Molimo o sebelisa Gogo ho otla sechaba sa hae
1Lentsoe la Morena la fihla ho 'na, la re: 2“Uena ngoan'a motho, talima Gogo, e leng khosana e kholo ea Mesheke le Tubale, ea naheng ea Magogo. U mo profetele, 3u re: ‘Morena Molimo o bua tjena: Kea u loantša uena Gogo, khosana e kholo ea Mesheke le Tubale. 4Ke tla u khutlisa, mehlahare ea hao ke e qalipe ka lilope, ke u ntše le mabōtho 'ohle a hao le lipere le bapalami ba tsona ba hlometseng, e le letšoelehali le hlometseng ka lithèbè le lithejana, bohle ba tšoere lisabole tsa bona. 5Peresiea le Kushe le Pute li tla ba le bona, bohle ba le lithèbè le likatiba tsa tšepe, 6le eona Gomere ka mabōtho 'ohle a eona, le Bete-Togarema e tsoang hole lebōea ka mabōtho 'ohle a eona, le lichaba tse ngata li e-na le uena.
7“ ‘Uena le mabōtho a hao 'ohle a phuthehetseng ho uena e-bang malala-a-laotsoe, uena u be molaoli oa 'ona. 8Hoba ho fete matsatsi a mangata u tla futuha. Ka lilemo tse hlahlamang u tla kena naheng e sa tsoa futuheloa, eo sechaba sa eona se ileng sa phuthoa linaheng tse ngata ho ea lithabeng tsa Iseraele tseo e neng e le khale li le feela. Se ne se ile sa ntšoa lichabeng tse ling, 'me joale se phela ka khotso. 9Uena le mabōtho 'ohle a hao le lichaba tse ngata tse emeng le uena, le tla nyoloha joaloka sefefo, le be joaloka leru le koahelang naha.
10“ ‘Morena Molimo o bua tjena: Mohlang oo u tla fihleloa ke mehopolo kelellong ea hao, ebe u rera merero e mebe. 11U tla re: “Ke tla futuhela metsana e sa haheletsoang, ke hlasele sechaba se iketlileng, se iphelelang ka khotso, se iphelelang metseng e sa haheletsoang, e se nang likhoro le mekoallo. 12Ke tla se lobela, ke se hape, ke ntan'o futuhela lithako tse tsositsoeng, le sechaba se phuthiloeng har'a balichaba, se nang le liphoofolo le matlotlo, se phelang bohareng ba lefatše.” 13Sheba le Dedane le bahoebi ba Tarashishe le bahale bohle ba eona, ba tla re ho uena: “Na u tlile ho re lobela? Na u phuthile mabōtho a hao ho tla ikhapela silefera le khauta, le liphoofolo le thepa, le ho inkela khapo e ngata?” ’
14“Ka baka leo, uena ngoan'a motho, porofetela Gogo, u re: ‘Morena Molimo o bua tjena: Mohla sechaba sa ka sa Iseraele se phelang ka khotso, na ha u na ho elelloa hoo? 15U tla tloha haeno, hōle lebōea, u e-na le lichaba tse ngata, bohle ba palame lipere, le le lebōthohali le matla. 16U tla futuhela sechaba sa ka sa Iseraele joaloka leru le koahetseng naha. Ka matsatsi a tlang, uena Gogo, u tla futuhela naha ea ka, e le hore balichaba ba tle ba ntsebe ha ke bonahatsa khalalelo ea ka ka uena Gogo, moo ba ntseng ba bona.
17“ ‘Morena Molimo o bua tjena: Na hase uena eo mehleng e fetileng ke ileng ka bua ka uena, ka bahlanka ba ka, baporofeta ba Iseraele? Mohlang oo ba ile ba porofeta ka lilemo tse ngata, ba re ke tla etsa hore u futuhele Baiseraele.
Molimo o tla otla Gogo
18“ ‘Ka tsatsi leo, ha Gogo a futuhela naha ea Iseraele, ho tla ba tjena: Khalefo ea ka e tla tlōkōma, ho rialo Morena Molimo. 19Ka baka la poulelo ea ka ke hlapanya ke halefile haholo, ke re mohlang oo tšisinyeho e kholo ea lefatše e tla ba teng naheng ea Iseraele. 20Litlhapi tsa leoatle, le linonyana tsa leholimo, le libatana tsa naha, le lihahabi tsohle, le batho bohle ba lefatšeng, tsena tsohle li tla thōthōmela kapele ho 'na. Lithaba li tla bōthalatsoa, mafika a thetehe, le marako 'ohle a helehe. 21Ke tla lihela Gogo likoluoa ka mefuta ea tsona lithabeng tsohle tsa ka, ho rialo Morena Molimo. Motho ka mong o tla bolaea ngoan'abo ka sabole. 22Ke tla mo ahlōlela lefu la seoa le tšollo ea mali, eena le mabōtho a hae, le lichaba tse ngata tseo a nang le tsona, ke ba nesetse pula ea sekhohola, le sefako se linaka, le mollo, le sebabole. 23Ke tla bonahatsa joalo boholo ba ka le khalalelo ea ka, ke itsebise lichaba tse ngata moo li ntseng li bona. Kahoo li tla tseba hore ke 'na Morena.’
