ESEKIELE 40

₁Ka letsatsi la leshome la khoeli, qalong ea selemo sa mashome a mabeli a metso e mehlano re le bothōpuoeng, e le selemo sa leshome le metso e mene motse oa Jerusalema o ripitliloe, ka lona letsatsi leo matla a tsoang ho Morena a ntsukutla, a nkukela hona Jerusalema. ₂Molimo a nkisa naheng ea Iseraele ka pono, a mpea holim'a thaba e telelehali, eo ka boroa ho eona ho neng ho e-na le ho kang mehaho ea motse. ₃A nkatametsa pel'a motse, 'me ka bona monna eo sebopeho sa hae e neng e ka se bōpiloe ka lethose. O ne a eme khorong, ka letsohong la hae a tšoere khoele ea lene, le leqala le methang.

₄Monna eo a re ho 'na: “Uena ngoan'a motho, talimisisa, u mamelisise, u ele hloko tsohle tseo ke tla u bontša tsona, hobane u tlisitsoe koano hore ke tle ke u bontše tsona. U tle u bolelle Baiseraele tsohle tseo u li bonang.”

₅Eaba ke bona lerako le pota-potileng Tempele. Bolelele ba leqala le methang, leo monna eo a neng a le tšoere, bo ne bo etsa limethara tse tharo. A metha lerako lena: Morumo oa lona o ne o etsa limethara tse tharo, le bophahamo ba lona bo etsa limethara tse tharo.

₆Joale monna eo a ea khorong e shebileng bochabela. A nyoloha ka mehato ea eona, a metha monyako oa eona: Bophara ba oona bo ne bo etsa limethara tse tharo. ₇Kamore ka 'ngoe ea likamore tsa balebeli e ne e etsa limethara tse tharo ka bolelele, le tse tharo ka bophara, 'me morumo oa marako a li arolang e ne e le limethara tse peli le halofo. Monyako o pel'a lethule le tobaneng le Tempele o ne o etsa limethara tse tharo ka bophara.

₈Eaba monna eo o metha lethule la khoro: ₉Le ne le etsa limethara tse 'ne ka bolelele, likosene tsa lona li etsa methara e le 'ngoe ka morumo. Lethule la khoro le ne le shebane le Tempele.

₁₀Kahare ho khoro e ka bochabela ho ne ho e-na le likamore tse tharo tsa balebeli ka lehlakoreng le leng le le leng: Boraro ba tsona li ne li lekana, lifahleho tsa marako a li arolang ka lehlakoreng le leng le le leng le tsona li lekana.

₁₁Monna eo a nt'o metha bophara ba monyako oa khoro: Bophara bo ne bo etsa limethara tse hlano, bolelele bona e le limethara tse tšeletseng le halofo. ₁₂Kapele ho kamore e 'ngoe le e 'ngoe ea balebeli ho ne ho e-na le lerako le etsang halofo ea methara ka bophahamo; bolelele le bophara ba likamore tsena bo ne bo lekana, e le limethara tse tharo. ₁₃Eaba o metha khoro ho tloha holimo, ke ho re motšeo ho kamore e le 'ngoe ea balebeli ho ea holimo motšeo ho e shebaneng le eona: Bolelele e ne e le limethara tse leshome le metso e 'meli le halofo. ₁₄A metha lifahleho tsa marako a arolang likamore tsa balebeli kahare ho khoro: Ea e-ba limethara tse mashome a mararo. Ho ne ho methoa bo ea fihla lethuleng le kapele ho lebala. ₁₅Bolelele ba ho tloha monyako oa khoro ho ea fihla motšeo ho lethule la eona, e ne e le limethara tse mashome a mabeli a metso e mehlano. ₁₆Likamore tsa balebeli, 'moho le marako a li arolang kahare ho khoro, li ne li phethiloe ho potoloha holimo ka lifesetere tse tšesanyane; le lona lethule le le joalo. Lifesetere tsena, ho potoloha, li ne le bulehela kahare. Lifahleho tsa marako a arolang likamore tsa balebeli li ne li khabisitsoe ka litšoantšo tsa lifate tsa lipalema.

₁₇Joale monna eo a nkisa lebaleng le kantle. Teng ka bona likamore tse ling, le tsela e katiloeng ho potoloha lebala lena. Likamore tse mashome a mararo li ne li sika le tsela ena e katiloeng. ₁₈Tsela ena e ne e sika le mahlakore a khoro, 'me bophara ba eona bo ne bo lekana le bolelele ba 'ona. E ne e le tsela e katiloeng, e katlase.

₁₉Eaba o metha bophara ho tloha kahare ho khoro e katlase ho ea kantle ho lebala le kahare: Bolelele e ne e le limethara tse mashome a mahlano ka lehlakoreng le ka bochabela le ka ho le ka lebōea.

₂₀Joale monna eo a metha bolelele le bophara ba khoro e ka lebōea, e tsoelang lebaleng le kantle. ₂₁Likamore tse tharo tsa balebeli, tse ka lehlakoreng le leng le le leng la tsela, le marako a li arolang, le lethule, tsena li ne li lekana le tsa khoro e ka bochabela. Bolelele ba khoro ena e ne e le limethara tse mashome a mabeli a metso e mehlano, bophara bona e le limethara tse leshome le metso e 'meli le halofo. ₂₂Lifesetere tsa eona, le lethule la eona, le mekhabiso ea eona ea litšoantšo tsa lifate tsa lipalema, li ne li e-na le litekanyo tse lekanang le litekanyo tsa khoro e ka bochabela. Ho ne ho nyoloheloa ho eona ka mehato e supileng e malebana le lethule la eona. ₂₃Khoro e kenang ka lebaleng le kahare e ne e le ka lebōea, joalokaha e 'ngoe e ne e le ka bochabela. Monna enoa a metha ho tloha khorong e 'ngoe ho isa ho e shebaneng le eona: Bolelele ea e-ba limethara tse mashome a mahlano.

₂₄Eaba monna eo o nkisa lehlakoreng le ka boroa, 'me ka bona khoro e shebileng boroa. A metha likosene tsa monyako oa eona le lethule la eona: Li ne li e-na le litekanyo tse lekanang le tsa likhoro tse ling. ₂₅Khoro le lethule la eona li ne li e-na le lifesetere ho potoloha, joaloka lifesetere tsa likhoro tse ling. Bolelele ba khoro e ne e le limethara tse mashome a mabeli a metso e mehlano, bophara ba eona e le limethara tse leshome le metso e 'meli le halofo. ₂₆Ho ne ho nyoloheloa ho eona ka mehato e supileng, 'me lethule la eona le ne le tobane le mehato ena. Litšoantšo tsa lifate tsa lipalema li ne li khabisitse lifahleho tsa marako a arolang likamore tsa eona tsa balebeli, ka lehlakoreng le leng le le leng. ₂₇Lebala le kahare le lona le ne le e-na le khoro e shebileng boroa. Monna eo a metha ho tloha khorong ena ho ea fihla khorong e kantle, e ka lehlakoreng le ka boroa: E ne e le limethara tse mashome a mahlano.

₂₈Monna eo a nkisa lebaleng le kahare, a nkenya ka khoro e ka boroa. A metha khoro e ka boroa, 'me litekanyo tsa eona tsa lekana le tsa likhoro tse ling. ₂₉Likamore tsa eona tsa balebeli, le marako a li arolang, le lethule la eona, li ne li lekana le tse ling ka litekanyo. Khoro le lethule la eona li ne li e-na le lifesetere ho potoloha. Bolelele kaofela e ne e le limethara tse mashome a mabeli a metso e mehlano, bophara bona e le limethara tse leshome le metso e 'meli le halofo. ₃₀Mathule a likhoro, ho potoloha lebala le kahare, a ne a etsa bolelele ba limethara tse leshome le metso e 'meli le halofo, le bophara ba limethara tse peli le halofo. ₃₁Lethule la eona le ne le shebile lebaleng le kantle; litšoantšo tsa lifate tsa lipalema li ne li khabisitse likosene tsa monyako oa eona, 'me mehato e nyolohelang khorong e ne e le robeli.

₃₂Monna eo a nt'o nkisa lebaleng le kahare, le ka nq'a bochabela, 'me a metha khoro. E ne e e-na le litekanyo tse lekanang le tsa likhoro tse ling. ₃₃Likamore tsa eona tsa balebeli, le marako a eona a li arolang, le lethule la eona, li ne li lekana le tse ling ka litekanyo. Khoro le lethule la eona li ne li e-na le lifesetere ho potoloha. Bolelele kaofela e ne e le limethara tse mashome a mabeli a metso e mahlano, bophara bona e le limethara tse leshome le metso e 'meli le halofo. ₃₄Lethule la eona le ne le shebile lebaleng le kantle, litšoantšo tsa lifate tsa lipalema li ne li khabisitse likosene tsa monyako oa eona, 'me mehato e nyolohelang khorong e le robeli.

₃₅Joale monna enoa a nkisa khorong e ka lebōea, 'me a e metha. E ne e e-na le litekanyo tse lekanang le tsa likhoro tse ling. ₃₆Likamore tsa eona tsa balebeli, le marako a li arolang, le lethule la eona, le lifesetere tse a pota-potileng, tsena le tsona li ne li lekana le tse ling. Bolelele ba khoro e ne e le limethara tse mashome a mabeli a metso e mehlano, bophara e le limethara tse leshome le metso e 'meli le halofo. ₃₇Lethule la eona le ne le shebile lebaleng le kantle, litšoantšo tsa lifate tsa lipalema li ne li khabisitse likosene tsa monyako oa eona, 'me mehato e nyolohelang khorong e le robeli.

₃₈Haufi le lethule la khoro e ka lebōea, ho ne ho e-na le kamore e nang le monyako, e le kamoo ho hlatsoetsoang liphoofolo tsa secheso kateng.

₃₉Kahare ho lethule la khoro ho ne ho e-na le litafole tse peli ka lehlakoreng lena, le litafole tse peli ka lehlakoreng lane, e le moo ho hlabeloang liphoofolo tsa nyehelo ea secheso teng, tsa nyehelo ea sebe, le tsa nyehelo ea tefelo. ₄₀Pel'a lerako le kantle la lethule la khoro, haufi le mehato e kenang khorong e ka lebōea, ho ne ho e-na le litafole tsa peli, le ka lehlakoreng le ka nqane ho mehato ena ho e-na le litafole tse peli. ₄₁Kahoo ho ne ho e-na le litafole tse 'ne ka lehlakoreng le ka koano ho khoro, le tse 'ne ka ho lane; kaofela e le litafole tse robeli, tseo ho neng ho hlabeloa liphoofolo tsa mahlabelo holim'a tsona. ₄₂Ho ne ho e-na le litafole tse 'ne tse hahiloeng ka majoe a betliloeng, e le tseo ho lokisetsoang nyehelo ea secheso holim'a tsona. Bolelele ba e 'ngoe le e 'ngoe e ne e le lisenthimethara tse mashome a supileng a metso e mehlano, bophara le bona e le lisenthimethara tse mashome a supileng a metso e mehlano, bophahamo bona e le lisenthimethara tse mashome a mahlano. Holim'a litafole tsena ho ne ho beiloe tsohle tse sebelisoang ha ho hlajoa liphoofolo tsa nyehelo ea secheso le tsa mahlabelo a mang. ₄₃Nama ea liphoofolo tsa nyehelo e ne e beiloe holim'a litafole, 'me ho pota-pota litafole tseo ho ne ho entsoe mehaoloana e bophara ba limilemethara tse mashome a supileng a metso e mehlano.

₄₄Lebaleng le kahare, ho ne ho ena le likamore tse peli tsa libini. E 'ngoe e ne e le pel'a khoro e ka lebōea, monyako oa eona o shebile boroa; e 'ngoe e le pel'a khoro e ka boroa, monyako oa eona o shebile lebōea. ₄₅Eaba monna eo o re ho 'na: “Kamore e shebileng boroa ke ea baprista ba sebeletsang ka Tempeleng, ₄₆athe kamore e shebileng lebōea eona ke ea baprista ba sebeletsang aletareng. Bona ke Balevi, litlōhōlō tsa Sadoke, bao e leng bona feela ba ka atamelang pel'a Morena ho mo sebeletsa.”

₄₇Eaba monna eo o metha lebala. Mahlakore a lona a ne a lekana, lehlakore ka leng le etsa limethara tse mashome a mahlano. Aletare e ne e le kapele ho Tempele.

₄₈Eaba joale o nkisa lethuleng la Tempele, o metha likosene tsa monyako oa lethule. Kosene ka 'ngoe e ne e etsa limethara tse peli le halofo. Bophara ba monyako bo ne bo etsa limethara tse supileng, 'me lerako ka leng la oona le hohometse ka methara le halofo. ₄₉Bolelele ba lethule e ne e le limethara tse leshome, le hohomeletse hare ka limethara tse tšeletseng. Ho ne ho nyoloheloa monyako ka mehato, ho e-na le litšiea tse peli, e 'ngoe ka lehlakoreng lena, e 'ngoe ka lehlakoreng lane la monyako.