Paseka
1“Hlokomelang khoeli ea 'Mesa, ka ho keteka Paseka ea Morena, Molimo oa lōna, hobane ke ka khoeli eo ea 'Mesa Morena Molimo oa lōna, a neng a le ntše Egepeta e le bosiu. 2Le tla nyehella Morena Molimo oa lōna, ka Paseka, sebakeng seo Morena Molimo oa lōna, a tla se khetha hore a lule ho sona; e be linku le likhomo. 3Le se ke la e jelella ka bohobe bo lomositsoeng. Ka matsatsi a supileng le tla e jelella ka bohobe bo sa lomosoang, e leng bohobe ba matšoenyeho, hobane le ne le tsoe Egepeta ka ntšoe-lí-sa-fōhloa; e le hore ka matsatsi 'ohle a ho phela ha lōna le 'ne le hopole mohla le neng le e-tsoa naheng ea Egepeta. 4Ka matsatsi a supileng ho se ke ha e-ba le litomoso naheng eohle ea lōna. Nama ea sehlabelo se ileng sa etsoa ka phirimana ea letsatsi la pele e se ke ea sieloa la hosasane.
5“Le se ke la etsa sehlabelo motseng ofe kapa ofe oo Morena Molimo oa lōna, a le neang oona, 6empa le se etsetse sebakeng seo Morena Molimo oa lōna, a tla se khethela hore a lule ho sona. Ke hona moo le tla nyehela ka sehlabelo sa Paseka teng, e be mantsiboea ha letsatsi le likela, mohl'a letsatsi leo le neng le tlohe Egepeta ka lona. 7Le e bese, le e jelle sebakeng seo Morena Molimo oa lōna, a tla se khetha. Hoseng le khutlele litenteng tsa lōna. 8Ka matsatsi a tšeletseng le tla ja bohobe bo sa lomosoang, empa letsatsi la bosupa e tla ba la phutheho e kholo, e mahlōnōkō, ea ho tlōtla Morena Molimo oa lōna. Le se ke la etsa mosebetsi le o mong ka letsatsi leo.”
Mokete oa kotulo
9“Ho tloha ka letsatsi leo le qalang ho hèla oro ka lona, le tla bala libeke tse supileng. 10Joale le tla ketekela Morena Molimo oa lōna, mokete oa libeke; le fane ka nyehelo ea boithaopo ho ea kamoo Morena Molimo oa lōna, a le hlohonolofalitseng kateng. 11Le thabe kapele ho Morena Molimo oa lōna: lōna, le bara ba lōna, le barali ba lōna, le bahlanka ba lōna, le makhabunyane a lōna, le Balevi ba ahileng kahar'a metse ea lōna, le bajaki, le likhutsana, le bahlolohali ba har'a lōna, le le sebakeng se tla khethoa ke Morena Molimo oa lōna, hore a lule ho sona. 12Hopolang hore le ne le le makhoba Egepeta. Le hlokomele ho bōlōka le ho phetha litaelo tsena.”
Mokete oa maphèphè
13“Ka matsatsi a supileng, kamorao ho hoba le bōkelle tse tsoang liotlong tsa lōna, le tse tsoang litlhōtlelong tsa lōna tsa veine, le tla keteka mokete oa maphèphè. 14Le thabe moketeng ona oa lōna: Lōna, le bara ba lōna, le barali ba lōna, le bahlanka ba lōna, le makhabunyane a lōna, le Balevi, le bajaki, le likhutsana, le bahlolohali ba ahileng kahar'a metse ea lōna. 15Ka matsatsi a supileng, le tla ketekela Morena Molimo oa lōna, mokete, sebakeng seo Morena a tla se khetha, hobane Morena Molimo oa lōna, o tla hlohonolofatsa tsohle tseo le li kotutseng, le mesebetsi eohle ea matsoho a lōna, 'me ho lōna e be thabo feela.
16“Hararo ka selemo, bohle ba lōna ba batona ba tla hlaha kapele ho Morena Molimo oa lōna, sebakeng seo a tla se khetha. Nakong ea mokete oa bohobe bo sa lomosoang, le nakong ea mokete oa libeke, le nakong ea mokete oa maphèphè, ho se be le ea mong oa lōna ea tla hlaha kapele ho Morena a itsolokile. 17Monna e mong le e mong a fane ho ea kamoo a filoeng kateng, le ho ea kamoo Morena Molimo oa lōna, a mo hlohonolofalitseng kateng.”
Baahlōli
18“Metseng eohle, eo Morena Molimo oa lōna, a le neang eona, le khethe baahlōli le baokameli ka ho ea ka merabe ea lōna. Ba ahlōlele sechaba ka toka. 19Le se ke la sotha kahlōlo; le se ke la ba leeme; le se ke la amohela tjotjo, hobane tjotjo e foufatsa mahlo a ba bohlale, 'me e sotha lipolelo tsa ba lokileng. 20Le pheelle toka, toka feela, hore le tle le phele, 'me naha eo Morena Molimo oa lōna, a le neang eona e tle e be ea lōna.
21“Le se ke la iketsetsa litšoantšo tsa Ashera pel'a aletare ea Morena Molimo oa lōna. 22Le se ke la iketsetsa sefika seo le se khumamelang, e leng ntho eo Morena Molimo oa lōna, a e hloileng.”
