LIKETSO 16

₁Paulosi a fihla Derebe le Lesitera. Teng ho ne ho e-na le morutuoa e mong ea bitsoang Timothea, 'm'ae e le mosali oa Mojuda, oa molumeli, empa ntat'ae e le Mogerike. ₂Timothea o ne a pakoa ke balumeli ba leng Lesitera le Ikonione. ₃Paulosi a rata ho tsamaea le eena, eaba o mo nka a 'mōlōtsa ka baka la Bajuda ba leng libakeng tseo, hobane ba ne ba tseba bohle hore ntat'ae ke Mogerike. ₄Ha ba ntse ba e-ea le metse, ba ne ba neela batho ba teng litaelo tse beiloeng ke baapostola le baholo ba leng Jerusalema, hore ba li bōlōke. ₅Eaba likereke li matlafatsoa tumelong, 'me tsa ngatafala ka letsatsi le leng le le leng.

₆Ba haola naheng ea Firigia le Galatia, kaha Moea o Halalelang o n'o ba hanetse ho bolela lentsoe la Molimo Asia. ₇Eare ha ba fihla pel'a Misia, ba leka ho kena Bithinia, empa Moea oa Jesu oa se ke oa ba lumella. ₈Eaba ba feta Misia, ba theohela Terōoase. ₉Paulosi a hlaheloa ke pono bosiu. A bona monna e mong oa Masedonia a eme pel'a hae, a mo rapela, a re: “Ak'u tšelele Masedonia, u re thuse!” ₁₀Eare hoba a bone pono eo, hang-hang ra batla ho ea Masedonia, re kholisehile hore Molimo o re bitselitse ho ea bolela molaetsa o molemo teng.

₁₁Eare hoba re tlohe Terōoase ka sekepe, ra toba Samotherake, ka le hlahlamang ra ea Neapolese. ₁₂Ho tloha moo ra ea Filipi, e leng motse oa sehlooho oa karolo eo ea Masedonia, o busoang ke Roma. Ra qeta matsatsinyana motseng oo.

₁₃Ka tsatsi la Sabatha ra tsoela kantle ho khoro ea motse e pel'a nōka, moo re neng re lekanya hore ho rapelloa teng. Hoba re lule, ra bua le basali ba phuthehileng. ₁₄Mosali e mong oa motse oa Thiatira, ea bitsoang Lidia, ea rekisang masela a perese, ea tšabang Molimo, a mamela, 'me Morena a bula pelo ea hae hore a ele hloko tse boleloang ke Paulosi. ₁₅Ha a se a kolobelitsoe le ba lelapa la hae, a re rapela, a re: “Haeba le khotsofetse hore ke lumetse ho Morena, kenang ka tlung ea ka, le hlole teng.” A re qophella.

₁₆Eare ha re ntse re e-ea thapelong, ha etsahala hore re khahlanyetsoe ke lekhabunyane le nang le moea oa bonohe, le neng le fumantša beng ba lona leruo le lengata ka bonohe ba lona. ₁₇La re latela re e-na le Paulosi, la hōoa, la re: “Batho bana ke bahlanka ba Molimo ea holimo-limo, ba le phatlalletsang tsela ea pholoho!” ₁₈La etsa hona ka matsatsi a mangata. Empa Paulosi ha a se a tenehile, a reteleha, a re ho moea oo: “Ke u laela ka lebitso la Jesu Kreste hore u tsoe ho eena!” Oa tsoa ka eona nako eo.

₁₉Eare ha beng ba lona ba bona hore tšepo ea bona ea ho rua e felile, ba tšoara Paulosi le Silase, ba ba hulanyetsa lebaleng la motse, ho babusi. ₂₀Ba ba isa ho baahlōli, ba re: “Batho bana, ere e le Bajuda, ba ferekanya motse oa rōna! ₂₁Ba ruta meetlo eo rōna re le Baroma, re sa lumelloeng ho e amohela, leha e le ho e phetha.”

₂₂Letšoele la kopana, la ba tsohela matla, baahlōli ba ba tabolela liaparo, 'me ba laela hore ba shapuoe. ₂₃Ha ba se ba ba ntšitse metōpa e mengata, ba ba hlahlela chankaneng, ba laela molebeli ho ba lebela ka thata. ₂₄Eena ha a fumane taelo e joalo, a ba hlahlela kahare-hare ho chankana, a tlamella maoto a bona pakeng tsa likoqo.

₂₅Ka seroko, Paulosi le Silase ba rapela, ba tlotlisa Molimo ka lifela, 'me batšoaruoa ba ba mamela. ₂₆Hang-hang ha e-ba le tšisinyeho e kholo ea lefatše, hoo methèo ea chankana e bileng ea reketla, 'me ka ho panya ha ntši menyako eohle ea buleha, mahlaahlela a bohle a lokoloha. ₂₇Eare ha molebeli oa chankana a phaphama, 'me a bona menyako ea chankana e butsoe, a tsomula sabole ea hae, a re oa ipolaea, ka ho lekanya hore batšoaruoa ba phonyohile. ₂₈Empa Paulosi a mo hōoeletsa ka lentsoe le phahameng, a re: “Se intše kotsi, hobane re teng bohle!”

₂₉Molebeli a re a tlisetsoe mabone; a itahlela ka chankaneng a ntse a thōthōmela, a itihela kapele ho Paulosi le Silase. ₃₀A ba isa kantle, a re: “Benghali, eka khona ke etse eng hore ke tle ke pholosoe?”

₃₁Ba re: “Lumela ho Morena Jesu, 'me uena le ba lelapa la hao le tla pholosoa.” ₃₂Ba 'molella lentsoe la Morena le bohle ba lelapa la hae. ₃₃A ba nka ka eona nako eo ea bosiu, a thoba metōpa ea bona, a ba a kolobetsoa kapele-pele le bohle ba lelapa la hae. ₃₄A ba isa tlung ha hae, a ba fepa, a nyakalla le ba lelapa la hae bohle, kahobane ba lumetse ho Molimo.

₃₅Ha bo e-sa, baahlōli ba rōma mapolesa, ba re: “Lokollang batho bano.” ₃₆Joale molebeli oa chankana a tsebisa Paulosi taba ena, a re: “Baahlōli ba laetse hore le lokolloe; ka baka leo tsoang, le ee ka khotso.”

₃₇Empa Paulosi a arabela ka ho re: “Re Baroma, empa re shapiloe pontšeng re sa ka ra ahlōloa, ra hlahleloa chankaneng; joale ba se ba re lokolla ka lekunutu? Che, le ho ka! A ho tle bona, ba re ntše!”

₃₈Mapolesa a tsebisa baahlōli mantsoe ana. Ba tšoha ha ba utloa hore ke Baroma. ₃₉Ba tla, ba inyatsa, ba ba ntša chankaneng, ba nt'o ba kōpa hore ba tlohe motseng. ₄₀Ha ba e-tsoa chankaneng ba kena ha Lidia, ba bona balumeli, ba ba khothatsa, ba nt'o tsamaea.