Morena o tla otla Egepeta
1Lentsoe la Morena la boela la fihla ho 'na, la re: 2“Uena ngoan'a motho, porofeta, u re: ‘Morena Molimo o bua tjena:
“ ‘Bokollang, le re:
“A tsatsi le malimabe!”
3Tsatsi leo le se le atametse,
tsatsi la Morena le se le atametse!
E tla ba tsatsi
la ho phethesela ha maru,
e be tsatsi la ho ahlōla balichaba.
4Egepeta e tla futuheloa
e futuheloe ka lisabole,
Kushe eona e apareloe ke litlokotsi,
ha banna ba e-oa mofela
naheng ea Egepeta,
matlotlo a eona ba a lobela,
methèo ea eona ba e fata,
ba e heletsa!
5“ ‘Banna ba Kushe,
ba Pute le ba Lōde,
ba mefuta eohle le ba Kube,
le banna ba naha
e itlammeng ka selekane,
ba tla bolaoa le Baegepeta,
ba bolaoe ka lisabole.
6“ ‘Morena o bua tjena:
“ ‘Ba thusanang le Egepeta
ba tla bolaoa,
mokhetho oa mabōtho a eona
o ripitloe;
ho tloha Migedole
ho ea fihla Sefene,
bohle ba tla oa,
ba bolaoe ka sabole,
ho rialo Morena Molimo.
7“ ‘Egepeta e tla ba nanaola
e fetang tsohle,
metse ea eona e be masupi
a fetang 'ohle.
8Ha ke chesa hlaha
naheng ea Egepeta,
bohle ba thusanang le eona
ke ba ripitla,
ke hona ba tla tseba
hore ke 'na Morena.
9“ ‘Mohl'a tsatsi leo ke tla rōma maqōsa ka likepe ho ea tšosa Bakushe ba iketlileng. Ba tla apareloa ke litlokotsi mohl'a tsatsi leo la ho timetsoa ha Egepeta, hobane ruri lona ho tla lea tla.
10“ ‘Morena Molimo o bua tjena:
“ ‘Matlotlo 'ohle a Egepeta
ke tla a felisa,
ke a felise ka Nebukadenesare,
khosi ea Babilona.
11Khosi Nebukadenesare
le bahlabani bohle ba hae,
chaba se sehlōhō
ho feta lichaba tsohle,
ba tla rōmeloa ho ripitla naha ena;
Egepeta ba tla e futuhela,
ba e futuhele ka lisabole,
naha eohle
ba e tlatse tōpō tsa babolauoa!
12Melatsoana ea nōka ea Nile
ke tla e pshesa,
ke neelane ka naha
matsohong a ba khopo.
Naha le tsohle tsa eona
ke tla li etsa nanaola,
ke li etse nanaola
ka tsoho la balichaba,
ke 'na Morena ea buileng joalo.
13“ ‘Morena Molimo o bua tjena:
“ ‘Ke tla timetsa le melingoana,
melingoana ea bohata,
ke felise tšoantšo tsa melimo,
ke li felise naheng ea Nofa;
ha ho sa tla ba le khosana
naheng ea Egepeta,
pelong tsa Baegepeta
teng ke kenye tšabo.
14Patarose ke tla e fetola e be nanaola,
ke chese hlaha
kahar'a motse oa Sōoane,
motse oa Tebese oona ke o otle.
15Khalefo ea ka
ke tla e hlatsetsa holim'a Sine,
Sine eo e leng qhobosheane,
qhobosheane ea Egepeta,
mabōtho a Tebese 'ona ke a ripitle.
16Ke tla chesa hlaha
kahar'a naha ea Egepeta,
Sine e meneke ke ho utloa bohlōkō;
marako a Tebese 'ona a tla heletsoa,
ka matsatsi 'ohle
Nofa e phele ka litlokotsi.
17Bahlankana ba Afene
le ba Pi-Besete
ba tla bolaoa ka sabole
thekōng ea ntoa,
baahi ba metse ena
ba ee bothōpuoeng.
18Mohla ke robang joko ea Egepeta,
motse oa Tahepanehese
o tla apareloa ke lefifi,
matla a oona a boikhōhōmōsō,
oona a fele.
Leru le letšo le tla koahela Egepeta,
baahi ba eona ba isoe bothōpuoeng.
19Ha ke otla Egepeta
ka oona mokhoa ona,
Baegepeta ba tla tseba
hore ke 'na Morena.’ ”
Ho fela ha matla a khosi ea Egepeta
20Ka letsatsi la bosupa la khoeli ea pele selemong sa leshome le motso o mong, lentsoe la Morena la fihla ho 'na, la re: 21“Uena ngoan'a motho, ke robile letsoho la Faro, khosi ea Egepeta. Ha lea ka la tlamelloa hore le tle le fole, leha e le ho qahathisoa ka lithupa hore le tle le matlafale, le tsebe ho tšoara sabole. 22Ka baka leo, Morena Molimo o re: Ke loantšana le Faro, khosi ea Egepeta. Ke tla roba matsoho a hae a mabeli, le phelang hantle le le robehileng, 'me ke tla etsa hore sabole e oe letsohong la hae. 23Ke tla qhalakanya Baegepeta har'a lichaba tse ling, ke ba qhalanyetse linaheng lisele. 24Ke tla matlafatsa matsoho a khosi ea Babilona, ke e tšoarise sabole ea ka, empa ke tla roba matsoho a Faro, eena a lumaele kapele ho sera sa hae, molumaelo oa hae o ke oa motho ea shoang. 25Matsoho a khosi ea Babilona 'ona ke tla a matlafatsa, empa a Faro 'ona a tla lepella feela. Etlare ha ke tšoarisa khosi ea Babilona sabole ea ka, 'me khosi eo e e otlollela holim'a naha eohle ea Egepeta, Baegepeta ba tsebe hore ke 'na Morena. 26Ke tla qhalakanya Baegepeta har'a lichaba tse ling, ke ba qhalanyetse linaheng lisele, 'me ba tla tseba hore ke 'na Morena.”
