Mofumahali Fashiti o tlōla taelo ea khosi Ahashuerushe
1Taba tsena li etsahetse mehleng ea Ahashuerushe ea neng a busa linaha tse lekholo le mashome a mabeli a metso e supileng, e leng ho tloha naheng ea India ho ea fihla naheng ea Kushe. 2Hona mehleng eo, khosi Ahashuerushe o ne a lutse teroneng ea hae, motseng oa Shushane, e leng motse oa bokhosi.
3Ka selemo sa boraro sa puso ea hae, a etsetsa mahosana 'ohle a hae le bahlanka ba hae, mokete. Balaoli ba mabōtho a Peresiea le Media, le mahosi le mahosana, le bona ba ne ba le teng. 4A nka matsatsi a lekholo le mashome a robeli a ntse a ba bontša matlotlo a 'muso oa hae o khabane, le tlōtla ea botlōtlehi ba hae.
5Ha matsatsi ana a se a fetile, khosi ea etsetsa sechaba sohle sa eona mokete motseng oa Shushane, e leng motse oa bokhosi. Mokete ona oa etsetsoa mahosana le bafo, 'me oa qeta matsatsi a supileng. O ne o tšoaretsoe mabaleng a serapa sa ntlo ea khosi. 6Ho ne ho e-na le masela a masoeu, le a maputsoa, a neng a leketlisitsoe khoeleng e entsoeng ka lesela le lōhehileng, le perese, a tlameletsoe mefitšaneng e neng e entsoe ka silefera, 'me e hoketsoe litšieeng tsa mahakoe a masoeu. Litulo tse nang le mesamo li ne li entsoe ka khauta le ka silefera, li beiloe holim'a lebala le katiloeng ka mahakoe a mafubelu, le a masoeu, le a boputsoa ba leholimo, le a matšo. 7Ba ba qhatsetsa lino ka linoelong tsa mefuta-futa tsa khauta le tsa silefera. Veine ea khosi e ne e le ngata haholo, ho ea kamoo khosi e neng e fana kateng. 8Ho ne ho nooa ka molao oa hore ho se be ea qobelloang. Khosi e ne e laetse bahlanka ba eona hore ba etsetse motho ka mong kamoo a ratang kateng.
9Mofumahali Fashiti le eena a etsetsa basali mokete ka tlung ea khosi Ahashuerushe.
10Ka letsatsi la bosupa, ha khosi e thabisitsoe ke ho noa veine, ea bitsa Mehumane, le Biseta, le Harebona, le Bigita, le Abakata, le Setare, le Karakase, e leng mahaole a supileng a neng a sebeletsa khosi. 11Ea a laela hore a tlise mofumahali Fashiti kapele ho khosi, a roetse mofapahlooho oa bofumahali, hore sechaba le mahosana a tl'o boha botle ba hae, hobane mofumahali o ne a le motle haholo. 12Empa mofumahali Fashiti a hana ho tla ha mahaole a mo tsebisa taelo ea khosi. Ka baka lena, khosi ea halefa haholo, 'me khalefo ea eona ea tlōkōma.
13Kaha e ne e le tloaelo ea khosi ho rerisana le bohle ba neng ba tseba molao le likahlōlo, eaba e bua le banna ba bohlale, ba neng ba tseba mehla eo. 14Bao e neng e le liphatho tsa khosi ke bana: Kareshena, le Shetare, le Ademate, le Tarashishe, le Merese, le Maresena, le Memukane, e leng mahosana a supileng, a tsoang Peresiea le Media, 'ona matona a neng a ema kapele ho khosi, 'me e le 'ona a ka sehloohong 'musong.
15Eaba khosi e re ho bona: “Kaha mofumahali Fashiti a sa phetha taelo ea khosi Ahashuerushe, eo a mo rōmetseng eona ka mahaole a hae, ho ea ka molao eka khona mofumahali a etsoe joang?”
16Eaba Memukane o araba a le kapele ho khosi le mahosana, o re: “Mofumahali Fashiti ha a ea siteloa khosi feela, empa o sitetsoe le mahosana 'ohle, le lichaba tsohle tse linaheng tse busoang ke khosi Ahashuerushe. 17Ketso ena ea mofumahali e tla phatlalla, e fihle ho basali bohle, 'me ka hona ba tla tella banna ba bona, ha ba utloa hore khosi Ahashuerushe o ile a laela mofumahali Fashiti hore a tle ho eena, empa mofumahali a hana ho tla. 18Hona kajeno, likhosatsana tsa Peresiea le Media tse utloileng tsa boitšoaro bona ba mofumahali, li tla etsa joalo ho mahosana a khosi, 'me ho hlomphollana le ho halefelana ho ke ke ha hlola ho fela.
19“Haeba khosi e ka khahloa, a ho ke ho tsoe taelo ea khosi, 'me e ngoloe melaong ea Peresiea le ea Media, e le hore taelo eo e se ke ea fetoloa, ho thoe Fashiti a ke ke a hlola a ema kapele ho khosi Ahashuerushe. Litokelo tsa hae tsa bofumahali li neoe e mong e motle ho mo feta. 20Ha taelo ena ea khosi e tla etsoa, e phatlalatsoa hohle 'musong oa khosi o namileng, basali bohle ba tla hlompha banna ba bona, ebang banna bao ke mahosana kapa ke bafo.”
21Keletso ena ea thabisa khosi le mahosana, 'me khosi ea etsa kamoo Memukane a elelitseng kateng. 22Eaba khosi e rōmela mangolo linaheng tsohle tseo e li busang, naha ka 'ngoe ea ngolloa ka mongolo oa eona, sechaba ka seng sa ngolloa ka puo ea sona, ha thoe monna e mong le e mong a laole lelapa la hae, ho buuoe puo ea habo.
