Leaho
1“Hape u tla etsa leaho ka masira a leshome, a entsoeng ka lesela la lene, a lōehileng, le a maputsoa, le a perese, le a mafubelu; setsebi se lohelle litšoantšo tsa likerubime ho 'ona. 2Bolelele ba lesira ka leng e be limethara tse leshome le metso e 'meli, bophara ba lesela ka leng e be limethara tse peli, 'me masira 'ohle a lekane. 3Masira a mahlano a rokahanngoe hammoho; le a mang a mahlano hape a rokahanngoe hammoho. 4U tle u etse likhoketsane ka lesela le leputsoa ntlheng ea lesira la pele, moo masira a tla kopana teng, 'me u etse joalo le ntlheng ea lesira la bobeli, moo masira a tla kopana teng. 5U tla etsa likhoketsane tse mashome a mahlano lesireng la pele, u etse hape likhoketane tse ling tse mashome a mahlano ntlheng ea lesira la bobeli, moo masira a tla kopana teng, likhoketsane tseo li tobane. 6U tla etsa lihokelo tsa khauta tse mashome a mahlano, u hōkanye masira a mabeli ka lihokelo tseo, e le hore leaho e be ntho e le 'ngoe.
7“Ka boea ba lipoli u tla etsa masela a tente e koahelang leaho; u tla etsa masela a leshome le motso o mong. 8Bolelele ba lesela ka leng e be limethara tse leshome le metso e meraro, bophara ba lesela ka leng e be limethara tse peli, 'me masela ao a leshome le motso o mong a lekane. 9U tla rokahanya masela a mahlano hammoho, le a mang a tšeletseng u a rokahanye hammoho; lesela la botšelela le tla menoa habeli monyakong oa tente. 10U tla etsa likhoketsane tse mashome a mahlano ntlheng ea lesela la pele, moo masela a tla kopana teng; le likhoketsane tse mashome a mahlano ntlheng ea lesela la bobeli, moo masela a tla kopana teng. 11U tla etsa lihokelo tsa lethose tse mashome a mahlano, ebe u kenya lihokelo likhoketsaneng; joale u kopanye tente hore e be ntho e le 'ngoe. 12Karolo e setseng e leketlile ea masela, ke hore halofo ea lesela e setseng, e tla lepellela fatše, kamorao ho leaho. 13Lisenthimethara tse mashome a mahlano tse setseng ka lehlakoreng la pele, le lisenthimethara tse mashome a mahlano tse setseng ka lehlakoreng la bobeli, ke ho re tse setseng boleleleng ba lesela la Tente ea Morena, li tla lepellela mahlakoreng a leaho, ka nq'ena le ka nq'ane ho leaho, hore li tle li le koahele. 14U tla etsetsa Tente ea Morena marulelo ka matlalo a lipheleu a 'masa; u tla e etsetsa marulelo a mang a kaholimo ho ao ka matlalo a liqibi.
15“U tla etsetsa leaho litšiea tsa lithupa tsa sefate sa mositsane; li tla hlongoa. 16Bolelele ba thupa ka 'ngoe e be limethara tse 'ne, 'me bophara ba thupa ka 'ngoe e be lisenthimethara tse mashome a tšeletseng a metso e tšeletseng. 17U tla etsa limapo tse peli, tse bapileng, tšieeng e 'ngoe le e 'ngoe, 'me u tla etsa joalo ka litšiea tsohle tsa leaho. 18U tla etsetsa leaho litšiea tseo; litšiea tse mashome a mabeli li be ka lehlakoreng le ka boroa. 19U tla etsetsa litšiea tseo tse mashome a mabeli litšehetso tsa silefera tse nang le mekotjana, tse mashome a mane. Litšehetso tse peli li be katlas'a tšiea e 'ngoe le e 'ngoe, moo limapo tse peli tsa eona li tla kena teng. 20Ka lehlakoreng la bobeli la leaho, e leng le ka leboea, u etse litšiea tse mashome a mabeli. 21U etse le litšehetso tsa tsona tsa silefera, tse mashome a mane, moo limapo tse peli tsa tšiea ka 'ngoe li tla kena teng.
22“Lehlakoreng le kamorao la leaho, e leng le ka bophirimela, u etse litšiea tse tšeletseng. 23U tla etsa litšiea tse peli lihukung tsa lehlakore leo le kamorao la leaho. 24Li tla kopanngoa ho tloha fatše, ho ea fihla holimo, moo ho nang le mofitšane oa pele. Litšiea tsena tse peli, tse lihukung, li tla etsoa joalo. 25Ho tla ba le litšiea tse robeli, le litšehetso tsa silefera tse leshome le metso e tšeletseng; tse peli li be katlas'a tšiea e 'ngoe le e 'ngoe.
26“U tla etsa maballo ka litšiea tsa sefate sa mositsane. Maballo a mahlano a be kaholim'a litšiea tse ka lehlakoreng le leng la leaho; 27le a mang a mahlano a be kaholim'a litšiea tse ka lehlakoreng le leng hape la leaho, 'me a mang a mahlano a be kaholim'a litšiea tse ka lehlakoreng le kamorao la leaho, ka nqeng ea bophirimela. 28Leballo le bohareng ba leaho le tla tloha ntlheng e 'ngoe ea lona, ho isa ho e 'ngoe. 29Litšiea tsena u tla li maneha khauta, u li etsetse mefitšane ea khauta, eo ho tla khoesoa maballo ho eona, 'me ao le 'ona u tla a maneha khauta.
30“U tla etsa leaho ho latela setšoantšo seo u se bontšitsoeng ha u le thabeng.
31“U tla etsa lesira ka lesela le leputsoa, le le perese, le le lefubelu, le le entsoeng ka lesela la lene, le lōehileng; e be le entsoeng ke litsebi, le hōmiloeng litšoantšo tsa likerubime. 32U tla le leketlisa litšieng tse 'ne, tse entsoeng ka lithupa tsa sefate sa mositsane, tse manehiloeng khauta. Li be le lihokelo tsa khauta, 'me li hlongoe holim'a litšehetso tsa silefera. 33U tla leketlisa lesira lihokelong, 'me ka nq'ane ho lona u bee areka ea selekane. Lesira leo le tla arohanya Sehalalelo ho Sehalalelo se halalelang ka ho fetisisa. 34Ka Sehalalelong se halalelang ka ho fetisisa u tla bea sekoahelo sa tefelo ea sebe holim'a areka ea selekane. 35U tla bea tafole ka koano ho lesira; le seluloana sa lebone pel'a tafole, ka lehlakoreng la leaho le ka nqeng ea boroa. Tafole eona u tla e bea ka lehlakoreng le ka leboea.
36“Joale ebe u etsa lesira la monyako oa Tente ea Morena; u le etse ka lesela le leputsoa, le le perese, le le lefubelu, le la lene, le lōehileng, 'me le etsoe ke sehōmi. 37Lesira leo u le etsetse litšiea tse hlano, tse entsoeng ka lithupa tsa sefate sa mositsane, tse manehiloeng khauta. Li be le lihokelo tsa khauta; u be u li etsetse litšehetso tse hlano tsa lethose.
