Ishe-Boshete oa bolaoa
1Ha Ishe-Boshete, mora oa Saule, a utloa hore Abinere o shoeletse Heborone, a khathala matla, 'me Baiseraele bohle ba tšoha. 2Ishe-Boshete, mora oa Saule, o ne a e-na le banna ba babeli, bao e neng e le balaoli ba mabōthoana a hlaselang. Lebitso la e mong e ne e le Baana, la e mong e le Rekabe. E ne e le bara ba Rimone oa Beerote e naheng ea bana ba Benjamine, hobane Beerote le eona e ne e oela naheng ea ba morabe oa Benjamine. 3Baahi ba Beerote ba balehela Gitaime, 'me ba ntse ba jakile teng le kajeno-ea-bokajeno.
4Jonathane, mora oa Saule, o ne a e-na le mora ea neng a holofetse maoto. Ha pehi ea Saule le Jonathane e fihla, e e-tsoa Jesereele, o ne a le lilemo li hlano. Mohōlisi oa hae a mo nka, a baleha. Ka baka la ho baleha ka potlako ha mohōlisi, moshanyana a oa, eaba o robeha maoto. Lebitso la hae e ne e le Mefiboshete.
5Joale bara ba Rimone oa Mobeerote, bo-Rekabe le Baana, ba ea ha Ishe-Boshete, 'me ha letsatsi le le hloohong tsa mengala ba fihla tlung ea hae, a sa ntse a le phomolong ea har'a mpa ea motšeare. 6Bo-Rekabe le ngoana'abo Baana ba kena katlung joalokaha eka ba il'o reka koro, eaba ba mo hlaba tšoeleseng, 'me ba baleha.
7E ne e ile ea re hoba ba kene ka tlung ba mo hlaba, ba 'molaea a ntse a paqame liphateng tsa hae. Ba mo khaola hlooho, ba e nka, ba tsamaea bosiu bohle ka tsela ea Araba. 8Eaba ba isa hlooho ea Ishe-Boshete ho Davida a le Heborone, 'me ba re ho khosi: “Bona hlooho ea Ishe-Boshete, mora oa sera sa hao Saule, ea neng a rata ho u bolaea. Kajeno Morena o phetelitse mong'a ka khosi ho Saule le ho bana ba hae.”
Polao ea Ishe-Boshete ea phetetsoa
9Davida a araba Rekabe le ngoan'abo Baana, bara ba Rimone oa Mobeerote, a re ho bona: “Ke hlapanya ka Morena ea phelang, ea mpholositseng litsietsing tsohle, 10hore motho ea neng a mpēhele, ha ke le Sikelage, a re ho 'na: ‘Bona, Saule o shoele,’ e le ha eena a nahana hore o ntliselitse litaba tse monate, bakeng sa ho mo nea moputso ka baka la taba tseo tsa hae, ke ne ke mo tšoare, ka 'molaea. 11Joale ho tla ba joang ha banna ba khopo ba bolaile motho ea se nang molato, le hona a le liphateng ka tlung ea hae? Na ha ke tšoanele ho le ahlōlela polao ea motho eo, ke le felise lefatšeng?”
12Davida a laela bahlankana, ba ba bolaea, ba ba khaola maoto le matsoho, ba ba fanyeha pel'a letšana le Heborone. Hlooho ea Ishe-Boshete eona ba e nka, ba e epela ka lebitleng la Abinere, Heborone.
