LIPOLELO 19

₁“Ha Morena Molimo oa hao, a timetsa lichaba tseo a le neang naha ea tsona, le tla hapa naha eo ea tsona, le ahe metseng ea tsona le matlung a tsona. ₂Le tla ikhethela metse e meraro naheng eo Morena Molimo oa lōna, a le neang eona hore e be ea lōna. ₃Le lokise litsela tse eang metseng eo, 'me naha eo Morena Molimo oa lōna, a le neang eona hore e be lefa la lōna, le e arole likarolo tse tharo, e be moo 'molai e mong le e mong a tla tšabela teng.

₄“'Molai ea tla tšabela moo, hore a ipholose, ke ea tjena: ke ea bolaeang e mong e se ka morero, 'me eo e ne e se sera sa hae ka nako e fetileng. ₅Mohlala ke ona: haeba a e-ea morung le ngoan'abo ho ea rema lifate, ere ha a phahamisa selepe ho rema sefate, selepe seo se pshemohe mofenng, se rathe ngoan'abo, ebe oa shoa, eo ke eena ea tla tšabela ho o mong oa metse ena, hore a pholohe. ₆Mophetetsi oa mali a tšolotsoeng a se ke a lelekisa 'molai eo, a sa ntsane a befile haholo, a mo tšoara, haeba tsela e le telele, a 'molaea; athe o ne a sa lokela ho shoa, hobane ka nako e fetileng e ne e se sera sa 'molauoa. ₇Ka baka leo, ke le laela hore le ikhethele metse e meraro.

₈“Haeba Morena Molimo oa lōna, a atolosa meeli ea naha ea lōna, joalokaha a ile a hlapanyetsa bo-ntat'a lōna, 'me a le nea naha eohle eo a ileng a tšepisa hore o tla e nea bo-ntat'a lōna; ₉haeba le bōlōka melao eohle eo ke le laelang eona kajeno, le e phetha; le rata Morena Molimo oa lōna, le tsamaea litseleng tsa hae kamehla, teng he, le tla eketsa metse e meng e meraro holim'a ena e meraro. ₁₀Ho se be mali a se nang molato a tla tšolloa naheng eo Morena Molimo oa lōna, a le neang eona hore e be lefa la lōna, esere la jara molato oa ho tšolla mali.

₁₁“Empa haeba motho e le sera sa motho e mong, a lalla motho eo, a mo tsohela matla, a 'molaea, eba o tšabela ho o mong oa metse ena; ₁₂baholo ba motse oa habo ba tla rōmela batho ho mo lata moo, ba mo nee mophetetsi oa mali a tšolotsoeng hore a 'molaee. ₁₃U se ke ua mo talima ka mohau, u mpe u hlakole sekhobo sa mali a se nang molato, a tšolotsoeng naheng ea Iseraele, e le hore le tle le atlehe.”

₁₄“U se ke ua tlosa mokolokotoane oa moeli oa oa heno, o hlomiloeng ke baholo-holo naheng eo e leng lefa la hao, leo u tla le ja naheng eo Morena Molimo oa hao, a u neang eona hore e be ea hao.”

₁₅“Paki e le 'ngoe e ke ke ea hlahisa bopaki bo qosang motho malebana le bokhopo bofe kapa bofe, kapa malebana le sebe sefe kapa sefe seo a se etsang. Qoso e tla ahlōloa ho ea ka bopaki ba lipaki tse peli kapa tse tharo.

₁₆“Ha paki ea leshano e hlaha, e qosa motho ka hore o tlōtse molao; ₁₇banna ba babeli, ba qosanang, ba tla ema kapele ho Morena, le kapele ho baprista le baahlōli bao e leng bona nakong eo. ₁₈Baahlōli ba tla hlahlobisisa taba eo ka hloko, 'me haeba paki e le ea leshano, e qositse ngoan'abo eona ka leshano; ₁₉uena u tla e etsa seo e neng e hopotse ho se etsa ho ngoan'abo eona, ebe u felisa bokhopo bona har'a lōna. ₂₀Ba bang ba tla utloa, ba tšabe, 'me ha ba sa tla etsa bokhopo bo kang bona har'a lōna. ₂₁U se ke ua ba mohau; bophelo bo lefuoe ka bophelo, leihlo ka leihlo, leino ka leino, letsoho ka letsoho, le leoto ka leoto.”