Mosebetsi oa ho tsosa Tempele o qaloa hape
1Baporofeta, e leng Hagai le Sakariea, mora oa Ido, ba porofetela Bajuda ba neng ba ahile naheng ea Juda le Jerusalema; ba ba porofetela ka lebitso la Molimo oa Iseraele ea ba okametseng. 2Eaba bo-Serubabele, mora oa Shealatiele, le Jeshua, mora oa Josadake, baa ema, ba qala ho haha Tempele ea Morena, Jerusalema. Baporofeta ba Molimo ba ne ba e-na le bona, ba ba thusa.
3Ka eona nako eo, bo-Tatenai, 'musisi oa naha e ka bophirimela ho nōka ea Euferatese, le Shetare-Bosenai, le metsoalle ea bona, ba fihla ho bo-Serubabele, ba re ho bona: “Ke mang ea le laetseng ho haha Tempele ee, le ho qetela lerako lee?” 4Ba boela ba re ho bona: “Banna ba ntseng ba haha mohaho oo ke bo-mang?”
5Empa Molimo oa bona o ne a ntse a talimile baholo ba Bajuda, 'me bahanyetsi ba ne ba ke ke ba ba thibela ho haha, ho fihlela ha ho tsebisitsoe Dariuse, 'me eena a arabile ka lengolo. Bo-Tatenai ba ngola lengolo malebana le taba ena.
6Lengolo leo bo-Tatenai, 'musisi oa naha e ka bophirimela ho nōka ea Euferatese, le Shetare-Bosenai, le metsoalle ea bona, e leng bahlanka ba 'muso ba neng ba le ka bophirimela ho nōka ea Euferatese, ba ileng ba le ngola, ke lena: 7Lengolo lena le neng le rōmetsoe ho khosi le ne le re:
“Khotso eohle e be le khosi Dariuse!
8“Khosi e ke e tsebe hore re ile ra ea naheng ea Juda, Tempeleng ea Molimo e moholo. Tempele eo e ntse e hahoa ka majoe a maholo, 'me maboteng a eona ho ntse ho manehoa mapolanka. Mosebetsi oo o etsoa ka makhethe, 'me oa atleha.
9“Re ile ra botsa baholo bao, ra re ho bona: ‘Ke mang ea le laetseng ho haha Tempele ee, le ho qetela marako aa?’ 10Re ile ra ba botsa le mabitso a bona, e le hore re ngole mabitso a baetapele bao ba bona, re tle re u tsebise.
11“Bona ba re araba tjena, ba re: ‘Rōna re bahlanka ba Molimo oa leholimo le oa lefatše. Re tsosa Tempele e neng e hahoe mehleng ea khale, ea hahoa ke khosi e tumileng ea Iseraele, ea ba ea e phetha. 12Kahobane bo-ntat'a rōna ba ne ba halefise Molimo oa maholimo, o ile a neelana ka bona matsohong a Nebukadenesare oa Mokalatiea, khosi ea Babilona, ea ileng a senya Tempele ena, 'me a thōpa sechaba, a se isa Babilona.
13“ ‘Empa ka selemo sa pele sa puso ea hae, Siruse, khosi ea Babilona, o ile a laela hore ho hahoe Tempele ena ea Molimo. 14Thepa e entsoeng ka silefera, le e entsoeng ka khauta, e neng e le ka Tempeleng ea Molimo, eo Nebukadenesare a neng a e nke ka Tempeleng e neng e le Jerusalema, a e isa tempeleng ea Babilona, eona thepa eo, khosi Siruse o ile a e ntša ka tempeleng ea Babilona, a e nea monna ea bitsoang Sheshebasare, eo a neng a 'meile hore e be 'musisi. 15Siruse a ba a re ho eena: “Nka thepa ena, u tsamaee, u e'o e bea ka Tempeleng e Jerusalema, 'me u hlokomele hore Tempele ea Molimo e hahoe setšeng sa eona sa pele!”
16“ ‘Joale Sheshebasare eo o ile a fihla, a rala mothèo oa Tempele ea Molimo e Jerusalema. Ho tloha mohlang oo, ho fihlela kajeno, haesale e ntse e hahuoa, empa ha e e-s'o fele.
17“ ‘Ka baka lena, haeba khosi e ka khahloa, a ho ke ho fuputsoe ka tlung ea khosi, eo ho bōlōkoang matlotlo ka ho eona, hore na ho fela ho le joalo, hore khosi Siruse o kile a laela hore ho hahoe Tempele ea Molimo, Jerusalema. A re ke re tsebisoe seo khosi e ratang hore se etsoe tabeng ena.’ ”
