Esetere o etsoa mofumahali
1Kamora' tsena, hoba khalefo ea khosi Ahashuerushe e kokobele, a hopola Fashiti le seo a ileng a se etsa, le kamoo a ileng a mo ahlōla kateng. 2Eaba bahlanka ba khosi ba e sebeletsang ba re ho eona: “A ho ke ho batleloe khosi baroetsana ba batle. 3Khosi e khethe bahlankana linaheng tsohle tseo e li busang, hore ba khōbōkanye baroetsana bohle ba batle, ba ba tlise Shushane, tlung eo basali ba lulang ho eona, e boliseng ba Hegai, e leng lehaole la khosi le lebelang basali. Baroetsana bana ba fuoe litlolo tseo ba itlotsang ka tsona. 4Moroetsana ea tla khahla khosi, ke eena eo e tla ba mofumahali bakeng sa Fashiti.”
Keletso ena ea thabisa khosi, 'me khosi ea etsa joalo.
5Motseng oa Shushane, e leng motse oa bokhosi, ho ne ho e-na le monna oa Mojuda ea bitsoang Moredekai, mora oa Jaire, setlōhōlō sa Shimei, setlōhōloana sa Kishe oa Mobenjamine. 6Monna eo o ne a ile a thōpuoa Jerusalema le bathōpuoa ba neng ba thōpiloe 'moho le Jekoneea, khosi ea Juda, bao Nebukadenesare, khosi ea Babilona, a ileng a ba thōpa. 7Moredekai o ne a ile a hōlisa Hadasa, e leng Esetere, morali oa malom'ae. Esetere e ne e le khutsana, 'me e le moroetsana e motle, ea seemo se bohehang. Hoba a shoelloe ke ntat'ae le 'm'ae, Moredekai a mo hōlisa joalokaha eka ke morali oa hae.
8Ha molao le taelo ea khosi li utloahala, 'me baroetsana ba bangata ba se ba khōbōkanyelitsoe Shushane, tlung ea khosi, moo ba neng ba le boliseng ba Hegai, Esetere le eena a tlisoa tlung ea khosi, a ba boliseng ba Hegai, molebeli oa basali. 9Hegai a khahloa ke Esetere, 'me a mo rata. Hegai a potlaka, a mo nea litlolo tseo a itlotsang ka tsona, le lijo tse mo tšoanelang. A mo nea le baroetsana ba supileng ba khethiloeng tlung ea bokhosi, hore ba mo sebeletse. Hegai a isa Esetere le makhabunyane a hae sebakeng se setle tlung ea khosi, moo ho neng ho lula basali.
10Esetere o ne a sa ka a bolela hore na ke oa sechaba sefe, le hore na o tsoaloa kae, hobane Moredekai o ne a mo laile hore a se ke a bolela. 11Ka tsatsi le leng le le leng Moredekai o ne a ee a tsamaee kapele ho ntlo eo basali ba lulang ho eona, hore a tsebe hore na Esetere o ntse a phela joang, le hore na ba tla mo etsa joang.
12Baroetsana ba ne ba beetsoe nako ea selemo hore ba itlhoekise. Ka khoeli tse tšeletseng ba ne ba itlotsa ka ole ea 'mira, 'me ka khoeli tse ling tse tšeletseng ba inyanyatsa ka sente, ba itlotsa ka litlolo, ho ea ka mokhoa oa basali; ebe joale ba thobisoa ka bomong ho isoa ho khosi. 13Ka mokhoa o tjena, moroetsana e mong le e mong o ne a e-tla kapele ho khosi. Eng kapa eng eo e neng a e batla o ne a e neoa, a tsoe le eona ka tlung eo ho lulang basali ho eona, a ee le eona ka tlung ea khosi. 14Mantsiboea o ne a ee a kene ka tlung ea khosi, hoseng a khutlele tlung esele, eo ho lulang basali ho eona, e neng e le boliseng ba Shaashagase, lehaole la khosi, le neng le lebela basali ba khosi ba mafielo. Kamorao ho moo ebe ha a sa khutlela ho khosi hape, haese haeba khosi e khahliloe ke eena, 'me ea joalo o ne a thonngoa ka lebitso.
15Ha nako ea Esetere ea hore a kene ka ho khosi e fihla, a se ke a batla letho haese feela seo Hegai, lehaole la khosi, molebeli oa basali, a ileng a mo nea sona. Moredekai o ne a nkile Esetere joalokaha eka ke morali oa hae athe e ne e le morali oa Abihaele, malom'a Moredekai. Esetere a ratoa ke bohle ba neng ba mo talimile. 16Ka khoeli ea leshome, e leng khoeli ea Pherekhong, selemong sa bosupa sa puso ea khosi Ahashuerushe, Esetere a isoa ho khosi Ahashuerushe, ka tlung ea hae ea bokhosi.
17Khosi ea rata Esetere ho feta basali bohle, ea mo hauhela, ea khahloa ke eena ho feta baroetsana bohle. Eaba e mo roesa mofapahlooho oa bofumahali sebakeng sa Fashiti. 18Khosi ea etsetsa mahosana a eona le bahlanka ba eona mokete o moholo, e leng mokete oa Esetere. Khosi ea laela hore letsatsi leo e be la phomolo linaheng tsa eona; ea fana le ka limpho tse lokelang boemo ba khosi.
Moredekai o pholosa khosi
19Ha baroetsana ba se ba khōbōkantsoe khetlo la bobeli, Moredekai o ne a lutse monyakong oa khosi. 20Esetere o ne a e-s'o ka a bolela hore o tsoaloa kae, le hore na ke oa sechaba sefe, ho ea kamoo Moredekai a ileng a mo laea kateng. Esetere a phetha taelo ea Moredekai, joalokaha a ile a etsa ha a ne a mo holisa.
21Hona matsatsing ao, ha Moredekai a lutse monyakong oa khosi, mahaole a mabeli a khosi, e leng Bigitane le Tereshe, e leng a mang a balebeli ba monyako, a halefa, 'me a rera ho bolaea khosi Ahashuerushe. 22Moredekai a utloela morero ona, 'me a tsebisa mofumahali Esetere. Esetere a bolella khosi taba ena lebitsong la Moredekai. 23Ha etsoa patlisiso, 'me ha fumanoa taba ena e le 'nete. Banna bao ba babeli ba fanyehoa sefateng. Taba ena ea ngoloa Bukeng ea Liketsahalo, moo khosi e ntseng a bona.
