Molao o ngoloe Baiseraele ba le holim'a thaba ea Ebale
1Bo-Moshe le baholo ba Iseraele ba laela sechaba, ba re: “Bōlōkang melao eohle eo ke le laelang eona kajeno. 2Mohl'a letsatsi leo ka lona le tšelang Jorodane, le kenang naheng eo Morena Molimo oa lōna, a le neang eona, le hlome majoe a maholo, le a lile ka phepa. 3Ha le se le tšetse le ngole mantsoe 'ohle a molao ona holim'a majoe ao, e le hore le tle le kene naheng eo Morena Molimo oa lōna, a le neang eona; e leng naha e phallang lebese le mahe a linotši, joalokaha Morena Molimo oa bo-ntat'a lōna, a le tšepisitse. 4Ha le se le tšetse Jorodane, majoe ana le tla a hloma holim'a thaba ea Ebale, le a lile ka phepa joalokaha ke le laela kajeno. 5Le tla hahela Morena Molimo oa lōna, aletare hona moo; e be aletare ea majoe, 'me le se ke la a betla ka tšepe. 6Le tla haha aletare ena ea Morena Molimo oa lōna, ka majoe a sa betloang, 'me holim'a eona le etsetse Morena Molimo oa lōna, linyehelo tsa secheso. 7Le etse le sehlabelo sa nyehelo ea teboho; le se jelle hona moo, 'me le thabe kapele ho Morena Molimo oa lōna. 8Holim'a majoe ana le ngole mantsoe 'ohle a molao ona ka mokhoa o bonahalang hantle.”
9Moshe, a e-na le baprista, e leng Balevi, a bua le Baiseraele bohle, a re: “Tsie lala! Mamelang, lōna Baiseraele! Ka letsatsi lena le se le le sechaba sa Morena Molimo oa lōna. 10Ka baka lena, le tla mamela lentsoe la Morena Molimo oa lōna, le phethe melao ea hae, le litaelo tsa hae, tseo ke le laelang tsona kajeno.”
11Ka lona letsatsi leo Moshe a laela sechaba, a re: 12“Ha le se le tšetse Jorodane, merabe ena, e leng ea Simeone, le ea Levi, le ea Juda, le ea Isakare, le ea Josefa, le ea Benjamine, e tla ema holim'a thaba ea Gerisime, e hlohonolofatse sechaba sena. 13Merabe ea bo-Rubene le Gade, le Ashere, le Sebulone, le Dane, le Nafthali, eona e tla ema holim'a thaba ea Ebale, e phatlalatse thōhako.
Lithōhako tse leshome le metso e 'meli
14“Balevi ba tla hōoeletsa, ba re ho sechaba sohle sa Iseraele:
15“ ‘Ho rōhakehe ea etsang setšoantšo se betliloeng, kapa se bōpiloeng ka tšepe, se entsoeng ke matsoho a setsebi, 'me a se khumamela sephiring e leng ntho e manyala ho Morena!’
“Sechaba sohle se arabele, se re: ‘A ho be joalo!’
16“ ‘Ho rōhakehe ea sa hlompheng ntat'ae kapa 'm'ae!’
“Sechaba sohle se re: ‘A ho be joalo!’
17“ ‘Ho rōhakehe ea suthisang mōkōlōkōtoane oa mohahabo!’
“Sechaba sohle se re: ‘A ho be joalo!’
18“ ‘Ho rōhakehe ea khelosang sefofu tseleng ea sona!’
“Sechaba sohle se re: ‘A ho be joalo!’
19“ ‘Ho rōhakehe ea sokamisang kahlōlo ea mojaki, kapa ea khutsana, kapa ea mohlolohali!’
“Sechaba sohle se re: ‘A ho be joalo!’
20“ ‘Ho rōhakehe ea robalang le mosali oa ntat'ae, hobane o hlompholla liphate tsa ntat'ae!’
“Sechaba sohle se re: ‘A ho be joalo!’
21“ ‘Ho rōhakehe ea robalang phoofolo!’
“Sechaba sohle se re: ‘A ho be joalo!’
22“ ‘Ho rōhakehe ea robalang le khaitseli ea hae, kapa le morali oa ntat'ae, kapa le morali oa 'm'ae!’
“Sechaba sohle se re: ‘A ho be joalo!’
23“ ‘Ho rōhakehe ea robalang le mohoehali oa hae!’
“Sechaba sohle se re: ‘A ho be joalo!’
24“ ‘Ho rōhakehe ea bolaeang mohahabo ka sekhukhu!’
“Sechaba sohle se re: ‘A ho be joalo!’
25“ ‘Ho rōhakehe ea amohelang tjotjo, hore a bolaee motho, a tšolle mali a se nang molato!’
“Sechaba sohle se re: ‘A ho be joalo!’
26“ ‘Ho rōhakehe ea sa phethahatseng lipallo tsa molao ona ka ho li etsa!’
“Sechaba sohle se re: ‘A ho be joalo!’
