ESETERE (SEGERIKE) 7

₁Joale khosi le Hamane ba tla moketeng oa lijo oa mofumahali. ₂Khetlong lena la bobeli, ha ho ntse ho nooa veine, khosi ea re ho Esetere: “Ke'ng, mofumahali Esetere? Thapeli ea hao ke efe, kopo ea hao ke efe? E tla phethoa, leha e ka ba halofo ea 'muso oa ka.” ₃A araba, a re: “Haeba ke hauhetsoe ke khosi, ho ke ho baballoe bophelo ba ka, ho ea ka thapeli ea ka, le bophelo ba sechaba sa heso, ho ea ka kopo ea ka. ₄Rona le sechaba sa heso, re se re rekisitsoe hore re timetsoe, re hapeloe, re etsoe makhoba; rona le bana ba rona, re etsoe bahlanka le makhabunyane; empa ke ne ke sa batle ho lumela, hobane moetselletsi e mobe hakaalo ha a lokele ho ba teng lekhotleng la khosi.” ₅Eaba khosi e re: “Ke mang ea bileng le sebete sa ho etsa joalo?” ₆Esetere a araba, a re: “Ke sera, Hamane, motho eo ea khopo.”

Hamane a tšoha haholo ka pele ho khosi le mofumahali. ₇Khosi ea siea mokete, ea ea ka serapeng, ha Hamane eena a qala ho rapela mofumahali, hobane o ne a lemohile hore litaba tsa hae li mpe. ₈Eare ha khosi e khutla serapeng, Hamane o ne a itihetse setulong sa sofa sa mofumahali, a ntse a mo kopa mohau. Eaba khosi e re: “U batla esita le ho beta mosali oa ka, le hona ka tlung ea ka?” Ha Hamane a utloa mantsoe ana, a reteletsa sefahleho, a hlabiloe ke lihlong. ₉Joale Bugathane, e mong oa mahaole a khosi, a re ho khosi: “Bonang! Ho na le sefate seo Hamane a se lokiselitseng Moredekai, ea neng a senolela khosi morero o amanang le eona; ke sefate se bophahamo ba limethara tse mashome a mabeli a metso e 'meli, se hlonngoeng ha Hamane.” Khosi ea re: “Fanyehang Hamane hona sefateng seo!”

₁₀Eaba Hamane o fanyehoa hona sefateng se neng se lokiselitsoe Moredekai, 'me motsotsong oo khalefo ea khosi ea kokobela.