LIKETSO 19

₁Ha Apolosi a ntse a le Korinthe, Paulosi eena a tsamaea holim'a lihlaba, a ea fihla Efese, 'me a fumana barutuoa ba bang hona teng. ₂A re ho bona: “Na le ne le amohele Moea o Halalelang mohla le lumelang na?”

Ba araba, ba re: “Ha re e-s'o ka re utloa hore ho na le Moea o Halalelang.”

₃A re: “Ha ho le joalo le kolobelitsoe ka kolobetso efe?”

Ba re: “Ka kolobetso ea Johanne.”

₄Eaba Paulosi o re: “Johanne o ile a kolobetsa ka kolobetso ea pako, a ntse a bolella batho hore ba lumele ho ea tlang kamorao ho eena, e leng ho Jesu.” ₅Ha ba utloa hona, ba kolobetsoa ka lebitso la Jesu. ₆Ha Paulosi a ba bea matsoho, Moea o Halalelang oa theohela holim'a bona, ba bua lipuo-puo, 'me ba porofeta. ₇Banna bao kaofela ba ne ba ka ba leshome le metso e 'meli.

₈Ka likhoeli tse tharo Paulosi a 'na a kena ka tlung ea thapelo ea Bajuda. A bua ka sebete, a arabisana le bona, 'me a ba kholisa ka tsa 'Muso oa Molimo. ₉Empa ha ba bang ba ithatafatsa lipelo, ba hana ho lumela, 'me ba bua hampe ka Tsela ea Morena kapele ho balumeli bohle, a tloha ho bona a tsamaea le barutuoa ba hae. A buisana le batho ka tsatsi le leng le le leng sekolong sa Tiranose. ₁₀Hona ha etsahala ka lemo tse peli, hoo bohle ba ahileng Asia, Bajuda le Bagerike, ba ileng ba utloa lentsoe la Morena.

₁₁Molimo a etsa liketso tse matla, tse sa tloaelehang, ka matsoho a Paulosi, ₁₂hoo ha lituku kapa liforesekoto tse amileng 'mele oa hae li ne li beoa holim'a bakuli, maloetse a ne a ee a fole, le meea e mebe e tsoe ho bona.

₁₃Bajuda ba bang ba baleleri, ba lelekang meea e mebe, le bona ba leka ho bitsa lebitso la Morena Jesu holim'a ba nang le meea e mebe, ba re: “Ke le laela ka lebitso la Jesu ea boleloang ke Paulosi.” ₁₄Ba etsang hona e ne e le bara ba supileng ba Moprista e Moholo oa Mojuda ea bitsoang Sekefa. ₁₅Empa moea o mobe oa araba, oa re ho bona: “Jesu kea mo tseba, esita le eena Paulosi kea mo tseba, empa lōna le bo-mang?” ₁₆Eaba monna ea nang le moea o mobe oa ba tlōlella, 'me a ba hlōla bohle ka matla, ba ba ba baleha tlung eo ba tsotse, ba le maqeba.

₁₇Bohle ba phelang Efese, Bajuda le Bagerike, ha ba utloa taba ena, kaofela ba tšoha, 'me lebitso la Morena Jesu la tumisoa. ₁₈Ba bangata ba balumeli ba tla, ba bolela liketso tsa bona tsa boloi pepeneneng. ₁₉Ba bangata ba neng ba loea ba bōkella libuka, ba li chesa pontšeng ea bohle. Ha ba kopanya theko ea libuka, ba fumana e le likete tse mashome a mahlano tsa silefera. ₂₀Ka mokhoa oo lentsoe la Morena la ata, 'me la matlafala.

₂₁Hoba tsena li phethahale, Paulosi a rera ka pelong ea hae ho feta Masedonia le Akaea ho ea Jerusalema, a re: “Ha ke se ke fihlile teng, eka khona ke etele le Roma.” ₂₂Kahoo a rōma batlatsi ba hae ba babeli, e leng Timothea le Erasetose, ho ea Masedonia; eena a ka a sala Asia nakoana.

₂₃Ka nako eo ha tsoha moferefere o moholo Efese ka baka la Tsela ea Morena. ₂₄Monna e mong oa setei sa silefera, ea bitsoang Demetriose, o ne a etsa litempelana tsa Aretemise ka silefera, 'me a fumantša basebetsi mouno o mongata. ₂₅A ba phutha 'moho le basebetsi ba tse joalo, a re: “Banna, lea tseba hore katleho ea rōna e tsoa khoebong ena. ₂₆Lea bona, 'me lea utloa hore Paulosi enoa o re melimo e entsoeng ke batho hase melimo, 'me o khelositse letšoelehali, e seng mona Efese feela, empa e batla e le Asia eohle. ₂₇Hase khoebo ena ea rōna feela e kotsing ea ho nyeliseha, empa le eona tempele ea mofumahali Aretemise, molimo o moholo, e lekhatheng la ho talingoa e le lefeela, le boholo ba hae bo nyenyefatsoe, eena eo naha eohle ea Asia le lefatše lohle le mo hlomphang.”

₂₈Ha ba utloa tsena, ba halefa haholo, ba hōoa, ba re: “O moholo Aretemise oa Baefese!” ₂₉Motse oa tlala pherekano, 'me batho ba phallela lebaleng la lipapali 'moho, ba tšoere banna ba babeli, Gaiose le Arisetarekose, ba tsoang Masedonia, ba neng ba felehelitse Paulosi leetong. ₃₀Eare ha Paulosi a rata ho kena mokhoping oo, barutuoa ba mo hanela. ₃₁Ba bang ba ka sehloohong pusong ea Asia, bao e neng e le metsoalle ea hae, le bona ba mo rōmela molaetsa, ba mo rapela hore a se ke a ea itlhahisa lebaleng la lipapali.

₃₂Joale ba bang ba hōoa lintho tse fapaneng, hobane phutheho e ne e ferekane, 'me bongata bo sa tsebe hore na bo phuthehetse'ng. ₃₃Ba bang ba letšoele ba re Alekesandere a bue, ha Bajuda ba ntse ba mo sutumeletsa kapele. Alekesandere a bue, ha Bajuda ba ntse ba mo sutumeletsa kapele. Alekesandere a phōka ka letsoho, a rata ho ikarabella ho letšoele. ₃₄Empa ha ba lemoha hore ke Mojuda, bohle ba hōoa ka ntsoe le le leng, lihora tse ka bang peli, ba re: “O moholo Aretemise oa Baefese!”

₃₅Eare hoba mongoli oa motse a khutsise letšoele, a re: “Banna ba Efese, ekaba ke motho ofe ea sa tsebeng kamoo motse oa Efese e leng 'maballi oa tempele ea mofumahali Aretemise e moholo, le oa setšoantšo se oeleng leholimong kateng? ₃₆Ha ho ea ka hanyetsang tsena; ka baka leo, eka khona le khutse, le se ke la etsa letho ka potlako. ₃₇Le tlisitse banna bana, bao e seng masholu a tse ka tempeleng, kapa banyefoli ba molimo oa rōna. ₃₈Haeba Demetriose le basebetsi bao a nang le bona ba na le hoo ba ka qosang motho ka hona, lekhotla le butsoe, 'me ho na le baahlōli; a ba ke ba qosane teng. ₃₉Empa haeba le batla ho hong hape, hoo ho ka hlahlojoa pitsong ea molao. ₄₀Etsoe re kotsing ea ho qosoa ka moferefere oa kajeno, le hoja ho se seo re ka se arabelang lereberebeng lena.” ₄₁Hoba a rialo, a qhala mokhopi.