerusalema. Molimo oa rōna a re hlohonolofatsa, 'me a re namolela matsohong a sera, le ho ba neng ba re laletse tseleng. ₃₂Ra fihla Jerusalema, ra hlola teng matsatsi a mararo.

₃₃Ka letsatsi la bone, silefera, le khauta, le thepa, tsa beoa sekaleng, ka Tempeleng ea Molimo oa rōna, 'me tsa neoa Meromote, mora oa moprista Uriea. O ne a e-na le Eleasare, mora oa Finease, 'moho le Balevi, e leng Josabada, mora oa Jeshua, le Nōoadiea, mora oa Binui. ₃₄Tsohle tsa baloa, tsa beoa sekaleng, 'me boima ba tsona ba ngoloa.

₃₅Bao e neng e le bathōpuoa ba etsetsa Molimo oa Iseraele linyehelo tsa secheso ka lipohoana tse leshome le metso e 'meli, le ka lipheleu tse mashome a robong a metso e tšeletseng, le ka likonyana tse mashome a robong a metso e tšeletseng, le ka likonyana tse mashome a supileng, e le nyehelo ea Baiseraele bohle. Ba etsa le nyehelo ea sebe ka liphooko tse leshome le metso e 'meli. Tsena tsohle e ne e le nyehelo ea secheso e etsetsoang Morena. ₃₆Ba neelana ka litaelo tsa khosi ho balebeli ba khosi, le ho babusi ba naha e ka bophirimela ho nōka ea Euferatese. Bao ba thusa sechaba, ba thusa le Tempele ea Morena.