LIPOLELO 29

₁Ana ke 'ona mantsoe a selekane seo Morena a neng a laele Moshe hore a se etse le bana ba Iseraele ha ba le naheng ea Moabe; e le se seng hape, ntle ho seo a neng a se etse le bona ha ba le thabeng ea Horebe.

₂Moshe a bitsa Baiseraele bohle, a re ho bona: “Ka mahlo a lōna le bone tsohle, tseo Morena a ileng a li etsa naheng ea Egepeta, ho Faro, le ho bahlanka ba hae bohle, le naheng ea hae eohle; ₃e leng meleko e meholo eo le e boneng ka mahlo a lōna, le lipontšo tse kholo, le mehlolo e meholo. ₄Empa ho fihlela le kajeno Morena ha a e-s'o le nee likelello tse utloisisang, le mahlo a bonang, le litsebe tse utloang. ₅Ka lilemo tse mashome a mane ke ile ka le etella pele lehoatateng, empa liaparo tsa lōna ha lia ka tsa taboha, le lieta tsa lōna ha lia ka tsa fela. ₆Ha lea ka la ja bohobe, ha lea ka la noa veine kapa joala, e le hore le tle le tsebe hore ke 'na Morena Molimo oa lōna.

₇“Ha le fihla sebakeng sena, Sihone, khosi ea Heshebone, le Oge, khosi ea Bashane, ba ile ba re futuhela, ba re loantša, empa ra ba hlōla. ₈Ra hapa naha ea bona, 'me ra e nea ba morabe oa Rubene, le oa Gade, le karolo e 'ngoe ea morabe oa Manase, e le lefa.

₉“Ka baka lena he, bōlōkang mantsoe a selekane sena, le a phethe, e le hore le tle le atlehe ho tsohle tseo le li etsang.

₁₀“Kajeno lena, bohle le eme kapele ho Morena Molimo oa lōna: mahosana a merabe ea lōna, baholo ba sechaba sa lōna, le balaoli ba lōna, le banna bohle ba Iseraele, ₁₁bana ba lōna, basali ba lōna, le bajaki ba kahar'a liahelo tsa lōna, ho tloha ka motho ea roallang, ho isa ho ea khang metsi. ₁₂Le kena selekaneng sa Morena Molimo oa lōna, le kanong ea hae, eo Morena Molimo oa lōna a e etsang ho lōna kajeno; ₁₃hore a tle a le etse sechaba sa hae, eena e be Molimo oa lōna joalokaha a ile a bua ho uena, le kamoo a ileng a hlapanyetsa bo-ntat'a lōna Aborahama, Isaka, le Jakobo. ₁₄Hase le lōna feela a etsang selekane sena, le kano ena, ₁₅empa o li etsa le bohle ba nang le rōna kajeno, kapele ho Morena Molimo oa rōna, esita le bohle bao kajeno ba e-s'ong ho tsoaloe.

₁₆“Le tseba kamoo re neng re ahile kateng Egepeta, le kamoo re fetileng har'a lichaba tseo re fetileng har'a tsona. ₁₇Le bone manyala a tsona, le melimo ea tsona ea bohata, ea lehong, le ea lejoe, le ea silefera, le ea khauta, e neng e le har'a tsona. ₁₈Har'a lōna ho se be monna kapa mosali, kapa ba lelapa, kapa ba morabe, bao kajeno lipelo tsa bona li ka furallang Morena Molimo oa rōna, 'me ba ea ho sebeletsa melimo ea lichaba tseo, esere mohlomong har'a lōna ha e-ba le mothapo o behang leshokhoa le lengana.

₁₉“Ho se be eo ereng ha a utloa mantsoe a kano ena, a re: ‘Ke tla phela ka khotso, leha nka latela boithatelo ba pelo ea ka, hobane ba khopo le ba lokileng ba tla timela ka ho tšoana.’ ₂₀Morena a ke ke a mo tšoarela, empa khalefo ea Morena le lefufa la hae li tla tlōkōmela monna eo. Lithōhako tsohle tse ngotsoeng kahar'a buka ena, li tla mo oela holimo. Morena o tla felisa lebitso la hae lefatšeng. ₂₁Har'a merabe eohle ea Iseraele, Morena o tla mo khethollela hore a timetsoe, ho ea ka lithōhako tsohle tse ngotsoeng Bukeng ea Molao.

₂₂“Melōko e tlang, e leng litlōhōlō tsa lōna tse tla tsoaloa, le mojaki ea tsoang naheng e hōle, ba tla bona lioa tsa naha ena, le maloetse a eona, ao Morena a e otlang ka 'ona. ₂₃Mobu o tla fetoha sebabole le letsoai, naha eohle e be letsoatlare le cheleng, le sa jaloang, le sa beheng, le se nang joang, joalokaha ho ne ho timetsoa Sodoma le Gomora, le Adema le Seboime, tseo Morena a neng a li timetsa ha a halefile, a le bohale-hale. ₂₄Joale lichaba tsohle li tla re: ‘Ke ka baka la'ng, ha Morena a entse naha ee tjee? Khalefo e kaale-kaale e bolela'ng?’

₂₅“Batho ba tla re: ‘Ke hobane ba furaletse selekane sa Morena Molimo oa bo-ntat'a bona, seo a ileng a se etsa le bona ha a ne a ba ntša naheng ea Egepeta. ₂₆Ba ile ba ea sebeletsa melimo e meng, ba khumamela melimo eo ba sa e tsebeng, eo a sa kang a ba nea eona. ₂₇Ka baka leo, khalefo ea Morena e ile ea tlōkōmela naha eo, a e tlisetsa lithōhako tsohle tse ngotsoeng kahar'a buka ena. ₂₈Morena a halefa, a ba bohale-hale, a ba phahla naheng ea bona, 'me ka khalefo e kholo a ba lelekela naheng esele moo ba ntseng ba le hona teng le kajeno-ea-bokajeno.’

₂₉“Liphiri tsohle ke tsa Morena Molimo oa rōna, empa lintho tse senotsoeng ke tsa rōna, le tsa bana ba rōna kamehla eohle, e le hore re phethe lipallo tsohle tsa Molao ona.