ESEKIELE 43

₁Eaba monna eo o nkisa khorong e shebileng bochabela. ₂Ka bona tlōtla ea Molimo oa Iseraele e hlaha bochabela. Lentsoe la hae le ne le le joaloka molumo oa metsi a hoasang, 'me lefatše le phatsima ke tlōtla ea hae. ₃Pono eo ke neng ke e bona e ne e ka eo ke neng ke e bone ha Morena a ne a tlil'o ripitla motse; le teng e tšoana le lipono tseo ke neng ke li bone lebōpong la nōka ea Kebare. Eaba ke itihela fatše ka sefahleho. ₄Tlōtla ea Morena ea kena ka Tempeleng ka khoro e shebileng bochabela.

₅Joale Moea oa mphahamisa, oa nkisa lebaleng le kahare, 'me tlōtla ea Morena ea tlala Tempele. ₆Ha monna eo a ntse a eme pel'a ka, ka utloa e mong a bua le 'na a le ka Tempeleng.

₇Enoa a re ho 'na: “Uena ngoan'a motho, sebaka sena ke sa terone ea ka le sa bonamelo ba maoto a ka. Mona ke moo ke tla phela teng har'a bana ba Iseraele kamehla. Baiseraele kapa likhosi tsa bona ba ke ke ba hlola ba silafatsa lebitso la ka le halalelang, ba le silafatsa ka bootsoa ba bona kapa ka ho epela litōpō tsa likhosi tsa bona mabitleng a tsona. ₈Mohla monyako oa bona o bang pel'a monyako oa ka, le likosene tsa monyako oa bona li e-ba pel'a likosene tsa monyako oa ka, ke arohantsoe le bona ke lerako feela, ke mohla ba silafatsang lebitso la ka le halalelang, ba le silafatsa ka manyala ao ba a entseng. Kahoo ke ile ka ba timetsa ke halefile. ₉Joale a ba ke ba tlose bootsoa ba bona le litōpō tsa likhosi tsa bona pel'a ka, 'me ke tla lula har'a bona kamehla eohle.

₁₀“Uena ngoan'a motho, hlalosetsa Baiseraele tsa Tempele ena, libe tsa bona li tle li ba hlabise lihlong. Etsa hore ba lekanye moralo oa eona. ₁₁Haeba ba hlajoa ke lihlong ka baka la tsohle tseo ba li entseng, u ba hlalosetse moralo oa Tempele, kamoo e hahiloeng kateng: Menyako ea eona e tsoelang kantle le e kenang kahare, le meralo ea eona eohle, le litaelo tsa eona tsohle, le melao ea eona eohle. U ngole tsena tsohle moo ba ntseng ba bona, e le hore ba tle ba boloke litaelo tsa eona tsohle, 'me ba li phethe ka botšepehi.

₁₂“Ona ke molao o amanang le Tempele: Sebaka sohle se e pota-potileng, se kaholim'a thaba, ke sebaka se halalelang ka ho fetisisa. Ona ke oona molao o amanang le Tempele.

₁₃“Tsena ke litekanyo tsa aletare ka limethara tseo ho methiloeng Tempele ka tsona. Mosèlè o pota-potileng aletare fatše o ne o etsa botebo ba halofo ea methara le bophara ba halofo ea methara; bophara ba mohaoloana o pota-potileng aletare bo ne bo etsa lisenthimethara tse mashome a mabeli a metso e mehlano. Bona ke bophahamo ba aletare: ₁₄Bophahamo ba karolo e katlase-tlase ea aletare, ho tloha kaholimo ho ea fatše, e ne e le methara feela. Karolo e 'ngoe e ne e suthile lintšing tsa aletare ka halofo ea methara ho potoloha, bophahamo e le limethara tse peli. Karolo e latelang ena le eona e ne e suthile lintšing tsa aletare ka halofo ea methara ho potoloha. ₁₅Bophahamo ba karoloana e kaholimo, eo mahlabelo a neng a chesetsoa holim'a eona, le bona e ne e le limethara tse peli. Manaka a lihukung tse 'ne tsa aletare a ne a phahametse likarolo tsohle tsa eona. ₁₆Bolelele le bophahamo ba aletare kaholimo bo ne bo lekana, e le limethara tse tšeletseng. ₁₇Bolelele le bophara ba karolo e hare ea aletare le bona bo ne bo lekana, e le limethara tse supileng, ho e-na le mohaoloana o lintšing tse aletare, bophahamo ba oona e le lisenthimethara tse mashome a mabeli a metso e mehlano. Mehato e hloellang aletareng e ne e le ka bochabela.”

₁₈Eaba monna eo o re ho 'na: “Uena ngoan'a motho, Morena Molimo o bua tjena: Tsena ke litaelo tse amanang le aletare, mohla ba e hahang ho etsetsa linyehelo tsa secheso holim'a eona, le ho fafatsa mali holim'a eona. ₁₉U tla nyehela ka pohoana bakeng sa sebe, u e nee baprista, e leng Balevi, litlōhōlō tsa Sadoke, ba atamelang ho tla sebeletsa kapele ho 'na, ho rialo Morena Molimo. ₂₀U tla nka mali a eona, u tlotse manaka a mane a aletare, le lihuku tse 'ne tsa mohaoloana o kaholimo ho aletare, le ho potoloha lintši tsa eona. U tla e hloekisa ka mokhoa o joalo, u etsetse tefelo ea sebe holim'a eona. ₂₁U tla nka le pohoana ea nyehelo ea sebe, u e chesetse sebakeng se khethetsoeng hona sa Tempele, se kantle ho Sehalalelo.

₂₂“Ka letsatsi la bobeli u tla nyehela ka phooko e se nang sepha, e le nyehelo ea sebe, 'me ba tla hloekisa aletare joalokaha ba e hloekisitse ka pohoana. ₂₃Ha u qetile ho e hloekisa, u tla nyehela ka pohoana e se nang sepha, le ka pheleu e se nang sepha, e tsoang mohlapeng oa hao. ₂₄U tla nyehela ka tsona kapele ho Morena, baprista ba li fafatse ka letsoai, ba li hlabe e le nyehelo ea secheso ho Morena.

₂₅“Ka letsatsi le leng le le leng la matsatsi a supileng, u tla nyehela ka phooko e le nyehelo ea sebe; hape ba tla nyehela ka pohoana le ka pheleu tse tsoang mohlapeng, bobeli ba tsona e be tse se nang sepha. ₂₆Ka matsatsi a supileng ba tla etsetsa aletare tefelo ea sebe, ba e hloekise, 'me ba tla e halaletsa ka mokhoa o joalo. ₂₇Qetellong ea matsatsi ana, ho tloha ka letsatsi la borobeli, baprista ba tla etsetsa linyehelo tsa lōna tsa secheso le linyehelo tsa lōna tsa teboho holim'a aletare, 'me ke tla le amohela, ho rialo Morena Molimo.”