ESETERE (SEGERIKE) F

₁Moredekai o ne a re: “Tsena tsohle li tsoa ho Molimo. ₂Ke ntse ke hopola toro eo ke ileng ka ba le eona, e amanang le litaba tsena; ha ho leha e le e 'ngoe ea tseo ke ileng ka li bona, e sa kang ea phethahala.

₃“Seliba se fokolang se ile sa fetoha noka; 'me ha e-ba teng leseli, le letsatsi, le metsi a mangata-ngata. Noka ke Esetere, eo khosi e ileng ea mo nyala 'me ea mo etsa mofumahali. ₄Likhanyapa tse peli ke Hamane le 'na. ₅Lichaba ke batho ba ileng ba khobokanela ho felisa lebitso la Bajuda. ₆Sechaba sa heso ke Iseraele; ke ba ileng ba hoeletsa ho Molimo 'me ba pholosoa. Morena o pholositse sechaba sa hae, 'me a re ntša bomalimabeng bona bohle. Molimo a etsa meka le mehlolo, e neng e e-s'o etsahale har'a balichaba. ₇Etsoe o ne a khaotse ka lotho, hore na se tla hlahela sechaba sa Molimo ke sefe, le se tla hlahela balichaba ke sefe. ₈Joale ha fihla nako le motsotso oa hore se laotsoeng joalo se phethahale, tsatsing la kahlolo ea Molimo ea lichaba tsohle. ₉Molimo a hopola sechaba sa hae, 'me a bontša ho loka ha bao e leng lefa la hae.

₁₀“Ka hona, ho Bajuda matsatsi ana a khoeli ea Adare, e leng la leshome le metso e mene, le la leshome le metso e mehlano khoeling eona eo, e tla ba matsatsi ao ka 'ona ba tla phuthehela ka pele ho Molimo, ka thabo le nyakallo, melokong eohle ea sechaba sa hae sa Iseraele, ho isa khale.”

₁₁Selemong sa bone sa puso ea Potolemea le Keleopatera, Dosithea ea ileng a ipolela e le moprista oa Molevi, a e-na le Potolemea, mora oa hae, ba ile ba tlisa lengolo lena le kaholimo, le amanang le mokete oa 'Purime'. Ba bolela hore ke la 'nete, le hore le ile la fetoleloa ke Lisimakose, mora oa Potolemea, e mong oa baahi ba Jerusalema.