Selekane sea ananeloa
1Morena a re ho Moshe: “Nyolohela ho Morena, uena le Arone, le Nadabe, le Abihu, le baholo ba Baiseraele ba mashome a supileng, le e'o nkhumamela le le sebakana.” 2Moshe a le inotši a atamele ho Morena, empa ha e le ba bang ba se ke ba atamela, le sona sechaba se se ke sa nyoloha le eena.
3Moshe a tla, a bolella sechaba mantsoe 'ohle a Morena, le litaelo tsohle tsa hae, 'me sechaba sa arabela se le ntsoeleng, sa re: “Re tla phetha lipolelo tsohle tse boletsoeng ke Morena.” 4Moshe a ngola mantsoe 'ohle a Morena.
A tsoha ka malungoalungoana, a haha aletare mosikong oa thaba, a hloma lifika tsa khopotso tse leshome le metso e 'meli, ho ea ka melōko e leshome le metso e 'meli ea bana ba Iseraele. 5A rōmela bahlankana ba sechaba sa Iseraele, ba nyehela ka mahlabelo a licheso, 'me ba etsetsa Morena mahlabelo a teboho ka lipohoana. 6Moshe a nka mali, a a tšèla mafisoaneng, a khamathisa, 'me ka karolo ea mali e setseng a foka holim'a aletare. 7Joale a nka buka ea selekane, a e balla sechaba moo se ntseng se utloa, 'me sona sa re: “Re tla phetha tsohle tse builoeng ke Morena, re li hlomphe.”
8Eaba o nka mali, o foka sechaba ka 'ona, o re: “Ana ke mali a selekane seo Morena a se entseng le lōna, ho ea ka mantsoe ana 'ohle.”
9Joale Moshe, le Arone, le Nadabe, le Abihu, le baholo ba Baiseraele ba mashome a supileng, ba nyoloha. 10Ba bona Molimo oa Iseraele; tlas'a maoto a hae ho le letlapa le kang la lejoe la safire, le hloekileng joaloka maholimo. 11Empa Molimo a se ke a otla mahosana a bana ba Iseraele, 'me ha ba se ba bone Molimo ba e-ja, ba e-noa.
Moshe thabeng ea Sinai
12Morena a re ho Moshe: “Nyolohela ho 'na mona, thabeng, 'me u lule teng. Ke tla u nea matlapa a lejoe, a ngotsoeng Molao, le litaelo tseo ke li ngotseng, ho ruta Baiseraele.”
13Moshe a tsamaea le lehlahana la hae, Joshua, 'me Moshe a nyolohela thabeng ea Molimo. 14O ne a ile a re ho baholo: “Re emeleng mona, ho fihlela re khutlela ho lōna. Bo-Arone le Hure ba sala le lōna; mang kapa mang ea nang le litaba a ke a li hlahise ho bona.”
15Eaba Moshe o nyolohela thabeng, 'me leru la aparela thaba. 16Tlōtla ea Morena ea e-ba holim'a thaba ea Sinai, 'me leru la e aparela ka matsatsi a tšeletseng. Ka letsatsi la bosupa, Morena a le kahar'a leru, a bitsa Moshe. 17Ho hlaha ha tlōtla ea Morena ho ne ho tšoana le khabo ea mollo, e tukang holim'a tlhōrō ea thaba, moo bana ba Iseraele ba ntseng ba bona. 18Eaba Moshe o kena kahar'a leru, o nyolohela thabeng. Moshe a qeta matsatsi a mashome a mane, le masiu a mashome a mane, a ntse a le thabeng.
