LIKETSO 14

₁Ha etsahala hore ha Paulosi le Baranabase ba le Ikonione, ba kene hammoho ka tlung ea thapelo ea Bajuda. Ba bua hoo palo e kholo ea Bajuda le Bagerike e ileng ea lumela. ₂Empa Bajuda ba sa lumeleng ba hlohleletsa, ba senya maikutlo a balichaba hore a hanane le balumeli. ₃Ka baka leo, bo-Paulosi le Baranabase ba qeta nako e telele ba bua ka sebete ka Morena. Morena a paka bonnete ba lentsoe le bolelang mohau oa hae, ka ho ba nea matla a ho etsa mehlolo le limakatso. ₄Empa baahi ba motse ba arohana; ba bang ba lumellana le Bajuda, ba bang le baapostola. ₅Har'a balichaba le Bajuda, hammoho le babusi ba bona, ha e-ba le morero oa ho ba etsa hampe le ho ba tlepetsa ka majoe. ₆Ha baapostola ba lemoha taba eo, ba tšabela metseng ea Lōkaonia, le Lesitera le Derebe, le tikolohong ea eona, ₇'me ba bolela molaetsa o molemo teng.

₈Moo Lesitera ho ne ho e-na le monna e mong, ea holofetseng maoto, e le seritsa sa tsoalo, se lulang feela, se e-s'o ka se tsamaea. ₉Monna enoa a mamela Paulosi ha a bua. Ha Paulosi a mo talima, 'me a bona hore o na le tumelo ea hore a ka folisoa, ₁₀a bua ka lentsoe le phahameng, a re: “Ema ka maoto, u otlolohe!” Eaba o tlōlela holimo, oa tsamaea.

₁₁Matšoele ha a bona seo Paulosi a se entseng, a hōoa ka puo ea Selokaonia, a re: “Melimo e theohetse ho rōna ka sebōpeho sa batho!” ₁₂Eaba a bitsa Baranabase Seuse, le Paulosi Heremese, kaha e ne e le eena molomo oa bona. ₁₃Moprista oa Seuse, eo tempele ea hae e neng e le haufi le motse, a tlisa lipoho tse meqhaka likhorong tsa motse, 'me eena a lakatsa ho etsa sehlabelo 'moho le matšoele.

₁₄Empa ha baapostola Baranabase le Paulosi ba utloa hoo, ba hahōla liaparo tsa bona, ba ikakhela har'a letšoele, ba hōoa, ₁₅ba re: “Banna, le etsetsa'ng joalo? Le rōna re batho joaloka lōna. Re le bolella molaetsa o molemo, e le hore le furalle mafeela ana, le sokolohele ho Molimo ea phelang, ea entseng leholimo, le lefatše, le leoatle, le lintho tsohle tse ho tsona. ₁₆Melōkong e fetileng o ile a tlohella lichaba tsohle ho latela mekhoa ea tsona. ₁₇Leha ho le joalo, ha aa ka a lesa ho ipaka ka ho etsa tse molemo, ka ho le fa pula e tsoang leholimong le kotulo ka nako ea eona, ho le khōrisa, le ho nyakalatsa lipelo tsa lōna.” ₁₈Leha ba buile joalo, ea e-ba bothata ho thibela matšoele ho ba etsetsa sehlabelo.

₁₉Eaba ho fihla Bajuda, ba e-tsoa Antiokia le Ikonione, 'me hoba ba kholise matšoele, ba tlepetsa Paulosi ka majoe, ba mo hulanyetsa kantle ho motse, ba hlōma eka o shoele. ₂₀Eare ha barutuoa ba sa ntsane ba 'mokanetse, a ema, a kena motseng. Ka la hosasane a tloha le Baranabase, ba ea Derebe.

₂₁Hoba ba bolelle motse oa Derebe molaetsa o molemo, 'me ba sokolle ba bangata hore e be barutuoa, ba boela Lesitera le Ikonione le Antiokia. ₂₂Ba matlafatsa lipelo tsa barutuoa, ba ba khothaletsa ho tiisetsa tumelong, ba re: “Eka khona re kene 'Musong oa Molimo ka ho feta har'a matšoenyeho a mangata.” ₂₃Ha ba se ba ba khethetse baholo kerekeng e 'ngoe le e 'ngoe, ba rapela, ba itima lijo, 'me ba ba bea matsohong a Morena eo ba lumetseng ho eena. ₂₄Hoba ba fete le Pisidia, ba fihla Pamfilea. ₂₅Ha ba se ba boletse lentsoe la Molimo Perege, ba theohela Atalea.

₂₆Ba tloha teng ka sekepe, ba tšelela Antiokia, e leng moo ba neng ba ile ba beoa kalosong ea mohau oa Molimo ka baka la mosebetsi oo joale ba o phethileng. ₂₇Ha ba fihla, ba phutha kereke, ba bèha tsohle tseo Molimo a li entseng ka bona, le hore o buletse balichaba monyako oa tumelo. ₂₈Joale ba lula nako e telele le barutuoa.