Esetere o etsoa mofumahali
1Ka mora' tsena, hoba khalefo ea khosi Ahashuerushe e kokobele, ha aa ka a hlola a bua ka Fashiti, a ntse a hopotse seo Fashiti a ileng a se bolela le kamoo a ileng a mo ahlola kateng. 2Eaba bahlanka ba khosi ba re: “A ho ke ho batleloe khosi baroetsana ba batle. 3Khosi e ke e romele maqosa linaheng tsohle tsa 'muso oa eona, hore a khethe baroetsana ba batle 'me a ba tlise Shushane, tlung ea basali. Ba be boliseng ba lehaole la khosi le lebelang basali. Baroetsana bana ba fuoe litlolo le tsohle tse ling tseo ba li hlokang. 4Mosetsana ea tla khahla khosi, ke eena eo e tla ba mofumahali bakeng sa Fashiti.”
Keletso ena ea thabisa khosi, e ileng ea etsa joalo.
5Motseng oa Shushane, ho ne ho e-na le monna oa Mojuda ea bitsoang Moredekai, mora oa Jaire, mora oa Shimei, mora oa Kishe, oa leloko la Benjamine. 6E ne e le mohapuoa ea tsoang Jerusalema, ea neng a hapiloe ke Nebukadenesare, khosi ea Babilona. 7Moredekai o ne a ile a holisa ngoananyana, morali oa malom'ae Aminadabe, lebitso la hae e le Esetere. Ka mora' lefu la batsoali ba hae, Moredekai a mo holisa hore e tle e be mosali oa hae ka nako e tlang. Moroetsana eo o ne a le motle.
8Hoba ho phatlalatsoe taelo ea khosi, baroetsana ba bangata ba khobokanyetsoa motseng oa Shushane, boliseng ba Hegai. Esetere le eena a tlisoa ho Hegai, molebeli oa basali. 9Eo a khahloa ke Esetere, 'me o mo rata. A phakisa a mo nea litlolo tsa hae le lijo tse mo tšoanelang; a mo nea le baroetsana ba supileng ba khethiloeng tlung ea bokhosi, hore ba mo sebeletse. A mo tšoara hantle, eena le makhabunyane a hae, tlung ea basali.
10Esetere o ne a sa ka a bolela hore na ke oa sechaba sefe, le hore na o tsoaloa kae; hobane Moredekai o ne a mo laile hore a se ke a bolela. 11Hape, ka letsatsi le leng le le leng Moredekai o ne a ee a tsamaee ka pele ho ntlo ea basali, lebaleng la eona, a lebella ho bona se tla hlahela Esetere.
12Baroetsana ba ne ba beetsoe nako ea selemo pele ba ka hlaha ka pele ho khosi. Ba ne ba itokisetsa tjena: ka khoeli tse tšeletseng ba ne ba itlotsa ka ole ea 'mira, 'me ka khoeli tse ling tse tšeletseng ba inyanyatsa ka sente, ba itlotsa ka litlolo tse sebelisoang ke basali bakeng sa botle ba bona; ebe ba isoa ka bomong ho khosi. 13Monna ea beiloeng o ne a lumella moroetsana ho tsoa tlung ea basali le ho ea le eena tlung ea bokhosi. 14Mantsiboea o ne a ee a ee teng; hoseng a khutlele tlung ea basali ea bobeli, e lebetsoeng ke Hegai, lehaole la khosi. Ka morao ho moo ebe ha a sa khutlela ho khosi hape, haese haeba a bitsoa ka lebitso.
15Ha nako ea Esetere, morali oa Aminadabe malom'a Moredekai, e fihla ea hore a kene ka ho khosi, o ne a sa ka a hana leha e le e 'ngoe ea litaelo tsa lehaole le neng le lebela basali. Ha e le 'nete, Esetere o ne a ratoa ke bohle ba neng ba mo bona. 16Esetere a kena ka ho khosi Ahashuerushe ka khoeli ea leshome le metso e 'meli, e leng ea Adare, selemong sa bosupa sa puso ea hae.
17Khosi ea rata Esetere, ea khahloa ke eena ho feta baroetsana bohle. Eaba ea mo roesa mofapahlooho oa mohats'a eona. 18Khosi ea etsetsa metsoalle eohle ea eona, le bohle ba boemong, mokete o qetang matsatsi a supileng, ho keteka lenyalo la hae le Esetere. Ea ba ea fokoletsa batho bohle ba 'muso oa eona makhetho.
Moredekai o pholosa khosi
19Moredekai o ne a sebeletsa lekhotleng la khosi. 20Esetere o ne a e-s'o ka a bolela hore o tsoaloa kae; Moredekai o ne a mo laele joana: a tšabe Molimo 'me a phethe melao ea hae, joalokaha a ile a etsa ha a ne a mo holisa. Esetere ha aa ka a fetola metsamao ea hae.
21Mahaole a mabeli a khosi, ao e neng e le balaoli ba basireletsi ba bophelo ba khosi, ba ne ba ile ba khopisoa ke ho tlotloa ha Moredekai, 'me ba ne ba batla ho bolaea khosi Ahashuerushe. 22Empa Moredekai a ne a utloela taba ena. A tsebisa Esetere, ea ileng a senolela khosi tsa morero ona. 23Khosi ea botsisisa mahaole ao a mabeli; a ba a fanyehoa. Ho tlotla Moredekai, khosi ea laela hore litaba tsena li ngoloe libukeng tsa bokhosi, e le hore ho 'ne ho hopoloe thuso eo motho eo a e entseng.
