1Paulosi a talimisisa lekhotla, a re: “Banna ba heso, ke'nile ka phela ka letsoalo le khutsitseng pel'a Molimo ho fihlela ka letsatsi lena.” 2Eaba Moprista e Moholo, Ananiase, o laela ba pel'a Paulosi ho mo oahlela molomong. 3Joale Paulosi a re ho eena: “Moikaketsi tooe! Molimo o tla u otla! U lutse mono hore u nkahlōle ka Molao, empa u fapana le Molao, u laela hore ke otloe.”
4Ba emeng haufi le Paulosi ba re: “U hl'u hlapaole Moprista e Moholo oa Molimo?”
5Paulosi a re: “Bana beso, ke ne ke sa tsebe hore ke Moprista e Moholo, hobane ho ngotsoe, ho thoe: ‘U se ke ua bua 'musi oa sechaba sa heno hampe.’ ”
6Eare ha Paulosi a hlokomela hore karolo e 'ngoe ke Basaduke, e 'ngoe ke Bafarisi, a hōoa kahar'a lekhotla, a re: “Banna ba heso, 'na ke Mofarisi, ke ngoana oa Mofarisi; ke qōsetsoa ho ba le tšepo ea hore bafu ba tla tsoha.” 7Hoba a rialo phapang ea hlaha mahareng a Bafarisi le Basaduke, 'me lekhotla la arohana. 8Basaduke ba ne ba re ha ho tsoho ea bafu, ha ho mangeloi, ha ho meea; athe Bafarisi ba ne ba lumela tsena tsohle.
9Ha hlaha leratahali, 'me ba bang ba Litsebi tsa Molao, ba mokha oa Bafarisi, ba hanyetsa ka matla, ba re: “Ha re fumane bobe ba letho ho motho enoa; mohlomong moea kapa lengeloi le buile le eena.” 10Ha khang e kholo e loela, molaoli oa ba sekete, ka ho tšaba hore ba se tšohe ba tsekolla Paulosi, a laela hore bahlabani ba theohe, ba mo ntše kahar'a letšoele, ba mo ise qhobosheaneng.
11Ka bosiu bo hlahlamang, Morena a tla ho eena, a re: “Beta pelo, hobane joalokaha u mpakile Jerusalema, eka khona u mpake joalo le Roma.”
Ho reroa polao ea Paulosi
12Eare ha bo e-sa, Bajuda ba etsa 'momori, 'me ba ikana hore ba ke ke ba e-ja, leha e le ho noa letho, ba e-s'o bolaee Paulosi. 13Ba entseng morero ona ba ne ba feta mashome a mane. 14Ba ea ho baprista ba baholo, le ho baholo ba sechaba, ba re: “Re se re ikanne hore ha re ka ke ra latsoa letho, re e-s'o bolaee Paulosi. 15Ka baka lena lōna, 'moho le lekhotla, bolellang molaoli oa ba sekete hore a mo theole, a mo tlise ho lōna, e ke hoja le tlil'o hlahlobisisa taba ea hae hantle; rōna re se re itokiselitse ho 'molaea a e-s'o fihle mona.”
16Empa mochana oa Paulosi ha a utloa tsa ho lalloa hoo, a ea, a kena qhobosheaneng, 'me a tsebisa Paulosi.
17Eaba Paulosi o bitsa e mong oa balaoli ba ba lekholo, 'me a re ho eena: “Isa mohlankana enoa ho molaoli oa ba sekete, hobane o na le seo a ratang ho mo tsebisa sona.”
18Eo a mo nka, a mo isa ho molaoli oa ba sekete, a re: “Motšoaruoa Paulosi o ile a mpitsa, a nkōpa ho tlisa mohlankana enoa ho uena, hobane o na le seo a ratang ho u bolella sona.”
19Molaoli a mo tšoara ka letsoho, a mo nkela thōkoana, 'me a 'motsa, a re: “Ke sefe seo u ratang ho mpolella sona?”
20A re: “Bajuda ba lumellane hore hosasane ba u kōpe ho theolela Paulosi khotla, e ke hoja ba tlil'o 'motsisisa hantle ka tsa hae. 21Empa u se ke ua ba mamela, hobane banna ba fetang mashome a mane ba bona ba mo laletse, kaha ba ikanne hore ba ke ke ba e-ja, leha e le ho noa, ba e-s'o 'molaee. Joale ba itokisitse, ba se ba emetse qeto ea hao feela.”
22Eaba molaoli oa ba sekete o lokolla mohlankana hore a tsamaee, a mo laela, a re: “U se ke ua bolella motho hore u ntōmme tsebe.”
Paulosi o rōmeloa ho 'musisi Felekise
23Joale molaoli oa ba sekete a bitsa balaoli ba babeli ba mabōtho a ba lekholo, a re: “Ka hora ea borobong, bosiu, le hlophe bahlabani ba makholo a mabeli, le bapalami ba lipere ba mashome a supileng, le ba hlometseng ka marumo ba makholo a mabeli, ba tsamaee ho ea fihla Sesaria. 24Le lipere li be teng, ba tle ba palamise Paulosi, ba e'o mo fihlisa ho 'musisi Felekise a sa hlaheloa ke kotsi.”
25Eaba o ngola lengolo le reng: 26“'Na, Tlelaudiose Lōsiase, ke lumelisa Mohlomphehi ea khabane, 'musisi Felekise. 27Monna enoa o n'a tšoeroe ke Bajuda, 'me ba le lekhatheng la ho 'molaea. Ha ke utloa hore ke Moroma, ka fihla ka bahlabani, ka mo namolela. 28Kaha ke ne ke rata ho tseba ka ho tlala seo ba mo qōsang ka sona, ke ile ka mo isa lekhotleng la bona. 29Ke fumane hore ha ho letho leo a qōsoang ka lona le tšoaneloang ke lefu kapa chankana; o qōsoa ka khang e amanang le Molao oa bona. 30Eitse hoba ke lōngoe tsebe hore monna enoa o reriloe, ka mo rōmela ho uena ka potlako, ka laela le baqōsi ba hae hore ba tl'o bolela kapele ho uena seo ba mo qosang ka sona.”
31Joale bahlabani, kamoo ba laetsoeng kateng, ba nka Paulosi le bosiu, ba mo isa Antipaterise. 32Ka la hosasane ba maoto ba khutlela qhobosheaneng, ba siea bapalami ho tsoela pele le eena. 33Ha ba fihla Sesaria ba neelana ka lengolo la 'musisi, 'me ba siea Paulosi matleng a hae. 34Hoba 'musisi a bale lengolo, a 'motsa hore na ke oa hokae. Ha a utloile hore o tsoa Silesia, a re: 35“Ke tla u mamela ha baqosi ba hao le bona ba se ba fihlile.” 'Musisi a laela hore Paulosi a bōlōkoe tlung ea Heroda ea bokhosi.
