Jethero o etela Moshe
1Jethero, moprista oa Midiane, mohoe oa Moshe, a utloa tsohle tseo Molimo a li etselitseng Moshe, le Iseraele sechaba sa hae, le hore Morena o ntšitse Iseraele Egepeta.
2Joale Jethero, mohoe oa Moshe, o ne a ile a tlisa Sefora, mosali oa Moshe, eo Moshe a neng a ile a mo khutlisetsa ha habo, 3le bara ba hae ba babeli. Lebitso la e mong oa bona e ne e le Gereshome, hobane Moshe o ne a re: “Ke bile mojaki naheng ea balichaba.” 4Lebitso la mora e mong oa hae e ne e le Eleesare, hobane Moshe o ne a re: “Molimo oa bo-ntate o ile a nthusa, 'me o ile a 'namolela ha Faro a ne a mpolaea ka sabole.”
5Ha Moshe a le lehoatateng, thabeng ea Molimo, moo a neng a hlomile teng, mohoe oa hae Jethero, a fihla moo a e-na le bara ba Moshe, le mosali oa Moshe. 6Eaba o tsebisa Moshe o re: “'Na Jethero, mohoe oa hao, ke tlile ho uena, ke e-na le mosali oa hao, le bara ba hao ba babeli bao a nang le bona.” 7Joale Moshe a tsoa ho ea khahlanyetsa mohoe oa hae; a itihela kapele ho eena, a mo aka. Ba botsana bophelo, ba nt'o kena ka tenteng.
8Moshe a phetela mohoe oa hae tsohle tseo Molimo a li entseng ho Faro le ho Baegepeta ka lebaka la Baiseraele; le litsietsi tsohle tseo ba li fumaneng tseleng, le kamoo Molimo a ba lopolotseng kateng. 9Jethero a nyakalla ka baka la tsohle tseo Morena a li etselitseng Baiseraele bao a ba lopolotseng matsohong a Baegepeta. 10Eaba Jethero o re: “Ho bokoe Morena ea le namoletseng matsohong a Baegepeta, le matsohong a Faro; ea namoletseng chaba sa hae matsohong a Baegepeta. 11Joale kea tseba hore Morena o moholo ho feta melimo eohle, hobane ruri o lopolotse sechaba sa hae ho ba neng ba ikhantšetsa sona.” 12Joale Jethero, mohoe oa Moshe, a nyehella Molimo ka sehlabelo sa secheso, le ka mahlabelo a mang. Arone, le baholo bohle ba Baiseraele, ba tla ho ja lijo le mohoe oa Moshe, kapele ho Molimo.
Ho khethoa baahloli
13Ka letsatsi la hosasane Moshe a lula khotla ho ahlola batho. Sechaba sa ema kapele ho Moshe ho tloha hoseng, ho fihlela mantsiboea. 14Mohoe oa Moshe a bona tsohle tseo Moshe a neng a li etsetsa sechaba, 'me a re: “Ke'ng ee, eo u e etsetsang sechaba? Ke ka baka la'ng ha u ahlola u le mong, 'me sechaba sohle se eme kapele ho uena ho tloha hoseng, ho fihlela mantsiboea?”
15Eaba Moshe o re ho mohoe oa hae: “Ke hobane batho ba tla ho 'na ho tla tseba thato ea Molimo. 16Ha ba e-na le linyeoe, ba tla ho 'na, 'me ke ahlolele motho le ngoan'abo, ke ba rute litaelo tsa Molimo le melao ea hae.”
17Eaba mohoe oa Moshe o re ho eena: “Ntho ena eo u e etsang ha e ntle. 18Ruri u tla khathala, uena le sechaba sena seo u nang le sona. Mosebetsi ona o u imela haholo, 'me u sitoa ho o etsa u le mong. 19Joale ak'u mamele lentsoe la ka; ke tla u eletsa, 'me Molimo a ke a be le uena! E be uena ea bang lebitsong la sechaba kapele ho Molimo, litaba tsa bona u li tlise kapele ho Molimo. 20Uena u ba rute litaelo le melao, 'me u ba tsebise tsela eo ba tšoanetseng ho tsamaea ka eona, le seo ba tšoanetseng ho se etsa. 21Har'a sechaba sohle u khethe banna ba bohlale, ba tšabang Molimo, banna ba 'nete, ba hloileng tjotjo; u ba etse babusi ba busang batho ka likete, ba busang batho ka makholo, ba busang batho ka mashome a mahlano, ba busang batho ka mashome. 22U ba etse baahloli ba sechaba ka linako tsohle. Linyeoe tsohle tse kholo ba li tlise ho uena, empa linyeoe tsohle tse nyenyane ba li ahlole. Iphokoletse mosebetsi joalo, 'me ba u imolle. 23Haeba u ka etsa taba ena, joalokaha Molimo a u laela, u tla tseba ho tiisetsa mosebetsing, le sechaba sena sohle se tla khutlela malapeng a sona ka khotso.”
24Moshe a mamela lentsoe la mohoe oa hae, 'me a etsa sohle seo a se boletseng. 25Moshe a khetha banna ba bohlale har'a Baiseraele bohle, a ba etsa lihlooho tsa sechaba: ea e-ba babusi ba batho ba likete, babusi ba batho ba makholo, babusi ba batho ba mashome a mahlano, le babusi ba batho ba mashome. 26Ba ahlolela batho ka linako tsohle. Linyeoe tse boima ba li isa ho Moshe, empa linyeoe tsohle tse nyenyane ba li ahlola ka bobona.
27Joale Moshe a lakaletsa mohoe oa hae tsela tšoeu, 'me eo a ipoella naheng ea habo.
