Ho hlongoa le ho halaletsoa ha Leaho
1Morena a bua ho Moshe, a re: 2“Ka letsatsi la pele, la khoeli ea pele, u tla hloma Leaho, Tente ea Morena. 3Ka ho lona u tla kenya areka ea selekane, 'me u koahele areka eo ka lesira. 4U tla kenya tafole, u lokise tsohle tsa eona; u tlise le seluloana sa lebone, u bee mabone a sona holim'a sona. 5U bee le aletare ea khauta, ea mokubetso, kapele ho areka ea selekane, ebe u lepeletsa lesira monyako oa Leaho.
6“U tla bea aletare ea secheso kapele ho monyako oa Leaho, Tente ea Morena; 7ebe u bea sekotlolo seo ho itlhatsoetsoang ka ho sona pakeng tsa Tente ea Morena le aletare, u be u tšèlè metsi ka ho sona. 8U tla hlomela Tente eo ea Morena seotloana ho potoloha, ebe u lepeletsa lesira la monyako oa seotloana.
9“U tla nka ole e tlotsang, u tlotse Leaho le tsohle tse kahar'a lona, u le halaletse hammoho le tsohle tsa lona, 'me le tla halalela. 10U tla tlotsa aletare ea secheso, le tsohle tsa eona, u hlohonolofatse aletare, 'me aletare e tla halalela ka ho fetisisa. 11U tla tlotsa sekotlolo se itlhatsoetsang le seluloana sa sona, ebe ua se halaletsa.
12“U tla atametsa Arone le bara ba hae haufi le monyako oa Tente ea Morena, ebe u ba hlatsoa ka metsi. 13U tla apesa Arone liaparo tse halalelang, u mo tlotse, u mo halaletse, 'me o tla ntšebeletsa e le moprista oa ka. 14U tla atametsa le bara ba hae, u ba apese liaparo tse fihlang maotong. 15U tla ba tlotsa joalokaha u ile ua tlotsa ntat'a bona, 'me ba tla ntšebeletsa e le baprista ba ka. Ho tlotsetsoa boprista e tla ba ha mehla eohle, ho ea fihla litlōhōlōng tsa bona.” 16Eaba Moshe o etsa tsohle ho ea kamoo Morena a neng a mo laetse kateng.
17Ka letsatsi la pele, la khoeling ea pele, selemong sa bobeli, Leaho la hlongoa. 18Moshe a hloma Leaho, a bea litšehetso tsa lona, a bea le lithupa tsa lona, a bea le maballo a lona, a hloma le litšiea tsa lona. 19A koahela Leaho ka masela, 'me a bea marulelo holim'a eona, joalokaha Morena a ne a mo laetse.
20A nka matlapa a ngotsoeng Molao, a a kenya ka arekeng, a khoesa mefeng mahlakoreng a areka, 'me a bea sekoahelo sa tefelo ea sebe holim'a areka. 21A kenya areka kahar'a Leaho, a lepeletsa lesira le sireletsang areka ea selekane, joalokaha Morena a ne a mo laetse.
22A bea tafole ka Tenteng ea Morena, ka lehlakoreng le ka leboea la Leaho, ka koano ho lesira. 23Holim'a eona a hlopha bohobe bo beoang kapele ho Morena, joalokaha Morena a ne a mo laetse.
24A bea seluloana sa lebone ka Tenteng ea Morena malebana le tafole, ka lehlakoreng le ka boroa la Leaho. 25A bea mabone kapele ho Morena, joalokaha Morena a ne a mo laetse.
26A bea aletare ea khauta ka Tenteng ea Morena, kapele ho lesira. 27A chesetsa mokubetso o monko o monate holim'a eona, joalokaha Morena a ne a mo laetse. 28A lepeletsa lesira la monyako oa Leaho.
29A bea aletare ea secheso monyakong oa Leaho, Tente ea Morena, holim'a eona a etsa sehlabelo sa secheso, le nyehelo ea lijo, joalokaha Morena a ne a mo laetse.
30A bea sekotlolo se itlhatsoetsang pakeng tsa Tente ea Morena le aletare, 'me ka ho sona a tšèla metsi a ho itlhatsoa. 31Bo-Moshe le Arone, le bara ba Arone, ba ne ba ee ba hlatsoe maoto a bona, ba hatlele. 32Ha ba ne ba kena ka Tenteng ea Morena, leha ba atamela pel'a aletare, ba ne ba ee ba itlhatsoe, joalokaha Morena a ne a laetse Moshe.
33A hloma seotloana ho pota-pota Leaho le aletare, a lepeletsa lesira la seotloana. Eaba Moshe o phetha mosebetsi.
Leru holim'a areka
34Eaba leru le khurumetsa Tente ea Morena, 'me tlōtla ea Morena ea tlala ka Leahong. 35Joale Moshe a sitoa ho kena ka Tenteng ea Morena, hobane leru le ne le e khurumelitse, 'me tlōtla ea Morena e tletse ka Leahong.
36Maetong 'ohle a bona, e ne e ee ere ha leru le phahama holim'a Leaho, bana ba Iseraele ba tsoele pele leetong la bona. 37Empa ha leru le ne le sa phahame, ba ne ba sa ke be ba tsoele pele leetong la bona, ho fihlela mohla leru le ka phahamang. 38Motšeare leru la Morena le ne le e-ba holim'a Leaho, 'me bosiu mollo o ne o ee o be teng lerung, moo bana bohle ba Iseraele ba bonang, maetong 'ohle a bona.
