Joshua o hlahlama Moshe
1Moshe a ea, a bua mantsoe ana ho Baiseraele bohle. 2A re ho bona: “Kajeno ke na le lilemo tse lekholo le mashome a mabeli. Ke se ke sitoa ho ea kae kapa kae, 'me Morena o itse ho 'na: ‘Uena ha u ka ke ua tšela Jorodane.’ 3Ke Morena Molimo oa lōna, ea tla tšela a le eteletse pele. O tla timetsa lichaba tsena tse kapele ho lōna, le hape naha ea tsona. Joshua ke eena ea tla tšela a le eteletse pele, joalokaha Morena a buile. 4Seo Morena a neng a se etse ho Sihone le ho Oge, likhosi tsa Baamore, tseo a neng a li timetse, a ba a se etsa le naheng ea tsona, le ho lichaba tsena o tla se etsa. 5Morena o tla le neela tsona, 'me le tle le li etse ho ea ka litaelo tsohle tseo ke le laetseng tsona. 6Tsohang molōta, le be sebete; le se ke la li tšaba kapa la li tšoha, hobane Morena Molimo oa lōna, ke eena ea tsamaeang le lōna. A ke ke a le lahla kapa a le furalla.”
Ho bitsoa ha Joshua
7Moshe a bitsa Joshua, 'me moo Baiseraele bohle ba ntseng ba bona, a re ho eena: “Tsoha molōta, u be sebete, hobane ke uena ea tla tsamaea le sechaba sena, ho ea kena naheng eo Morena a neng a hlapanyetse bo-ntat'a sona, hore o tla se nea eona. Uena u tla etsa hore se e je lefa. 8Ke Morena ea tla u etella pele. O tla ba le uena; a ke ke a u lahla kapa a u furalla. U se ke ua tšaba kapa ua tsieleha.”
Molao o n'o baloa kamora' lilemo tse supileng
9Moshe a ngola Molao ona, a o nea baprista, e leng bara ba Levi, ba neng ba jara areka ea selekane sa Morena; a o nea le baholo bohle ba Iseraele. 10Moshe a ba laela, a re: “Qetellong ea selemo sa bosupa, ka nako e beetsoeng ho leballana melato, ka mokete oa maphèphè, 11ha Baiseraele bohle ba tlil'o hlaha kapele ho Morena Molimo oa lōna, sebakeng seo a tla se khetha, le bale Molao ona moo Baiseraele bohle ba leng teng, 'me ba ntseng ba utloa. 12Le phuthe batho: banna, le basali, le bana, le bajaki ba teng metseng ea lōna; e le hore ba tle ba utloe, le hore ba tle ba ithute, ba tšabe Morena Molimo oa lōna, 'me ba hlokomele ho phetha lipallo tsohle tsa Molao ona. 13Le bana ba lōna, ba e-s'ong ho tsebe Molao ona, ba tle ba utloe, ba ithute ho tšaba Morena Molimo oa lōna, ka matsatsi 'ohle ao le tla a phela naheng eo le tšelang Jorodane hore e be ea lōna.”
Morena o laela Moshe la ho qetela
14Morena a re ho Moshe: “Bona, matsatsi a ho shoa ha hao a ntse a atamela. Bitsa Joshua, u tle le eena ka Tenteng ea Morena, 'me ke tla mo nea taelo.”
Bo-Moshe le Joshua ba ea, ba kena ka Tenteng ea Morena. 15Morena a hlaha ka Tenteng, a le kahar'a leru le lopaletseng. Leru leo le lopaletseng la ema monyako oa Tente.
16Eaba Morena o re ho Moshe: “Bona, u se u tla ithoballa le bo-ntat'ao, empa sechaba sena se tla hloka botšepehi ho 'na, se khelohe, se latele melimo e meng ea balichaba ba naha, eo se eang ho phela har'a bona. Se tla mphuralla, se koenehele selekane sa ka, seo ke se entseng le sona. 17Mohlang hoo ho etsahalang, ke tla se halefela haholo, ke se furalle, ke se patele sefahleho sa ka. Se tla timela, se hlaheloe ke bomalimabe bo tšabehang le litsietsi tse ngata. Mohlang oo se tla re: ‘Na hase hobane Molimo oa rōna a le sieo kahar'a rōna, ha e le moo re hlaheloa ke bomalimabe boo?’ 18Empa ruri ke tla pata sefahleho sa ka mohlang oo, ka baka la bokhopo bohle boo se bo entseng, hobane se latetse melimo e meng.
Sefela sa bopaki
19“Ka baka leo, ingolle sefela sena, u se rute bana ba Iseraele. Ba se tsebe ka hlooho, e le hore sefela sena e tle e be paki ea ka, e tsoang bana ba Iseraele. 20Ke tla ba fihlisa naheng eo ke neng ke e hlapanyetse bo-ntat'a bona, e phallang lebese le mahe a linotši, 'me ba tla ja, ba khōre, ba none. Empa ba tla latela melimo e meng, ba e sebeletse, ebe baa 'nyelisa, ba koenehela selekane sa ka. 21Etlare ha bomalimabe bo tšabehang, le litsietsi tse ngata li ba oetse holimo, ebe sefela sena e ba paki e ba tsoang, hobane litlōhōlō tsa bona li tla be li sa lebala ho se bina. Ke se ke ntse ke tseba mehopolo eo ba e hopolang kajeno, le pele ke ba fihlisa naheng eo ke neng ke e hlapanyetse bo-ntat'a bona.”
22Ka lona letsatsi leo Moshe a ngola sefela sena, a se ruta bana ba Iseraele.
23Morena a laela Joshua, mora oa Nune, a re: “Tsoha molōta, u be sebete, hobane ke uena ea tla fihlisa bana ba Iseraele naheng eo ke ba hlapanyelitseng eona. Ke tla ba le uena.”
24Eare ha Moshe a qetile ho ngola mantsoe a Molao ona bukeng, 25a laela Balevi, bajari ba areka ea selekane sa Morena Molimo oa bona, a re: 26“Nkang Buka ena ea Molao, le e bee pel'a areka ea selekane sa Morena Molimo oa lōna, e le hore e be moo, e le paki e le tsoang. 27Ke tseba kamoo le feto-fetohang kateng, le kamoo le leng manganga kateng. Bonang, esita le kajeno, ke ntse ke phela le lōna tjena, le 'nile la fetohela Morena. Joale le tla mo fetohela hakae, ha ke se ke shoele? 28Mpitsetseng baholo bohle ba merabe ea lōna, le baokameli ba lōna, 'me ke tla bua mantsoe ana moo ba ntseng ba utloa. Leholimo le lefatše e tla ba lipaki tse le tsoang. 29Kea tseba hore kamora' lefu la ka ruri le tla itšilafatsa, le khelohe tsela eo ke le laetseng eona. Hamorao bomalimabe bo tla le oela holimo, ha le etsa bokhopo mahlong a Morena, le mo halefisa ka mesebetsi eo le e etsang.”
30Eaba Moshe o bolella phutheho eohle ea bana ba Iseraele mantsoe a sefela sena, moo ba ntseng ba utloa, ho fihlela a a qeta.
