1Monna eo a nt'o nkisa ka Sehalalelong, a metha likosene tsa monyako: Morumo oa marako ao kosene ka 'ngoe e haheletsoeng ho 'ona, e ne e le limethara tse tharo. 2Monyako oona o ne o etsa limethara tse hlano ka bophara, 'me marako a kathōko, ka lehlakoreng le leng le le leng la oona, a ne a etsa bophara ba limethara tse peli le halofo. Monna eo a metha le Sehalalelo: Bolelele ba sona e ne e le limethara tse mashome a mabeli, bophara ba sona e le limethara tse leshome.
3Eaba o kena ka Sehalalelong se halalelang ka ho fetisisa, o metha likosene tsa monyako: Morumo oa marako ao kosene ka 'ngoe e haheletsoeng ho 'ona, e ne e le methara. Monyako oona o ne o etsa limethara tse tharo ka bophara, 'me morumo oa marako a kathōko a monyako oona o etsa limethara tse tharo le halofo. 4A metha Sehalalelo se kahare: Bolelele ba sona e ne e le limethara tse leshome, le bophara e le limethara tse leshome.
Joale a re ho 'na: “Sena ke Sehalalelo se halalelang ka ho fetisisa.”
Likamore tse haheletsoeng marakong a Tempele
5Monna eo a metha lerako la Tempele: Morumo oa lona e ne e le limethara tse tharo. Bophara ba kamore ka 'ngoe ea tse pota-potileng Tempele e ne e le limethara tse peli. 6Likamore tsona li ne li hahiloe ka lisolloro, 'me sollorong e 'ngoe le e 'ngoe ho ne ho e-na le likamore tse mashome a mararo. Ho ne ho e-na le litšehetso lerakong la Tempele, ho tšehetsa likamore tse kathōko; feela litšehetso li ne li sa hahelloa lerakong la Tempele. 7Likamore tse kathōko, ho potoloha Tempele, li ne li le batsi sollorong e 'ngoe le e 'ngoe e kaholimo. Mohaho o pota-potileng Tempele o ne o hahiloe ka lisolloro, 'me likamore li ne li e-ba batsi ha li ntse li hloella holimo. Mehato e ne e tloha sollorong e katlase-tlase, e hloella ho e kaholimo-limo ka ho phunyeletsa ho e mahareng.
8Ka bona Tempele e pota-potiloe ke lebala le katiloeng, leo morumo oa lona e neng e le limethara tse peli le halofo. Bophahamo ba lona e ne e le limethara tse tharo, 'me le fella moo mothèo oa likamore o neng a qala teng. 9Morumo oa lerako le kantle la likamore tse kathōko e ne e le limethara tse peli le halofo. Bophara ba sebaka se feela, se pakeng tsa likamore tse kathōko ho Tempele 10le likamore tsa baprista, e ne e le limethara tse leshome ho potoloha Tempele. 11Ho ne ho e-na le menyako e kenang ka likamoreng tse kathōko ho tloha sebakeng sena se feela: O mong o le ka lebōea, o mong o le ka boroa. Bophara ba sebaka se feela e ne e le limethara tse leshome ho potoloha.
Mohaho o ka bophirimela
12Bophara ba mahaho o shebaneng le lebala la Tempele ka lehlakoreng le ka bophirimela e ne e le limethara tse mashome a mararo a metso e supileng le halofo. Morumo oa lerako la mohaho ona e ne e le limethara tse peli le halofo ho potoloha, 'me bolelele ba lona e ne e le limethara tse mashome a mane a metso e mehlano.
Litekanyo tsohle tsa mohaho oa Tempele
13Eaba o metha Tempele: Bolelele ba eona e ne e le limethara tse mashome a mahlano. Bolelele ba lebala la Tempele, le mohaho oa eona, 'moho le marako a eona, e ne e le limethara tse mashome a mahlano. 14Bophara ba lebala la Tempele ka bochabela, 'moho le sefahleho sa Tempele, e ne e le limethara tse mashome a mahlano.
15A metha bolelele ba mohaho o shebaneng le lebala le kamora' Tempele, 'moho le mehohoma ea eona e ka lehlakoreng le leng le le leng: E ne e le limethara tse mashome a mahlano.
Liqaqiso tsa mohaho oa Tempele
Sehalalelo, le Sehalalelo se halalelang ka ho fetisisa, le lethule le shebileng ka lebaleng, 16le mehohoma e li potolohang ka boraro ba tsona, lintho tsohle tse ka nqane, 'moho le menyako, li ne li manehiloe ka lehong. Le ne le manehiloe ho tloha fatše ho ea maboteng le lifesetereng. 17Holim'a monyako o kenang ka Sehalalelong se kahare, le maboteng, ho potoloha kantle le kahare ho Sehalalelo, 18ho ne ho betliloe litšoantšo tsa likerubime le tsa lifate tsa lipalema. Setšoantšo ka seng sa sefate sa palema se ne se le pakeng tsa likerubime, le kerubime ka 'ngoe e le pakeng tsa lifate tsa lipalema. Kerubime e 'ngoe le e 'ngoe e ne e e-na le lifahleho tse peli: 19Sefahleho sa motho se ne se shebane le sefate sa palema se ka lehlakoreng lena, 'me sefahleho sa tau se shebane le sefate sa palema se ka lehlakoreng lane. Li ne li betliloe ho potoloha Tempele. 20Ho tloha fatše ho ea fihla holim'a monyako, litšoantšo tsa likerubime le tsa lifate tsa lipalema li ne li betliloe leboteng la Sehalalelo. 21Likosene tsa monyako oa Sehalalelo li ne li lekana ka bophahamo le ka bophara.
Aletare ea lehong
Kapele ho Sehalalelo se halalelang ka ho fetisisa, ho ne ho e-na le ho kang 22aletare ea lehong, e bophahamo ba methara e le 'ngoe, bolelele le bophara bo lekana. Lihuku tsa eona, le fatše ho eona, le mahlakore a eona, tsohle e ne e le tsa lehong.
Monna eo a re ho 'na: “Ena ke tafole e kapele ho Morena.”
Mamati a Tempele
23Tempele e ne e e-na le lemati le karolo li peli, le Sehalalelo se halalelang ka ho fetisisa se ne se e-na le lemati le karolo li peli. 24Lemati le leng le le leng le ne le bulehela ka nqena le ka nqane. 25Holim'a mamati a Sehalalelo ho ne ho betliloe litšoantšo tsa likerubime le tsa lifate tsa lipalema, tse tšoanang le tse betliloeng maboteng. Holim'a monyako oa lethule ho ne ho tšekalalitsoe lehong le letenya. 26Ka mahlakoreng a lethule ho ne ho e-na le lifesetere tse tšesanyane, le litšoantšo tsa lifate tsa lipalema tse betliloeng ka lehlakoreng le leng le le leng. Likamore tse kamathōko le tsona li ne li e-na le lehong le tšekalalitsoeng.
