2 SAMUELE 18

₁Davida a bala banna ba neng ba e-na le eena; ba okameloa ke balaoli ba bahlabani ba likete, le balaoli ba ba makholo. ₂A arola bahlabani mabōtho a mararo. Molaoli oa lebōtho la pele e ne e le Joabe; oa lebōtho la bobeli e le Abishai, mora oa Seruea, ngoan'abo Joabe; oa lebōtho la boraro e le Itai oa Mogate. Khosi ea re ho bahlabani: “Le 'na ka nama ke tla futuha le lōna.”

₃Empa bahlabani ba re: “Uena u se ke ua futuha le rōna. Ha re ka baleha, ba ke ke ba re tsotella. Leha ba ka ba bolaea halofo ea bahlabani ba rōna, ba ke ke ba re tsotella; feela uena u lekana le bahlabani ba likete tse leshome ba rōna, ka bohlokoa. Ka baka leo, ho molemo hore u tle u re thuse u ntse u le ka motseng.”

₄Khosi ea re ho bona: “Ke tla etsa seo le bonang se le molemo.”

Khosi ea ema pel'a khoro ea motse ha bahlabani ba e-tsoa ka makholo le ka likete. ₅Khosi ea laela Joabe, le Abishai, le Itai, ea re: “Le mpaballele mohlankana Abosalome.” Bahlabani bohle ba utloa ha khosi e laela balaoli malebana le Abosalome.

₆Mabōtho a tsoela naheng ho ea loantša Baiseraele. Ntoa ea loanela morung oa Efraime. ₇Bahlabani ba Baiseraele ba hlōloa ke ba Davida. Ka letsatsi leo ha bolaoa Baiseraele ba bangata; ba ne ba ka ba likete tse mashome a mabeli. ₈Ntoa ea aparela sebaka seo sohle. Ka letsatsi leo, batho ba ileng ba shoella ka morung ba e-ba bangata ho feta ba ileng ba bolaoa ka sabole.

₉Bahlankana ba Davida ba bona Abosalome a palame 'meile. Eitse ha 'meile o feta tlas'a makala a teteaneng a sefate se seholo sa eike, hlooho ea hae ea tšoasoa ke makala, eena a sala a leketlile sebakeng, 'meile oo a neng a o palame oa monyoha ka tlase hae.

₁₀Monna e mong ea ileng a bona hona a bolella Joabe, a re: “Ke bone Abosalome a leketlile sefateng sa eike.”

₁₁Joabe a re ho monna eo ea 'moleletseng: “Haeba u 'mone, ke ka baka la'ng u sa kang ua 'molaela hona moo, a pōlana fatše? Nkabe ke u putsa ka lisilefera tse leshome, le ka leqhama.”

₁₂Monna eo a re ho Joabe: “Leha u ne u ka mpha lisilefera tse sekete, ke ne nke ke ka bolaea mora oa khosi, hobane moo re ntseng re utloa, khosi e ile ea laela uena, le Abishai, le Itai, ea re: ‘Le mpaballele mohlankana Abosalome.’ ₁₃Hoja ka bolaea Abosalome ka bolotsana, ke ne ke tla ipea kotsing, hobane ha ho letho le patehileng ho khosi, 'me ebe uena ua itšōla.”

₁₄Eaba Joabe o re: “U ntšenyetsa nako!” A nka marumo a mararo, a phehletsa Abosalome pelong ka 'ona, a ntse a phela, a leketlile sefateng sa eike. ₁₅Bahlankana ba leshome, bao e neng e le bajari ba lihlomo tsa Joabe, ba kopanela Abosalome, ba mo khakhatha, ba 'molaea.

₁₆Eaba Joabe o letsa lenaka, 'me bahlabani ba khaotsa ho phalalisa Baiseraele, hobane Joabe o ne a se a ba thibile. ₁₇Ba nka setōpō sa Abosalome, ba se lahlela ka lemeneng le leholo, le neng le le ka morung, ba se qhobella ka majoe, ba etsa qubu e kholo. Joale Baiseraele bohle ba phasaphasa, motho ka mong a leba lapeng la hae.

₁₈Ha Abosalome a sa ntsane a phela, o ne a ile a ikhahela sefika ka Khohlong ea Khosi, hobane o ne a re: “Ha ke na mora ea tla tsosa lebitso la ka.” Sefika seo a se reella ka eena, 'me se ntse se bitsoa Sefika sa Abosalome le kajeno-ea-bokajeno.

₁₉Ahimase, mora oa Sadoke, a re ho Joabe: “E-re ke mathe, ke e'o bēhela khosi litaba tse monate tsa hore Morena o e phetelitse ho lira tsa eona.”

₂₀Empa Joabe a re ho eena: “U ke ke ua isa litaba kajeno; u tla li isa ka letsatsi le leng. Ha e le kajeno u ke ke ua li isa, hobane mora oa khosi o shoele.”

₂₁Eaba Joabe o re ho monna oa Kushe: “Tsamaea, u e'o bolella khosi seo u se boneng.” Mokushe eo a obamela Joabe, eaba o nka ka saole.

₂₂Joale Ahimase, mora oa Sadoke, a boela a re ho Joabe: “Leha ho ka etsahala eng kapa eng, ntumelle le 'na ke mathe kamora' Mokushe.”

Joabe a re: “Uena u tla be u mathela lelea, ngoan'aka, hobane ha ho na litaba tse monate, tseo u li isang.”

₂₃Empa Ahimase a re: “Leha ho ka etsahala eng kapa eng, ke tla matha.”

Joabe a re ho eena: “Matha!” Ahimase a takolotsa ka tsela e ka phuleng, a siea Mokushe eo.

₂₄Davida o ne a lutse pakeng tsa likhoro tse peli tsa motse. Sebōhōli sa hloella lerakong, marulelong a holim'a khoro ea motse. Ha se phahamisa mahlo, se talima, sa bona monna ea tlang a matha a le mong. ₂₅Sebōhōli seo sa hōoeletsa, sa tsebisa khosi.

Eaba khosi e re: “Haeba monna eo a le mong, o tlisa litaba tse monate.” Monna eo a 'na a atamela.

₂₆Sebōhōli sa boela sa bona monna e mong ea tlang a matha, eaba se hōoeletsa molebeli oa khoro, se re: “Monna e mong hape ke eane a e-tla a matha a le mong!”

Eaba khosi e re: “Le eena o tlisa litaba tse monate.”

₂₇Sebōhōli sa re: “Ke bona monna ea kapele a matha joaloka Ahimase, mora oa Sadoke.”

Eaba khosi e re: “Ke monna ea lokileng, 'me o tlisa litaba tse monate.”

₂₈Ahimase a hōoeletsa, a re ho khosi: “Khomo tseo!” A obamela khosi, a re: “Ho bokoe Morena Molimo oa hao, ea neelaneng ka banna ba ileng ba tsohela mong'a ka, khosi ea ka, matla.”

₂₉Khosi ea re: “Na mohlankana Abosalome o ntse a phela?”

Ahimase a araba, a re: “Ka nako eo Joabe, mohlanka oa khosi, a neng a rōma 'na, mohlanka oa hao, ke ile ka bona morusu o moholo, empa ha kea ka ka tseba hore na ke oa eng.”

₃₀Khosi ea re ho Ahimase: “Fetela kathōko, u eme mona!” Ahimase a fetela kathōko, a ema themelele!

₃₁Joale monna oa Mokushe a fihla, a re: “Ke u tsebisa litaba tse monate, mong'a ka, khosi ea ka! Ka letsatsi lena Morena o u phetelitse ho bohle ba ileng ba u tsohela matla!”

₃₂Khosi ea re ho monna eo oa Mokushe: “Na mohlankana Abosalome o ntse a phela?”

Mokushe a araba, a re: “Lira tsa mong'a ka, khosi ea ka, le bohle ba u tsohetseng matla, hore ba u ntše kotsi, ba ke ba be seo mohlankana eo a leng sona.”

₃₃Khosi ea sisimōlōha moea haholo, eaba e nyolohela ka kamoreng e hahiloeng holim'a lerako la khoro e kenang ka motseng, e ea llela teng. Ha e ntse e lla ea 'na ea re: “Jo! ngoan'aka Abosalome! Ngoan'aka, ngoan'aka Abosalome! Hoja ebe ho shoele 'na bakeng sa hao! Jo! Abosalome, ngoan'aka, ngoan'aka!”