Tlōtla ea Morena e tloha Tempeleng
1Ka talima, 'me ka bona ho kang terone e entsoeng ka lejoe la bohlokoa la safire, ho le kaholimo ho lōapi le neng le okametse lihlooho tsa likerubime. 2Morena a re ho monna ea apereng seaparo se entsoeng ka lene: “Kena har'a mabili a katlas'a likerubime. Ka matsoho a hao u nke mashala a tukang, a har'a likerubime, u a hasanye holim'a motse.” Eaba o kena har'a mabili ke ntse ke mo talimile.
3Likerubime li ne li eme ka lehlakoreng le letona la Tempele, ha motho enoa a kena har'a tsona, 'me leru la tlala kahar'a lebala le kahare. 4Joale tlōtla ea Morena ea nyolohela holimo, e e-tsoa ho likerubime, ea ea ema monyako oa Tempele. Leru la tlala Tempele, 'me lebala la tlala ho phatsima ha tlōtla ea Morena. 5Molumo oa mapheo a likerubime o ne o utloahala ho ea fihla lebaleng le kantle, o tšoana le lentsoe la Molimo ea matla 'ohle ha a bua.
6Eare ha Morena a laela monna ea apereng seaparo se entsoeng ka lene, a re: “Nka mollo o har'a mabili a likerubime,” monna eo a kena, a ema pel'a lebili. 7Kerubime e 'ngoe ea nanabetsa letsoho la eona, ea le isa mollong o neng o le har'a likerubime, ea nka mashala a mang ea a bea kahar'a matsoho a monna ea apereng seaparo se entsoeng ka lene, 'me eena a a nka, a tsoa. 8Katlas'a mapheo a likerubime tsena ho ne ho bonahala ho kang matsoho a motho.
9Ka talima, 'me ka lehlakoreng la likerubime ka bona mabili a mane, le le leng ka lehlakoreng la kerubime e 'ngoe le e 'ngoe. Mabili ana a ne a phatsima sa lehakoe la bohlokoa. 10Mabili ana a mane a ne a tšoana, lebili ka leng le ka lebili le keneng ka ho le leng. 11Ha a ntse a phethoha, a ne a ee a phethohele lehlakoreng lefe kapa lefe leo kerubime e talimileng ka ho lona. Ha likerubime li tsamaea, mabili a ne a sa phethohe. Likerubime tsena li ne li leba kae le kae moo li talimileng teng, empa li sa retelehe ha li ntse li tsamaea. 12Hohle 'meleng ea tsona le mekokotlong ea tsona, le matsohong a tsona, le mapheong a tsona ho ne ho tletse mahlo, esita le mabiling a tsona a mane. 13Ka utloa lerata la mabili ha a phethoha. 14Kerubime ka 'ngoe e ne e e-na le lifahleho tse 'ne: sefahleho se seng e le sa kerubime, se seng e le sefahleho sa motho, se seng e le sefahleho sa tau, se seng e le sefahleho sa ntsu.
15Joale likerubime tsa phahamela holimo. Tsena ke tsona libōpuoa tse phelang, tseo ke ileng ka li bona pel'a nōka ea Kebare. 16Ha likerubime li tsamaea, mabili le 'ona a ne a phethoha; ha likerubime li thathalatsa mapheo a tsona hore li phahame fatše, mabili a ne a sa tlohe mahlakoreng a tsona. 17Ha likerubime li ema, mabili le 'ona a ne a ema. Ha likerubime li phahamela holimo, mabili le 'ona a ne a phahama le tsona, hobane moea oa libōpuoa tsena tse phelang o ne o le kahar'a mabili.
18Joale tlōtla ea Morena ea tloha monyako oa Tempele, ea ea ema kaholimo ho likerubime. 19Ha ke ntse ke talimile, likerubime tsa thathalatsa mapheo a tsona, tsa phahama fatše, 'me ha li ntse li phahama, mabili le 'ona a ne a ntse a phahama le tsona. Tsa fihla tsa ema monyakong oa Tempele ea Morena o ka bochabela, 'me tlōtla ea Molimo oa Iseraele ea e-ba holim'a tsona.
20Tsena ke tsona libōpuoa tse phelang, tseo ke neng ke ile ka li bona li le katlas'a Molimo oa Iseraele, pel'a nōka ea Kebare, 'me ka hlokomela hore e ne e le likerubime. 21Kerubime ka 'ngoe e ne e e-na le lifahleho tse 'ne le mapheo a mane, 'me katlas'a mapheo a tsona ho ne ho e-na le ntho e kang ke matsoho a motho. 22Lifahleho tsa tsona li ne li tšoana le tseo ke neng ke ile ka li bona pel'a nōka ea Kebare. Kerubime ka 'ngoe e ne e toba pele feela.
