Paulosi o ea Roma ka sekepe
1Ha ho se ho reriloe hore re tšele ka sekepe ho ea Italia, Paulosi le batšoaruoa ba bang ba neeloa molaoli e mong oa ba lekholo, ea bitsoang Juliase, oa lebōtho le bitsoang la Motlotlehi. 2Ra kena ka sekepeng se tsoang Adaramutinose, se neng se e-ea metseng e lebōpong la Asia, re e-na le Arisetarekose, oa Thesalonika, motse oa Mosedonia, eaba rea tloha.
3Ka le hlahlamang ra fihla Sidone. Juliase a ba mosa ho lumella Paulosi ho ikela ho metsoalle ea hae, ho ea hlokomeloa. 4Ho tloha moo ra ikhohla ka sehlekehleke sa Sipera ka baka la meea e neng e re tobile. 5Eitse hoba re tšele leoatle la Silesia le la Pamfilea, ra fihla Mira e Lōkia. 6Hona moo molaoli oa ba lekholo a fumana sekepe se tsoang Alekesanderia se eang Italia; a re palamisa ho sona. 7Ra tsamaea butle ka matsatsi a seng makae, 'me ra fihla Kenidose ka bothata. Erekaha moea o n'o re thibela, ra tsamaea re ikhohlile ka Kerete, re tobane le hloahloa ea Salemone. 8Ra tsamaea ka bothata, re sikile le lebōpo, ra ea fihla sebakeng se bitsoang Kou tse Ntle, se haufi le motse oa Lasia.
9Ho ne ho se ho fetile nako e telele, letsatsi la mokete oa Boinyatso le lona le se le fetile; kahoo le leeto la sekepe le ne le se le le kotsi. Paulosi a ba eletsa, 10a re: “Banna, ke hlokomela hore leeto lena le tla ba le kotsi le tšenyehelo e kholo; e seng feela ea thepa le sekepe, empa le ea bophelo ba rōna.” 11Empa molaoli oa ba lekholo a kholoa motsamaisi oa sekepe le mong'a sona ho feta se neng se boleloa ke Paulosi. 12Kaha kou ea likepe e ne e sa lokela ho emisa likepe nakong ea mariha, ba bangata ba lumellana ka hore ho tlohuoe moo, ka tšepo ea ho ea finyella le ho qeta mariha Foinikese, e leng kou ea Kerete e tobaneng le boroa-bophirima le leboea-bophirima.
Sefefo leoatleng
13Eare ha moea oa boroa a foka butle, 'me ba hopola hore ba fihletse morero oa bona, eaba ba khokhotholla sekepe, ba tsamaea ba sikile le lebōpo, haufi le Kerete. 14Empa kamora' nakoana e se kae, ha theoha moea oa sefefo o matla, o tsoang leboea-bochabela. 15Eare ha sekepe se tšoaroa ke sefefo, sa hlōloa ke moea, eaba rea se tlohela, sa fefoha. 16Ra tsamaea re itširelelitse ka sehlekehlekenyana se bitsoang Kauda, empa ra batla re thatafalloa ke ho pholosa seketsoana sa sekepe. 17Ba se hulela ka sekepeng. Ba tlama sekepe ka mehala, 'me ka baka la ho tšaba ho qahoa lehlabatheng la Siretise, ba liha seile, ba lesa sekepe ho ea moo se ratang. 18Kaha re ne re patisitsoe ke sefefo, ka le hlahlamang ba lahlela thōtō leoatleng. 19Ka tsatsi la boraro, ka matsoho a bona, ba qhaqholla tse tsamaisang sekepe, ba li lahlela leoatleng. 20Ha ho sa bonahale letsatsi kapa linaleli ka matsatsi a mangata, empa sefefo sona se ntse se befile haholo, joale tšepo ea hore re tla pholoha ea fela tu!
21Erekaha ba ne ba qetile nako e telele ba sa je, Paulosi a ema har'a bona, a re: “Banna, hojane le kile la 'mamela, la se ke la tloha Kerete, le ka be le sa hlaheloa ke kotsi le tahlehelo ena. 22Empa le joale ke sa le khothaletsa ho khoba matšoafo, hobane ha ho ea tla timela, haese sekepe feela. 23Lengeloi la Molimo oa ka, eo ke mo sebeletsang, le ile la fihla ho 'na bosiung bona, 24la re: ‘Paulosi, u se ke ua tšaba; u loketse ho ea hlaha kapele ho Sesare, 'me ka baka la hao, Molimo o tla pholosa bohle ba tsamaeang le uena ka sekepe.’ 25Ka baka leo, banna, khobang matšoafo, hobane ke tšepile Molimo hore ho tla ba joalokaha ke boleletsoe. 26Empa eka khona re hlatsetsoe sehlekehlekeng se seng.”
27Ha re ntse re fefoha leoatleng la Adariea, ha e batla e e-ba har'a mpa ea bosiu, bosiung ba leshome le metso e mene, batsamaisi ba sekepe ba bona eka ba atamela ho kang lebōpo. 28Eaba ba qhoqhotsa botebo ba metsi, 'me ba fumana bo etsa limethara tse mashome a mane. Hoba ba tsama-tsamaee, ba qhoqhotsa hape, ba fumana bo se bo etsa limethara tse mashome a mararo. 29Ka ho tšaba ho thulana le mafika, ba akhela lingaparela tse 'ne, tse tsoang ka setonong sa sekepe, ba lakatsa eka bosiu bo ka sa. 30Eare ha batsamaisi ba sekepe ba rata ho baleha, ba se ba theoletse seketsoana sa sekepe leoatleng, ba etsa eka ba akhela lingaparela tse tsoang ka hloohong ea sona, 31Paulosi a bua le molaoli oa ba lekholo le bahlabani, a re: “Ha banna bao ba sa lule ka sekepeng, le ke ke la pholoha.” 32Eaba bahlabani ba khaola mehala ea seketsoana, baa se tlohela, sa oela.
33Eare ha bo tla sa, Paulosi a khothaletsa bohle hore ba je, a re: “Kajeno ke letsatsi la leshome le metso e mene le ntse le lebeletse, le sa je letho; 34ka hona ke le khothaletsa hore le je, le tsebe ho phela, hobane ha ho le ea mong oa lōna ea tla lahleheloa le ke qōba ea moriri oa hae.” 35Hoba a rialo, a nka bohobe, a boka Molimo pel'a bohle, a bo ngoatha, a qala ho ja. 36Bohle ba khothala, le bona ba e-ja. 37Ka sekepeng re ne re le batho ba makholo a mabeli le mashome a supileng a metso e tšeletseng. 38Ha ba se ba khōtše, ba imolla sekepe ka ho lahlela koro leoatleng.
Ho pshatleha ha sekepe
39Ha bosiu bo e-sa, ba se ke ba tseba hore na ba lebōpong lefe, empa ba bona kou e nang le lehlabathe, 'me ba rera ho sesisetsa sekepe hona teng, haeba ho ka etsahala. 40Ba khaola lingaparela, ba li tlohela leoatleng, 'me ka eona nako eo ba lokolla le mehala ea masokoana a sekepe. Ba nt'o phahamisa seile e kapele hore e khe moea, ba lebisa sekepe lebōpong. 41Eare ha ba fihla hloahloeng e mateanong a maqhubu, ba lelemisetsa sekepe ho eona. Sefuba sa sona sa khitla lehlabatheng, sa qaoa, empa setōnō sona sa qala ho pshatloa ke sefutho sa maqhubu.
42Maikutlo a bahlabani e ne e le hore ba bolaee batšoaruoa, esere e mong oa bona a sesetsa lebōpong, a phonyoha. 43Empa molaoli oa ba lekholo, ka ho rata ho pholosa Paulosi, a ba thibela morerong oo oa bona. A laela ba tsebang ho sesa hore ba itihele metsing pele, ba e'o fihla lebōpong, 44'me ho ba setseng, ba bang ba itšoarelle mapolankeng, ba bang mafatseng a tsoang sekepeng. Ka mokhoa o joalo, bohle ba fihla lebōpong, 'me ba pholoha.
