ESEKIELE 35

₁Lentsoe la Morena la fihla ho 'na hape, la re: ₂“Uena ngoan'a motho, talima Thaba ea Seire, u e porofetele. ₃E-re ho eona: ‘Morena Molimo o bua tjena:

₅“ ‘Haesale u hloile bana ba Iseraele ho tloha khale, ua tšolla mali a bona ka sabole ha ba le tsietsing, mohla u neng u ba ahlōla la ho qetela. ₆Ka baka leo, kea hlapanya, ho rialo Morena Molimo, ke tla u bolaea, ke tšolle mali a hao. Erekaha ha ua ka ua hloea tšollo ea mali, ke tla tšolla mali a hao. ₇Ke tla fetola Thaba ea Seire letsoatlare, ke bolaee bohle ba tsamaeang ho eona. ₈Uena Seire, lithaba tsa hao ke tla li koahela ka litōpō; ba bolailoeng ka sabole ba tla tlala maralleng, le likhohlong, le linōkeng tsohle tsa hao. ₉Ke tla u fetola letsoatlare ho isa khale, metse ea hao e fetohe lithako. Kahoo u tla tseba hore ke 'na Morena.

₁₀“ ‘U ile ua re: “Lichaba tsena tse peli le linaha tsena tse peli e tla ba tsa ka, 'me re tla li hapa,” le hoja 'na Morena, ke ne ke ntse ke le teng. ₁₁Ka baka leo, kea hlapanya, ho rialo Morena Molimo, ke tla u otlela khalefo eo u neng u ba halefetse ka eona, le mohōnō oo u neng u ba hōnōhela ka oona, le lehloeo leo u neng u ba hloile ka lona. Ha ke se ke u ahlōtse ke tla itsebisa bona. ₁₂Le uena u tla tseba hore 'na Morena, ke utloile linyefolo tsohle tseo u ileng ua nyefola lithaba tsa Iseraele ka tsona, ua re: “Li fetohile matsoatlare; re li neiloe hore re li lobele.” ₁₃Ka melomo ea lōna le ile la ithorisetsa 'na, la mpuela mantsoe a mangata, a le fetang, 'me ka a utloa.’ ”

₁₄Morena Molimo o bua tjena: “Ke tla u fetola letsoatlare hoo lefatše lohle le tla nyakalla. ₁₅Kaha u ile ua thabela ho bona ntlo ea Iseraele, eo e leng lefa la ka, e ripitloa, le uena ke tla u etsa joalo, uena Thaba ea Seire. U tla fetoha letsoatlare, le Edomo eohle e be joalo. Ka hona ba tla tseba hore ke 'na Morena.”