1“Ka hona Morena o phethahalitse litšokelo tsa hae tseo a neng a re sokele ka tsona, rona le baahloli ba ileng ba busa Iseraele, le likhosi tsa rona, le mahosana a rona, 'moho le batho ba Iseraele le ba Juda. 2Kae kapa kae tlas'a letsatsi ha ho e-s'o ka ho etsahala ntho e kang eo e ileng ea etsoa Jerusalema, ka ho ea ka tse ngotsoeng molaong oa Moshe: 3hore mong a je nama ea mora, mong a je nama ea morali. 4Morena o ba beile tlas'a mebuso eohle e re pota-potileng, ho ba sekhobo le thohako lichabeng tsohle tseo Morena a ba qhalantseng har'a tsona. 5Bakeng sa ho busa, ea ba bona ba busoang; hobane re sitetsoe Morena Molimo oa rona ka ho se mamele lentsoe la hae.
6“Ho loka ke ha Morena Molimo oa rona, athe ho apareloa ke lihlong joaloka kajeno, ke ha rona le ha bo-ntat'a rona. 7Litlokotsi tsena kaofela, tseo Morena a re soketseng ka tsona, li re oetse holimo. 8Ha rea ka ra ithapella ho Morena, e mong le e mong oa rona, ka ho furalla mehopolo ea pelo e sa lokang ea hae. 9Eaba Morena o re lokisetsa litlokotsi, 'me a fela a re lihela tsona; hobane Morena o etsa ka toka ho tsohle tseo a re laetseng tsona. 10Athe ha rea ka ra mamela lentsoe la hae, le ho latela melao ea Morena eo a re beetseng eona.
Ho rapelloa topollo
11“Joale, Morena Molimo oa Iseraele, uena ea ntšitseng sechaba sa hao naheng ea Egepeta ka letsoho le matla, ka lipontšo le limakatso, ka matla a maholo le ka sephaka se otlolohileng, 'me ua itumisetsa Lebitso ho fihlela le kajeno, 12re entse libe, ra ba khopo, ra etsa ho sa lokang, Morena Molimo oa rona, malokana le litaelo tsohle tsa hao. 13Bohale ba hao bo ke bo re hatohe, hobane re se re setse re le methoaela lichabeng tseo u re qhalantseng har'a tsona. 14Mamela, oho Morena, thapelo ea rona le kopo ea rona; u re pholose, ka hona u tle u tlotlehe; u re sitse ka mohau oa hao, ho tle ho bonahale ho ba re falalitseng, 15'me lefatše lohle le tle le tsebe hore u Morena Molimo oa rona, hobane Iseraele le litloholo tsa hae ba ipitsa ka Lebitso la hao.
16“Oho, Morena, u re talime u le Tlung e halalelang ea hao, 'me u re hopole. Sekeha tsebe, 'me u re utloe; 17tutubolla mahlo, Morena, u bone! Hase ba shoeleng, ba Qalong ea bafu, bao 'mele ea bona e seng e se na phefumoloho, ba ka neelang Morena tlotla le hlompho e tšoanelehang. 18Empa motho ea imetsoeng ke mosarelo, le ea tsamaeang a khokhoba 'me a rerekela, eo mahlo a hae a seng a hakeela, le motho ea lapileng, bana ke bona ba u neelang tlotla le hlompho e tšoanelehang, oho Morena!
19“Hase ka baka la mesebetsi e lokileng ea bo-ntat'a rona le ea likhosi tsa rona re ikopelang mohau ho uena, Morena Molimo oa rona. 20U rometse bohale ba hao le khalefo ea hao ho rona, joalokaha u boletse ka bahlanka ba hao baporofeta, u re: 21‘Ke sena seo Morena a se bolelang: le itihe tlas'a khosi ea Babilona, 'me le mo sebeletse; ke moo le tla lula naheng eo ke e fileng bo-ntat'a lona. 22Empa haeba le sa mamele lentsoe la Morena, le sa sebeletse khosi ea Babilona, 23ke tla khutsisa lentsoe la thabo le la nyakallo, lentsoe la monyali le la monyaluoa, metseng ea Juda le mapatlelong a Jerusalema, 'me naha eohle e tla ba lesupi, e hloke baahi.’
24“Leha ho le joalo, ha rea ka ra mamela lentsoe la hao la hore re sebeletse khosi ea Babilona; joale u phethahalitse mantsoe a hao, ao u a boletseng ka bahlanka ba hao baporofeta, hore masapo a likhosi tsa rona le masapo a bo-ntat'a rona a tla epolloa mabitleng. 25A fetse a lahleloa kantle, lebatameng la letsatsi le serameng sa bosiu. Ba shoela mahlokong a tšabehang, ke tlala, ke sabole le ke lefu la seoa; 26'me Ntlo e bitsoang ka Lebitso la hao, u e entse seo e leng sona kajeno, ka lebaka la bobe ba ntlo ea Iseraele le ntlo ea Juda.
27“Athe, oho Morena Molimo oa rona, u re entse tjena ka molemo oohle oa hao le ka mohau o moholo oa hao, 28joalokaha u boletse ka mohlanka oa hao Moshe, mohla u neng u mo laela ho ngola Molao oa hao pontšeng ea bana ba Iseraele, 29u re: ‘Ha eba le sa mamele lentsoe la ka, letšoelehali lena le tla sala e le methoaela lichabeng tseo ke tla le qhalanya har'a tsona. 30Ke tseba hantle hore batho bana ba ke ke ba 'mamela, hobane ke sechaba se manganga. Empa naheng eo ba falliselitsoeng ho eona ba tla imamela, 31'me ba tsebe hore ke 'na Morena Molimo oa bona. Ke tla ba fa pelo le litsebe tse utloang. 32Ba tla nthorisa naheng eo ba falliselitsoeng ho eona, ba ke ke ba lebala Lebitso la ka. 33Ba tla bakela manganga a bona le liketso tsa bona tse sa lokang, hobane ba tla hopola se neng se hlahele bo-ntat'a bona ba neng ba etse libe pontšeng ea Morena. 34Ke moo ke tla ba khutlisetsa naheng eo ke neng ke e tšepise bo-ntat'a bona Aborahama, Isaka le Jakobo ka kano, 'me e tla ba beng ba eona. Ke tla ba ngatafatsa, 'me ha ba sa tla nyenyefala. 35Ke tla hlaba selekane se sa feleng le bona, ke be Molimo oa bona, 'me bona e be sechaba sa ka. 'Me ha ke sa tla hlola ke tlosa sechaba sa Iseraele naheng eo ke se fileng eona.’
