Metsi a tsoang lefikeng
1Sechaba sohle sa bana ba Iseraele sa tsamaea ho tloha lehoatateng la Sine; sa 'na sa tsamaea, ho ea ka taelo ea Morena, ho fihlela se hloma Refidime. Sechaba sa hloka metsi ao se a noang. 2Eaba sechaba se ipelaetsa ho Moshe, se re: “Re fe metsi, re noe!”
Moshe a re ho sona: “Ke hobane'ng ha le ipelaetsa? Le lekela'ng Morena?”
3Sechaba sa nyoreloa metsi haholo, 'me sa 'na sa korotlela Moshe, sa re: “Ke hobane'ng ha u re ntšitse Egepeta, ho tla re bolaea ka lenyora, rōna le bana ba rōna, le liphoofolo tsa rōna?”
4Moshe a ipiletsa ho Morena, a re: “Sechaba see ke tla se etsa joang? Ho se ho se hokae se ntlepetsa ka majoe!”
5Eaba Morena o re ho Moshe: “Nka ba bang ba baholo ba sechaba sa Iseraele, u ee kapele ho sona; ka letsohong la hao u nke molamu oa hao, oo u neng u otle metsi a nōka ka oona, u tsamaee. 6Bona, ke tla ema pel'a hao mane lefikeng la Horebe. U tle u otle lefika leo. Metsi a tla tsoa ho lona, 'me sechaba se tla noa.” Moshe a etsa joalo moo baholo ba sechaba sa Iseraele ba ntseng ba bona. 7Sebaka seo sa reoa lebitso la Masa le Meriba, ka baka la ho ipelaetsa ha bana ba Iseraele, le ka baka la hobane ba ne ba leka Morena, ha ba re: “Na Morena o teng har'a rōna, kapa che?”
Ntoa le Baamaleke
8Baamaleke ba fihla, ba loantša bana ba Iseraele mane Refidime. 9Moshe a re ho Joshua: “Re khethele banna, u tsamaee, u e'o loantša Baamaleke. Hosasane 'na ke tla ema holim'a tlhōrō ea leralla, ke tšoere molamu oa Molimo ka letsohong la ka.”
10Joshua a etsa joalokaha Moshe a mo laetse, a ea loantša Baamaleke; Moshe, le Arone, le Hure ba hloella holim'a tlhōrō ea leralla. 11Ha Moshe a ntse a phahamisitse matsoho a hae, Baiseraele ba ne ba hlōla, empa ha a phomotsa matsoho a hae, Baamaleke ba ne ba hlōla. 12Joale matsoho a Moshe a khathala. Ba nka lejoe, ba le bea katlas'a Moshe, 'me a lula holim'a lona. Arone le Hure ba tšehetsa matsoho a hae, e mong ka lehlakoreng lena, e mong ka ho lane; joale matsoho a hae a tiea ho fihlela letsatsi le likela. 13Joshua a hlōla Baamaleke, a ba bolaea ka sabole.
14Eaba Morena o re ho Moshe: “Ngola litaba tsena bukeng, e tle e be khopotso. U be u phetele Joshua hore ke tla felisa Baamaleke lefatšeng, hoo ba ke keng ba hlola ba hopoloa le khale.”
15Moshe a haha aletare, a e rea lebitso la “morena ke mokhele oa ka”; 16eaba o re: “Phahamisang mokhele oa Morena. Morena o tla 'ne a loantše Baamaleke kamehla eohle.”
