Aletare ea secheso
1“U tla etsa aletare ka lithupa tsa sefate sa mositsane; bolelele ba eona e be limethara tse peli le halofo, bophara ba eona e be limethara tse peli le halofo. Aletare eo e be le mahlakore a mane, a lekanang, 'me bophahamo ba eona e be methara le halofo. 2U tla etsa manaka a eona holim'a lihuku tse 'ne tsa eona; manaka ao a etsoe ka thupa e le 'ngoe le aletare, 'me u a manehe lethose. 3U tla e etsetsa lithōtōbōlō tsa eona, le likharashoana tsa eona, le linoelo tsa eona, le lifereko tsa eona tse hlabang nama, le lipane tsa eona; thepa eohle ea eona e etsoe ka lethose. 4U e etsetse le mokhabiso, o kang letlōoa le entsoeng ka lethose. Holim'a mokhabiso ona u etse mefitšane e mene ea lethose, lintlheng tsa eona tse 'ne. 5U bee mokhabiso ona katlase ho aletare, o tlohe tlase o e'o fihla bohareng ba aletare. 6U etsetse aletare mefeng; mefeng eo e be lithupa tsa sefate sa mositsane, u e manehe lethose. 7Mefeng eo ea eona e khoesoe mefitšaneng, hore e tle e be mahlakoreng a mabeli a aletare ha e jaroa. 8U tle u e etse ka lithupa, tse fatiloeng sekoti hare; u e etse hore e be joalokaha u ile ua e bontšoa ha u le thabeng.
Seotloana sa leaho
9“U tla etsetsa leaho leo seotloana. Ka lehlakoreng le leng, le ka nqeng ea boroa, seotloana se tla ba le masela a lepeletseng, a lene, a lōehileng, a bolelele ba limethara tse mashome a mane a metso a mene. 10Litšiea tse ka lehlakoreng lena li be mashome a mabeli, le litšehetso tsa tsona li be mashome a mabeli, e be tse entsoeng ka lethose. Lihokelo tsa litšiea le mefapo ea tsona e be tse entsoeng ka silefera. 11Ka lehlakoreng le ka nqeng ea leboea ho lepelle masela a bolelele ba limethara tse mashome a mane a metso a mene. Litšiea tsa 'ona li be mashome a mabeli, le litšehetso tsa 'ona li be mashome a mabeli; e be tse entsoeng ka lethose. Lihokelo tsa litšiea le mefapo ea tsona e be tse entsoeng ka silefera.
12“Ka bophareng ba seotloana, lehlakoreng le ka bophirimela, le teng ho lepelle masela a bolelele ba limethara tse mashome a mabeli a metso e 'meli; a be le litšiea tse leshome, le litšehetso tsa tsona tse leshome. 13Le ka bophareng ba seotloana, lehlakoreng le ka bochabela, le teng ho lepelle masela a bolelele ba limethara tse mashome a mabeli a metso e 'meli. 14Bolelele ba masela a tla lepella ka lehlakoreng le leng la monyako e be limethara tse tšeletseng le lisenthimethara tse mashome a tšeletseng; a be le litšiea tse tharo, le litšehetso tsa tsona li be tharo. 15Ka lehlakoreng la bobeli le teng ho lepelle masela a bolelele ba limethara tse tšeletseng le lisenthimethara tse mashome a tšeletseng; a be le litšiea tse tharo, le litšehetso tsa tsona li be tharo.
16“Monyakong oa seotloana ho tla ba le lesira le bolelele ba limethara tse robong, le entsoeng ka lesela le leputsoa, le le perese, le le lefubelu, le la lene le lōehileng, le entsoeng ke sehōmi. Lesira le be le litšiea tsa lona tse 'ne, le litšehetso tsa tsona li be 'ne. 17Litšiea tsohle tsa seotloana tse se pota-potileng, li hokahanngoe ka lithupa tse entsoeng ka silefera. Lihokelo tsa litšiea e be tsa silefera, litšehetso e be tsa lethose.
18“Bolelele ba seotloana e be limethara tse mashome a mane a metso e mene, bophara e be limethara tse mashome a mabeli a metso e 'meli, 'me bophahamo e be limethara tse peli le lisenthimethara tse mashome a mabeli. Ho be le masela a lepeletseng, a lene, a lōehileng; le litšehetso tsa 'ona e be tsa lethose. 19Thepa eohle ea leaho, e sebelisoang litšebeletsong tsohle tsa lona, le limapo tsohle tsa lona, le limapo tsohle tsa seotloana, e be tsa lethose.
Ho hlokomela lebone
20“U tla laela bana ba Iseraele hore ba u tlisetse ole e hloekileng ea sefate sa mohloaare, ea ho bonesa, e le hore lebone le tle le 'ne le tuke. 21Ka Tenteng ea Morena, feela ka koano ho lesira le siretseng areka ea selekane, Arone le bara ba hae ba tla hotetsa lebone kapele ho Morena; lebone leo le tuke ho tloha ka shoalane ho fihlela hoseng. Hona e tla ba molao o tla bōlōkoa kamehla eohle ke melōko eohle ea bana ba Iseraele.
