Ho phetetsoa mali a Bagibeone
1Mehleng ea Davida ha e-ba le tlala ka lilemo tse tharo, tse hlahlamanang. Davida a botsa Morena, 'me Morena a re: “Tlala ena e teng ka baka la Saule le ba lelapa la hae, ba mali matsohong, hobane Saule o bolaile Bagibeone.”
2Bagibeone e ne e se ba habo bana ba Iseraele; e ne e le masalla a Baamore. Bana ba Iseraele ba ne ba ba hlapanyelitse hore ba tla ba baballa, empa Saule eena o ne a rata ho ba bolaea ka baka la ho thahasella bana ba Iseraele le ba Juda. 3Eaba Davida o bitsa Bagibeone, o re ho bona: “Ke le etsetse eng? Tefelo nka e etsa ka eng, e le hore le tle le hlohonolofatse sechaba seo e leng lefa la Morena?”
4Eaba Bagibeone ba re ho eena: “Ntoa ea rōna le Saule, kapa le ba lelapa la hae, hase e ka lalang ka baka la silefera kapa khauta. Ebile ha re rate ho bolaea motho ofe kapa ofe naheng ena ea Iseraele.”
Joale Davida a re: “Le re ke le etsetse eng?”
5Ba re ho khosi: “Monna o teng ea ileng a re ripitla, a re lōhela mano hore re timetsoe, hoo ho seng ho se moo re ka hatang teng naheng ena ea Iseraele. 6Re nee banna ba supileng, bao e leng bara ba hae, re tle re ba fanyehele Morena, re le Gibea ea Saule, mokhethoa oa Morena.”
Khosi ea re: “Ke tla neelana ka bona.”
7Empa ka baka la kano eo bo-Davida le Jonathane, mora oa Saule, ba neng ba e hlapanyetse ka lebitso la Morena, khosi ea rekolohela Mefiboshete, mora oa Jonathane, setlōhōlō sa Saule. 8Eaba khosi e nka Aremoni le Mefiboshete, e leng bana ba babeli, bao Risepa, morali oa Aea, a neng a ba tsoalle Saule, le bara ba bahlano ba Mikale, morali oa Saule, bao a neng a ba tsoalle Adariele, mora oa Barasilai oa Mehola. 9Khosi ea neelana ka bona matsohong a Bagibeone. Bagibeone ba ba fanyehela thabeng, kapele ho Morena, 'me ba e-shoa bohle ka bosupa ba bona. Ha ba bōlaoa e ne e le qalehong ea matsatsi a kotulo, ha ho qaloa ho hèla harese.
10Joale Risepa, morali oa Aea, a nka mokotla, a ikalla oona holim'a lefika, ho tloha qalong ea kotulo, ho fihlela ha lipula li e-na. Motšeare a tšosa linonyana tse fofang hore li se ke tsa lula holim'a litōpō tseo, 'me bosiu a leleka libatana tsa naha.
11Ha Davida a bolelloa se entsoeng ke Risepa, morali oa Aea, mosali oa lefielo oa Saule, 12Davida a theoha, a ea nka masapo a Saule le a Jonathane, mora oa Saule, ho banna ba Jabeshe-Gileade, ba neng ba a utsoe lebaleng la Bete-Shane, moo Bafilesita ba neng ba ile ba ba fanyehela teng, mohl'a Saule a bolaeloang Gileboa ke Bafilesita. 13Davida a nyoloha moo a nkile masapo a bo-Saule le Jonathane, mora oa Saule; ba ba ba bōkella le masapo a ba ileng ba fanyehoa.
14Ba epela masapo a bo-Saule le Jonathane, mora oa Saule, naheng ea morabe oa Benjamine, e Sela, ka lebitleng la ntat'ae Kishe. Ba etsa tsohle tseo khosi e laetseng hore li etsoe, 'me kamora' moo, naha ea rapelloa ho Molimo.
Abishai o namolela Davida ho seqhobane
15Bafilesita ba boela ba loana le Baiseraele. Davida a theoha le bahlanka ba hae, ba loantša Bafilesita, Davida a ba a khathala. 16Ishibi, eo e neng e le e mong oa liqhobane, o ne a le Nobe. Lerumo la hae, le entsoeng ka lethose, le ne le le boima bo ka etsang likilo tse tharo le halofo, a bile a hlometse le ka sabole e ncha, 'me a nyoretsoe ho bolaea Davida. 17Empa Abishai, mora oa Seruea, a thusetsa Davida, a hlaba Mofilesita eo, a 'molaea. Banna ba Davida ba mo hlapanyetsa, ba re: “Ha u ka ke ua hlola u futuha le rōna, esere ua bolaoa, 'me lebone la Baiseraele la tima.”
Bahlabani ba Davida ba bolaea liqhobane
18Kamora' tsena, Bafilesita ba boela ba tsosa ntoa Gobe. Sibekai oa Mohusha a bolaea Safe, eo e neng e le e mong oa liqhobane.
19Bafilesita ba boela ba tsosa ntoa e 'ngoe hape, Gobe. Elehanane, mora oa Jaare-Oregime oa Betlelehema, a bolaea Goliate oa Mogate. Thekō ea lerumo la Goliate e ne e le kalo ka mofeng oa mochine o ohlang.
20Ntoa e 'ngoe ea boela ea qhōma Gate. Hona moo ho ne ho e-na le monna oa safōla. Le leng le le leng la matsoho a hae, le maoto a hae, le ne le e-na le menoana e tšeletseng, kaofela e le menoana e mashome a mabeli a metso e mene, 'me le eena e le seqhobane. 21Monna enoa a 'na a phephetsa Baiseraele, 'me Jonathane, mora oa Shima, ngoan'abo Davida, a 'molaea.
22Ba bane bana ba ne ba tsoetsoe ke seqhobane sa Gate, 'me ba bolaoa ke Davida le ke bahlanka ba hae.
